Eksodo 40 - Mawu a Mulluku

Okeraatthiha wa musasa wamutthukumano

¹ Vano Apwiya yaamulleella Mose wi,

² “Va nllapo nawaamba na mweeri wawaamba, omake musasa wamutthukumano.

³ Mu nibokosi na echipangano onihiye mwemmo nave onikhuneelle ni ekatani yootchinga.

⁴ Omuhiyemo tebulo nave vaddullu va tebulooyo ohiyevo ezipangizo ddiwa nave ohiyemo yoohiyavo enyali ni enyali ddiwa.

⁵ Nave ohiye nikuwa nagolide nawoosellavo lubani* vahoollo va nibokosi na echipangano. Va mullako wa musasooyo ohiyevo ekatani yoowallana.

⁶ Ohiyevo nikuwa na mukutho wooshellelliha vahoollo va mullako wa musasooyo.

⁷ Ohiye nibeseni noohapellamo variyari va musasooyo ni nikuwa nave ohellemo maaddi.

⁸ Omake mpanda wa nthato waapheella musasooyo nave otthomeye ekatani ya mullako wa nthato.

⁹ “Vatulli viwa okuse makhura oozozellaalle wi ozoze musasa wamutthukumano ni ezipangizo ddiwa ddittheddene. Mwawi ddiidda onapatulella wa miyaano ni ezipangizo ddiwa ddittheddene wi okhalle waweella.

¹⁰ Nave ozozettho nikuwa na mukutho wooshellelliha ni ezipangizo ddiwa ddittheddene wi opatulelle wa miyaano wi ddikhalle ddaweellihiwa wunchichi.

¹¹ Ozozettho nibeseni noohapellamo ni marwiiweene wi opatulelle wa miyaano.

¹² “Vatulli viwa oweena Aroni ni anaaye o mullako wa musasa wamutthukumano nave attheenaayo oweerihe wi ehape moopatuleya.

¹³ Aronooyo omuwarihe ddoowara ddoopatuleya nave omuzoze ni omupatula wi ekhalle mullupa mukutho.

¹⁴ Anaayettho ewe nave waawarihe malaya.

¹⁵ Vano waazoze wonanko mmo waazozilleewe attiitthiiwa wi ekhalle allupa mukutho. Nave waamakellettho malaamba muyuununi mwiwa ni waawarihattho enduwira omuruni mwawi alliwaalla eneerokhalla allupa mukuthwaaka moollikana ni lamulo naka noohimalla. Mmu sika onaamuzozelleewe Aroni ni anaaye.”

¹⁶ Mose aheera ddittheddene moollikana ni mmo Apwiya yamulamulelliiwa.

¹⁷ Mwawi va nllapo nawaamba na mweeri wawaamba wa muyakha waneepiilli, musasa wamutthukumano waamakiwa.

¹⁸ Voomakani musasooyo Mose aahiya matthipellwiiwa vatthi nave ahiimesa meto, amakellella machengwiiwa, iimesattho apotwiiwa.

¹⁹ Vatulli viwa aahiya ekuwo dda musasa wamutthukumano ni echironiiwa moollikana ni mmo Apwiya yamulamulelliiwa.

²⁰ Nave aakusa malluku a echipangano aahiya munibokosini mulle. Aaherera ekoponndde mu emphete dda nibokosinno nave ahiya yookhuneella vaddullu viwa.

²¹ Nave aahiya nibokosinno m'musasanimmo nave aatthomeya ekatani yootchingella. Mwawi aatchinga nibokosi na echipangano moollikana ni mmo Apwiya yamulamulelliiwa.

²² Vano mu musasa wamutthukumanommo aamuhiyamo tebulo, ompoto wa nipuro naweella otte wa ekatani yootchingeelle.

²³ Nave vaddullu va tebulooyo aahiyavo buledi oopatuleyella wa Apwiya moollikana ni mmo Apwiya yamulamulelliiwa.

²⁴ M'musasani omwera, moowehana ni tebulo, aahiyamo yoohiyavo enyali.

²⁵ Vano va yoohiyavo enyali aahiyavo enyali wi ddikhalle vamiitthoni va Apwiya moollikana ni mmo Apwiya yamulamulelliiwa Mose.

²⁶ M'musasanimmo aahiyamo nikuwa nagolide vahoollo va ekatani yootchinga.

²⁷ Vanikuwanimvo ahoosavo lubani na nthuko naphaama moollikana ni mmo Apwiya yamulamulelliiwa.

²⁸ Va mullako wa musasa aahiyavo ekatani yoowallana.

²⁹ Nave aahiya nikuwa na mukutho wooshellelliha vahoollo va mullako wa musasooyo. Va nikuwa nenno, aavelleellavo mukutho wooshellelliha navettho mukutho wa othu moollikana ni mmo Apwiya yamulamulelliiwa.

³⁰ Nave aahiya nibeseni noohapellanne variyari va musasooyo ni nikuwa, ehellamo maaddi.

³¹ Vano Mose, Aroni ni anaaye yaanawa ni ohuwa manyallwiiwa.

³² Yaaneera ddenndda enthawi ddittheddene yaavollowaka m'musasani wamutthukumano apaalle yaawaatamellaka nikuwa moollikana ni mmo Apwiya yamulamulelliiwa Mose.

³³ Aamaka mpanda wa nthato waapheella musasa wamutthukumano ni nikuwa nave aatthomeya ekatani ya mullako wa nthato. Vano Mose aamalliha mutteko muttheenooyo.

Ntitimiho na Apwiya

³⁴ Murapo waakhuneella musasa wamutthukumano nave ntitimiho na Apwiya naaddalla musasooyo.

³⁵ Mose khaaworille ovollowa kaambiiwa murapooyo waari mwemmo nave ntitimiho na Apwiya naaddalla mu musasooyo.

³⁶ Va olendwiiwa muttheene, murapo wawella ovenyera vamusasani Aisraelaayo yaanatimulla yaariiwamvo.

³⁷ Koma murapooyo waahiwella, Aisraele kheyaatimulla. Yaanatiyera nllapo nawi murapo owelle.

³⁸ Va olendwiiwa muttheene, Aisraele yaanoona murapo wa Apwiya va musasa enthawi ya otthaana ni munllo m'muraponi enthawi ya mahiiyu.