Eksodo 5 - Mawu a Mulluku

Mose ni Aroni enakumana ni Farao

¹ Vatulli viwa Mose ni Aroni yaaya wa Farao emulleella wi, “Apwiya Mulluku a Israele, enallota wi, ‘Owaakhullelle athwaaka eye o echipululu wi yeere ehakallallo yookillapella miyaano.’ ”

² Koma Farao ahaakhulla wi, “Ethiyo Apwiyaayo ttaani wi miyaano ttuuwiiwellella ddennddo ni owaakhullella Aisraele wi evenyemo? Apwiyaayo nginaadduwella nave ngiwa kaakhullella wi Aisraelaayo evenyemo.”

³ Vano alliwa yaamulleella wi, “Mulluku a Aheberi aakumana ni hiyaano. Vano ninimuuvekani munaakhullelle wi niye voolendoni wookwakhwana mallapo mararu muchipululuni wi navelleelle mukutho wa Apwiya Mullukwaahu. Naahiyaawo aneeroniipha ni ereta apaalle ekhoto.”

⁴ Koma mwene a o Iguputoolle aamukoha Mose ni Aroni wi, “Kaambiiwa tini nyuwaano munaahiiheenyu muttekwiiwa Aisraele? Venyanivoni mva! Nave hokollweellani omuttekoni wanyu.”

⁵ Nave aavirellella waalleella wi, “Athu yaalla ennavirellella waata waakhwaranya Aiguputo. Ethiyo kaambiiwa tini munapaalleenyu waahiiha ophara muttekwiiwa?”

⁶ Vano nllapo nenno Farao ahaalamula uullupalli a thangata a o Iguputo ni akapitawo a Aisraele wi,

⁷ “Muhiwinnyekettho manasi athu yaalla vawoopani enjerwa wonanko mweereseenyu khalle. Ahiyeni yaasheke manasaayo yeekhiwa.

⁸ Nave echiwerengero ya enjerwannddo ekhalle yeelle wonanko yoopelliiwa khalle. Muhaayevihelle naari vang'ono vawi tti oolesi yaalla. Sika ekaambiiwa eninlliiwa wi, ‘Naakhullelleni wi niye navelleelle mukutho wa Mullukwaahu.’

⁹ Athu yaalla mwaapharihe mutteko wa kalavulagaga wi yaatelliweke ni mutteko munipuroni mwawiiwellella ddawoottha.”

¹⁰ Sika uullupalli a thangata ni akapitawo yaaya yaalleella athu wi, “Farao allotille wi, ‘Ngiwinnyanittho manasi.

¹¹ Mwawaashe yeekhiinyu orive weko munaaphwanyeenyu. Koma echiwerengero ya enjerwa tti emoddamoddave yeelle.’ ”

¹² Sika athwaalle yaamwareya mu ellapo ettheene ya Iguputo waashaasha manasaayo ni mapallakeene.

¹³ Uullupalli a thangata a Farao yahaawatihera Aisraele nave yahaalleella wi, “Moopeke echiwerengero emoddamoddave yeelle ya enjerwa wonanko mmo mweerelleenyu mwavahiweenyu manasi.”

¹⁴ Alliwaayo yaanawuukuthattho akapitawo a Aisraele ayo yaakeraatthihalliiwa wi ekhalle oowehera mutteko yaakoha wi, “Kaambiiwa tini ollello athwaanyu ehoopilliiwa echiwerengero ya enjerwa wonanko yeerelliiwa khalle?”

¹⁵ Vano akapitawo a Israelaalle yaaya wa Farao yinllaka wi, “Ethiyo kaambiiwa tini muneerelleenyu ddenndda hiyaano oorumeyellaanyu?

¹⁶ Kheninavahiwattho manasi koma enimanilamulave voollotani wi, ‘Opakani enjerwa!’ Navettho enimanuukutha, sika athwaanyu ennanilakwella.”

¹⁷ Farao awaakhulla athwaayo wi, “Nyu tti oolesi wunchichi, sika ekaambiiwa munalloteenyu wi, ‘Naakhullelleni wi navelleelle mukutho wa Apwiya.’

¹⁸ Venyanivoni mva! Nave hokollweellani omuttekoni wanyu. Ehiwinnyenittho manasi koma echiwerengero ya enjerwa ekhalle emoddamoddave yeelle.”

¹⁹ Akapitawo a Israelaalle yahoona wi yaari mu ddoohoosa yalleelliwiiwa wi, “Moopeke echiwerengero ya enjerwa emoddamoddave yeelle nllapo ni nllapo.”

²⁰ Sika evenyillewo wa Farao wulle, yaakumana ni Mose ni Aroni ayo yaatiyera.

²¹ Nave yahaalleella wi, “Apwiya yoone mweerilleenyunndda nave yuullakeni vawi mooninanariha vamiitthoni va Farao ni enduna ddaye. Nyuwaano sika muhiyalle nsupada m'mattani mwiwa wi eniiphe hiyaano.”

Mose anakhupanya vamiitthoni va Apwiya

²² Vano Mose aavekellattho wa Apwiya wi, “Apwiya kaambiiwa tini munaahooseenyu athwaanyu? Ethiyo mwakirumelle tini?

²³ Ovenyera enthawi yeelle kayiilleemiwo wa Farao wi kamulleelle mawaanywaalle, ookhalla aahoosakave athwaanyu. Koma khemweerillevo naari ello wi mwaavulluse athwaanyu.”