Estere 1 - Mawu a Mulluku

Machellello a mwene Ahasuwero

¹ Nndda sika ddeereyille enthawi ya mwene Ahasuwero. Ahasuwero aanalamulella ezigawo 127 ovenyera o Indiya ophiya o Kushi.

² Mu omwenaaye Ahasuwero akhalla mu muzinda muullupalli wooromolliwa Susa.

³ M'muyakhani waneeraru wa omwenaaye aakeraatthiha machellello a attekweenaaye attheene ni allupa muttekwaaye, akhoto uullupalli a o Persiya ni a o Mediya vamoddattho ni athu oovuwa ni enduna dda mu ezigawo ddaye.

⁴ Va miyeri mitthanu ni mmodda mwenooyo aanooniha waata ni olemu wa eyuumaaye navettho oreera ni wunnuwa wa omwenaaye.

⁵ Ddiviralle miyeerinnddo, mwene Ahasuwero aakeraatthihattho machellello nimodda ni athu attheene, athu oovuwa ni athu shisha, ookhalla mu muzinda wa Susa. Machellellwaalla yeereyelle va nthato na enyumba yoomwene va enthawi yookwakhwana mulungu mmodda.

⁶ Nave nthatonno naareerihiwa ni makatani a nthoche navettho ekuwo ddoottheerelleya ddoobiliwila ni ddaweella nnddo ddamakellelliwe ni mikwe dda ekuwo yabafuta ni ekuwo emodda yooreera yoofiira. Mikwennddo ddamakellelliwe ni emphete dda siliva o apoto a malluku a marabulo. Mipando dda golide ni dda siliva ddaatthattiwa va nthato nno napotokosiwe ni malluku aphaama a marabulo, amodda oofiira, amodda oonyezimella navettho ni mamoddattho oowallamella mutengo.

⁷ Mwene ahooniha mahallaaye vawaavahani alletwaayo vinywaaye munchichi. Yawiryella mu makapu a golide nave yaari a mitundu ddoohiyanahiyana.

⁸ Owiryanko weereya moollikana ni lamulo nawi mwene ahaalamula allupa mutteko a o enyumbaaye wi arive muthu awirye ddoowiryannddo moopaalla mwaye.

⁹ Enthawi yeeyo mwaaramwene Vasiti nayeenettho aakeraatthiha machellello a atthiyana a o enyumba yoomwene Ahasuwero.

¹⁰ Va nllapo naneetthanu ni piilli na machellello nno mwene ahakallallilleeye m'murimani mwaye ekaamba ya omuwirya vinyo, aawiithana Mehumani, Bizita, Haribona, Bigita, Abagita, Zetara ni Karikasi. Alla yaari allupa mutteko amwene oohulliwa* atthanu ni eelli.

¹¹ Nave ahaalamula wi eweena mwaaramwene Vasiti vamiitthoni vaye awarille enduwira yoomwene vawi Vasiti aari mutthiyana ooreera wunchichi. Sikathi mwene apaalla wi enduna ni alleto attheene eddoonelle oreera wa mwaaramwenooyo.

¹² Koma mwaaramwene Vasiti aakhoota owa naari mwene alamulalle vawaarumihani allupa muttekwaayaalle. Vano mwene aasha murima wunchichi ni ddenndda nave owallaaye wavoreyella muwariwari.

¹³ Sika mwene aawiithaniha athu eezeru oodduwella ddaweereya dda enthawi ddittheddene wi aakohe. Vawi mwene aanaddollweella waakoha athu odduwella malamulo ni echiweruzo.

¹⁴ Mannddiniiwa yaari Karisena, Setara, Adimata, Tarishishi, Meresi, Marisena ni Memukana. Alliwaalla yaari enduna dditthanu ni piilli dda o Persiya ni Mediya ayo yaakhullelliwa ophiyera vamiitthoni va mwene nave alla yaari oohoollella uullupalli mu omwenooyo.

¹⁵ Vano mwene allota wi, “Mi, mwene Ahasuwero, kahaarumiha allupa muttekwaaka wa mwaaramwene Vasiti moomulamula koma aakhoota wiiwellella olamula waka! Ethiyo neere tini ni mutthiyanoolla moollikana ni malamulo?”

¹⁶ Vano Memukana aallota vamiitthoni va mwene ni enduna ddaye wi, “Mwaaramwene Vasiti khaavevunlle amweneve komattho enduna ddiwa naarittho arive mullopwana ookhalla mu omwene muttheene.

¹⁷ Vawi nnddo ddeerille mwaaramwene ddineerewiiweya variyari va atthiyana attheene nave eneerekewaavevulla amamuniwa voollotani wi, ‘Mwene Ahasuwero aamulamula mwaaramwene Vasiti wi aye wa olliye koma aakhoota.’

¹⁸ Ollello vaava awara a enduna ddittheddene dda mwene dda o Persiya ni o Mediya ayo yiiwalle ddaweera ddoonanara dda mwaaramwenoolla, eneerekoddillotella moophwanaphwana. Sika vineerokhalla ovevullana ni ollutuwihana wunchichi.

¹⁹ Ddaarimi dduuddivelleni nyu amwene, mulamule wi Vasiti ahiwe aphiya vamiitthoni vanyu navettho lamulonna nilembiwe mu nibukhu na malamulo a Aperisi ni Amedi wi nihiwe nirukunusiwa. Sika va nipuro na Vasiti vivollochihiwe mmodda aphaama omukhwaranya Vasitooyo.

²⁰ Sika lamulo nno nyuwaano munaakeraatthiheenyu, nillalleyiwe mu omwenaanyu muullupalli wunchichoolla. Vano atthiyana oovuwa ni ashisha, attheene eneerekoovelleella olemu wa asimamuniwa.”

²¹ Mwene ni enduna yaahakallalla ni malangizwaalla, sika mwene aheera nnddo ddallotille Memukana.

²² Mwenooyo aarumiha makalata o ezigawo ddittheddene dda mu omwenaaye, o erive echigawo moollikana ni mmo enalembelliiwa navettho wa nirive nlloko mu ellotellwiiwa, ootthopoolla wi arive mullopwana akhalle muullupalli ni oolamulella nibanja naye.