Eksodo 6 - Mawu a Mulluku

¹ Koma Apwiya yaamulleella Mosooyo wi, “Vano oneerewoona nnddo kinaamweerelleemi Farao. Kineeromuwatihera ni nnatta naka namasiva wi aakhumihe athwaaka. Navettho aneerowiikariha mwiillaponi mwaye.”

Mulluku anamwiithana Mose

² Mulluku amulleella Mose wi, “Mi tti Apwiya.

³ Kahooneyella wa Abrahamu, wa Isaki ni wa Yakobo wonanko Mulluku Amasiva Mattheene koma ngaawaalleelle nnddina naka wi tti Apwiya.

⁴ Kaakeraatthihana echipangano waalonjeza wi kineerewaavaha ellapo ya Kanani, mmo yakhanlliiwamo khalle wonanko alleto.

⁵ Vano kohiiwa okhuwa wa Aisraele, ayo eri wuukaporoni m'mattani mwa Aiguputo nave kohuupuwella echipanganwaaka.

⁶ Sika weyaano waalleelle Aisraele mawaaka awi, ‘Mi tti Apwiya. Nave kineerewuukhumihani mu okaporo m'mattani mwa Aiguputo nave kineerewuuvullusani o mutteko wa kalavulagaga. Nave kineerowoopollani ni nnatta naka namasiva ni ollaka wawoopiha.

⁷ Kineerowaakhullellani nyuwaano wonanko athwaaka nave miyaano kineerokhalla Mullukwaanyu. Muneerodduwella wi mi tti Apwiya Mullukwaanyu, oyo uuvullusalleni o mutteko wa kalavulagaga.

⁸ Nave kineerewuuphiyihani o ellapo eyo kallupenlleemi wi kineeromuvaha Abrahamu, Isaki ni Yakobo. Kineerewuuvahani ellapo yeeyo wi ekhalle yaanyuyaanyu. Mi tti Apwiya.’ ”

⁹ Mose ahaalleella ddenndda Aisraele koma alliwa kheyaamwiiwellelle kaambiiwa alliwa yaari etathillalle murima khalle vookhallani mu okaporwiiwa wa ekuku yawi ddiidda.

¹⁰ Vano Apwiya yaamulleella Mose wi,

¹¹ “Khawe wamulleelle Farao wi awaakhullelle Aisraele wi evenyemo mwiillaponi mwaye.”

¹² Koma Mose ahaalleella Apwiya wi, “Aisraelaayo khenakiiwellella. Ethiyo Farao anaakiiwellelle mwawiidde? Miyaanothi valle nginawora ollota phaama.”

¹³ Koma Apwiya yaamulamula Mose ni Aroni wi yaalleelle Aisraele ni Farao mwene a o Iguputo wi alliwaayo enaphwanella waavenyihamo Aisraelaayo mu ellapo ya Iguputo.

Mibado dda Mose ni Aroni

¹⁴ Anamwani a Rubeni, mwaana aamullopwana awaamba a Yakobo, yaari, Hanoki, Palu, Hezironi ni Karimi. Yaalla sika yaari makhollo a mabanja ayo yaromolliwa ni nnddina niwa.

¹⁵ Anamwani a Simeoni yaari, Yemuwele, Yamini, Ohadi, Yakini, Zohari ni Shaulo mwaana ooyariwa mwa mutthiyana a o Kanani. Yaalla sika yaari makhollo a mabanja ayo yaromolliwa ni nnddina niwa.

¹⁶ Manddina a anamwani a Levi moollikana ni oyariwa wiwa yaari, Gereshoni, Kohati ni Merari. Levooyo aakhalla ni okumi wa miyakha 137.

¹⁷ Anamwani a Gereshoni yaari, Libini ni Shimeyi, makhollo a mabanjiiwa.

¹⁸ Anamwani a Kohati yaari, Amuramu, Izihara, Hebroni ni Uziyele. Kohati aakhalla ni okumi wa miyakha 133.

¹⁹ Anamwani a Merari yaari, Mali ni Mushi. Vano yaalla sika yaari mabanja a Levi ni edduullu ddiwa.

²⁰ Amuramu aamutthella murokoriwa a attiitthinnya nnddina naye Yokebede. Yokebedooyo aamuyara Aroni ni Mose. Amuramu aakhalla ni okumi wa miyakha 137.

²¹ Anamwani a Izihara yaari, Kora, Nefegi ni Zikiri.

²² Anamwani a Uziyele yaari, Mishaele, Elizafani ni Sitiri.

²³ Aroni aamutthella Eliseba, mwaana a Aminadabu nave murokoriye a Nashoni. Eliseba aamuyara Nadabu, Abihu, Eleazara ni Itamara.

²⁴ Anamwani a Kora yaari, Asiri, Elikana ni Abiyasafu. Yaalla sika mabanja a Kora.

²⁵ Eleazara, mwaana a Aroni, aamutthella mmodda mwa anamwani a Putiyele, oyo amuyarelle Finehasi. Vano yaalla sika yaari makhollo a mabanja a Alevi.

²⁶ Mose ni Aroni tti alle Apwiya yaalleelliiwa wi, “Akhumiheni Aisraele mu ellapo ya Iguputo, mallokomalloko.”

²⁷ Yaalla sika yamuvekille Farao, mwene a o Iguputo wi yaahoollelle Aisraele ovenyamo mu Iguputo.

Apwiya enalamula Mose ni Aroni

²⁸ Apwiya yaallota wa Mose o Iguputo

²⁹ wi, “Mi tti Apwiya. Wamulleelle Farao mwene a o Iguputo ddittheddene kinaawuulleelleemi.”

³⁰ Koma Mose ahaalleella Apwiya wi, “Nyu munnadduwella valle wi miyaano nginawora ollota phaama ddene, vano Faraooyo anaakiiwellelle mwawiidde?”