Eksodo 4 - Mawu a Mulluku

Mulluku anamuvaha Mose masiva oottikhiniha

¹ Mose ahaakhulla wi, “Koma ethiyo vano Aisraelaayo yaahikikhulupilila apaalle yaahiiwellella mawaaka, enallota wi, ‘Apwiya khewooneyelle weyaano?’ ”

² Apwiya yaamukoha Mosooyo wi, “Ethiyo eri m'mattani mwaweeyo tti tini?” Mose ahaakhulla wi, “Ekopo.”

³ Nave Apwiya yaamulleella wi, “Ngayivokhelle vatthi.” Mose ayivokhille vatthi ekopweelle, yaatthattuwa enowa nave olliye aayithawa.

⁴ Vano Apwiya yaamulleella Mosooyo wi, “Yiphare mwiilla.” Mose aayiphara, enthawi yeeyo yaatthattuwattho ekopo m'mattani mwaye mwemmo.

⁵ Apwiya yaamulleella wi, “Weere ddenndda wi ekhulupilile wi Apwiya Mulluku a makhollwiiwa, Mulluku a Abrahamu, Mulluku a Isaki ni Mulluku a Yakobo, aawooneyella.”

⁶ Apwiya yaamulleellattho Mose wi, “Ngavollochiha nnatta nawo m'mukanjonimmo.” Olliye aanivollochiha koma anikhumiheeye, naakhalla ni makate, naateellella wonanko ntuura.

⁷ Vano Apwiya yaallota wi, “Nivollochihettho nnatta nawonno m'mukanjonimmo.” Olliye aanivollochihamottho koma anikhumiheeyemo naari naphaama noohikhalla ni makate, noophwanaphwana ni mwiillaaye muttheene.

⁸ Vano Apwiya yaallota wi, “Yaahuukhulupilila nave yaahikwakhwanihiwa ni echizindikiro yawaambeeyo, eneerokhulupilila echizindikiro yaneepiilleeyo.

⁹ Koma yaahikhulupilila ezizindikiro piilliddenennddo, ehinawiiwellella, wakuse maaddi a m'muhinjeni wa Nailo owiithelle vamutundani. Vano maaddi a vamutundanaayo eneerotthattuwa nikhame.”

¹⁰ Koma Mose aallota wi, “Apwiya, koophara mwetwaanyu. Miyaano waambeella khalle nginawora ollota phaama naari waambeella mvo mwaambeelleenyu ollota ni miyaano, oorumeyellaanyu. Ata! Nginatthopoolla voollotani.”

¹¹ Vano Apwiya yaamukoha Mose wi, “Ethiyo amuvahille muthu vayanoni ttaani? Ttaani anamweeriha muthu wi akhalle oohillota apaalle oohiiwa, awoona apaalle ohoona? Ethiyo ngihiyo mi Apwiya kineera ddennddo?

¹² Vano khawe, miyaano kineerewuukavihera ollotanko nave kineerewuulleella yawi wallote.”

¹³ Koma Mose aallota wi, “Apwiya, koophara mwetwaanyu nave kinuuvekani wi mumurume muthu mmodda.”

¹⁴ Vano Apwiya yaamushella murima Mose, emulleella wi, “Mwanamunno Aroni, Mulevoolle. Kinnadduwella wi olliyoolle ttuuwora ollota phaama ddene. Animawa wi akumane ni weyaano nave aneerohakallalla wunchichi aawoona.

¹⁵ Oneeromulleella yawi allote. Kineerewuukaviherani ollota eelliinenyu nave kineerowuulleellanittho ddawi mweere.

¹⁶ Olliye aneerekollota wa athu munipuroni mwawo. Aneerokhalla wonanko eyanwaawo nave weyaano onaakhalleke wonanko mullukwaaye.

¹⁷ Okuse ekopo eri m'mattani mwaweeyo nave wapharihe mutteko vaweerani ezizindikiro ddoottikhiniha.”

Mose anahokollweella o Iguputo

¹⁸ Vano Mose aahokollweella wa Yetero, attiitthinnya a mwaariyaalle, aalleella wi, “Pepaani mukaakhullelle wi kihokollweelle o Iguputo wa abalaaka wi kawoone yaarimi eri ni okumi.” Yetero aamwaakhullella Mose wi, “Khaweni ni murendelle.”

¹⁹ Apwiya yaamulleella Mose aariiye o Midiyani wulle wi, “Vano hokollweella o Iguputo vawi athu attheene yapaalla owiiphaalle yaakhwa.”

²⁰ Sika Mose aamukusa mwaariye ni anaaye, aawelliha vabuluni eya o Iguputo. Mose aakusa ekopo ya Mullukweelle m'mattani mwaye.

²¹ Apwiya yaamulleellattho Mose wi, “Mvo onahokollweelleewe o Iguputo, weere vamiitthoni va Farao ezizindikiro ddoottikhiniha ddittheddene nnddo kuuvahilleemi masiva aweerella. Koma kineeromummiha murima nave khaakhullella wi athwaaka evenyemo.

²² Nave wamulleelle Farao wi mi Apwiya kinallota wi, ‘Israele tti mwanaka aamullopwana awaamba.’

²³ Vano kinimuulleella wi omwaakhullelle mwanaka aamullopwana awaamba avenyemo wi aye akillapelle miyaano. Koma wakhoota omwaakhullella wi avenyemo, miyaano kineeromwiipha mwanawo aamullopwana awaamba.”

²⁴ Vatulli viwa Apwiya yaakumanana Mose m'musewuni wooya o Iguputo, vanipuroni nookonellavo olendo nave yahallille vang'ono omwiipha.

²⁵ Koma Zipora aakusa nlluku nawiisha, amuphaddana mwanaye aamullopwana nave nttapara niwa aattannyana manyallo a Mose. Sika Ziporooyo aallota wi, “Ddawoona weyaano tti mamunaka awoopolliwa ni nikhame.”

²⁶ Vano Apwiya kheyaamwiiphalle Mose. Ekaamba ya ophaddiwanko, sika Zipora allotelleeye wi, “We tti mamunaka awoopolliwa ni nikhame.”

²⁷ Apwiya yaamulleella Aroni wi, “Khawe ochipululuni wakumane ni Mose.” Sika Aroni aaya akumana ni Mose omwaangoni wa Mulluku nave aamukhupaarella.

²⁸ Vano Mose aamutthopoollella Aroni mawu mattheene ayo Apwiya yamurumalliiwena. Aamulleellattho dda ezizindikiro ddoottikhiniha ddittheddene nndde Apwiya yamulamulelliiwa wi addeere.

²⁹ Vano Mose ni Aroni yaatimulla oya o Iguputo, yaatthukumaniha oohoollella attheene a Aisraele.

³⁰ Aroni ahaatthopoollella oohoollellaayo ddittheddene nndde Apwiya yamulleelliiwa Mose nave aheerattho ezizindikiro ddoottikhiniha ddittheddenenndde athu attheene yoonaka.

³¹ Vano Aisraelaalle yaakhulupilila ddennddo. Sika yiiwalle wi Apwiya yaawa wa alliwa nave yahoona ohoosiwa wiwanko, yaakokhora emullapella Mulluku.