Eksodo 9 - Mawu a Mulluku

Yoottikhiniha yaneetthanu: Okhwa wa eziweto

¹ Vano Apwiya yaamulamula Mose wi, “Khawe wa Farao wamulleelle wi, ‘Apwiya Mulluku a Aheberi, enallota wi owaakhullelle athwaaka evenyewo wi eye yakillapelle.

² Koma waakhootiha wi ehivenyewo,

³ Apwiya eneerewuullakani ni ereta yawoopiha va eziweto ddawo wonanko akavalo, abulu, ekamira,* eng'ombe, enkhosa ni epuri.

⁴ Koma eneerohiyaniha variyari va eziweto dda Aisraele ni dda Aiguputo. Sika kheyiivo naari echiweto emodda ya Aisraele enaakhwe.

⁵ Apwiya aakhoza osiisello wi ekhalle enthawi yaweera ddenndda mwiillaponimmu.’ ”

⁶ Sika osaka wene Apwiya yaheera moollikana ni mmo yallotelliiwa nave eziweto ddittheddene dda Aiguputo ddaakhwa. Koma kheyaarivo naari echiweto emodda ya Aisraele yakhwille.

⁷ Nave Farao akohille phaama, ahiiwa wi kheyaarivo naari echiweto emodda ya Aisraele yakhwille. Koma Farao ahummihave murima nave khaawaakhullelle athwaayo wi evenyewo.

Yoottikhiniha yaneetthanu ni emodda: Etthuku

⁸ Vano Apwiya yaamulamula Mose ni Aroni wi, “Muvahulle ntuura na viikho nnatta nimodda nave Mose anivokhelle ntuuranno muddullu vamiitthoni va Farao.

⁹ Ntuuranno nineeromwareyella mu ellapo ettheene ya Iguputo wonanko nthupi. Nave virive veko va athu ni enama mvo ninaamoorelliiwavo, vineerokhuma marudda ayo enaaphulleyeke.”

¹⁰ Vano Mose ni Aroni yaavahulla ntuuranno viikho nave yahiimella vamiitthoni va Farao. Nave Mose aanivokhella ntuuranno muddullu nave va athu ni enama vaakhuma etthuku nnddo ddaphulleya.

¹¹ Amasengaalle kheyaaworillettho ophiyera vamiitthoni va Mose ekaamba yawi alliwattho yaari etthukuve, moollikana ni mmo yakhallelliiwa Aiguputo attheene.

¹² Koma Apwiya yaamummihave murima Farao sika khaawiiwellelle Mose ni Aroni moollikana ni mmo Apwiya yallotelliiwa.

Yoottikhiniha yaneetthanu ni piilli: Marallalla

¹³ Vano Apwiya yaamulleella Mose wi, “Osiisello ohinase oye wakumane ni Farao, wamulleelle wi, ‘Apwiya Mulluku a Aheberi, enallota wi owaakhullelle athwaaka evenyewo wi eye yakillapelle.

¹⁴ Vawi kineerorumiha millilli ddaka ddittheddene wa weyaano, wa enduna ddawo ni wa athwaawo wi odduwelle wi khaavo mmodda oophwanaphwana ni miyaano va ellapo yavatthi ettheene.

¹⁵ Katukhullalleke nnatta naka wi kuullakena weyaano ni athwaawo, ddaano mutthollowille.

¹⁶ Koma kohuusungani ni okumi wi koonihe masivaaka ni ovuwiha epillaaka mu ellapo yavatthi ettheene.

¹⁷ Koma onimaanyaambusave athwaaka, vawaakhootihani wi evenyewo.

¹⁸ Vano ngiiwani, osiisello enthawi yawi ddiidda, kineeromoriha marallalla awoopiha ayo ehinamorekevo ovenyera ephatuwello ya Iguputo.

¹⁹ Sika vano vollochihani eziweto ddanyu ddittheddene munipuroni nooteteziwa ni ddeko ddanyu ddittheddene muriinyuna. Arive muthu apaalle erive enama eyo enaakhalle vaatte, munipuroni noohiteteziwa, eneerokhwa yamorelliwa ni marallalla.’ ”

²⁰ Enduna ddimodda dda Farao ddahoova ekaamba ya mawu a Apwiya nave ddahaathawihella akaporwiiwa mpa ni eziweto ddiwa ddene.

²¹ Koma enduna ddimodda kheddaapwathille mawu a Apwiya nave yaarimoona waahiya akaporwiiwa vaatte ni eziweto ddiwa ddene.

²² Vano Apwiya yaamulleella Mose wi, “Tukhulla nnatta nawo oddullu nave marallalla eneeromora va athu, va enama ni va ddoomella ddittheddene mu ellapo ettheene ya Iguputo.”

²³ Mose aatthoonyihella ekopwaaye oddullu. Nave Apwiya yaarumiha ogugudeya wa murimu ni marallalla nave ettari ddaamora muthaani. Sika Apwiya yaamoriha marallalla va ellapo ya Iguputo.

²⁴ Nave waakhalla marallalla ni ettari ddoosherima wunchichi. Marallalleene yaari awoopiha ayo ehinamorekevo ovenyera ephatuwello ya ellapo ya Iguputo.

²⁵ Marallallaayo yahoononga ddittheddene ddahisungiwe mpa mu ellapo ya Iguputo ettheene, athu attheene ni enama ddene. Yahoonongattho ddoomella ddittheddene navettho etthalla miteekho ddittheddene.

²⁶ Marallallaayo kheyaamorellewo o ellapo ya Gosheni, nko wakhalla Aisraele.

²⁷ Vano Farao aamwiithana Mose ni Aroni aalleella wi, “Ddawoona koochimwa. Apwiya tti ookhoza koma miyaano ni athwaaka, attheene niri oochimwa.

²⁸ Ddoottepa! Vekella wa Apwiya wi ehiihe ogugudeya wa murimu ni marallallaalla. Kineerowaakhullellani wi muvenyewo. Khemukhallattho wuno iyaayi.”

²⁹ Mose aamwaakhulla wi, “Kakhumave m'muzindanimmu, kineerovekella wa Apwiya. Nave ogugudeya wa murimu ni marallalla ddineerohiya wi mudduwelle wi ellapo yavatthi ettheene tti ya Apwiya.

³⁰ Koma kinnadduwella wi nyuwaano ni enduna ddanyu khemunawoovave Apwiya Mulluku.”

³¹ Nave nthoche ni tirigu ooromolliwa bale ddahoonongeya, ekaamba yawi balooyo aari awaraallille khalle nave nthochenno naari naambeelle khalle ophuwella malluwa.

³² Koma mitundu ddimodda dda tirigu kheddaawonongeyille kaambiiwa ddiithwa mooselliwa.

³³ Mose aavenyawo wa Farao wulle, akhuma m'muzindanimmo nave aavekella wa Apwiya. Vano ogugudeya wa murimu wulle ni marallallaalle ddaahiya navettho murimu aamwara.

³⁴ Koma Farao oonille wi murimu, marallalla ni ogugudeya wa murimu ddoohiya, aachimwattho wiilli nave ahummihave murima, olliye ni enduna ddayenndde.

³⁵ Sika Farao ahummihave murima nave khaawaakhullelle Aisraele wi evenyewo moollikana ni mmo Apwiya yamulleellelliiwa oweella mwa Mose.