Eksodo 39 - Mawu a Mulluku

Mapangello a ddoowara dda allupa mukutho

¹ Vano yaapanga ddoowara ddooreera wunchichi dda allupa mukutho, ddoowara voorumeyellani munipuroni naweella. Yaapanga ddoowarannddo ni ekuwo ddabululu, ddooreera ddoofiira ni ddoofiira. Yaapanga ddoowara dda Aroni moollikana ni mmo Apwiya yamulamulelliiwa Mose.

² Yoowara ya efodi* yaayisowa ni olusi wagolide ni mapururu abululu, ooreera oofiira ni oofiira navettho bafuta aphaama ni awoopiwa mweeruso.

³ Nave yaahana ddawooneya wonanko mikwe dda golide ooshashaalla, eddichekacheka eddilluwella mweeruso omoddave ni ekuwo ddabululu, ddooreera ddoofiira, ddoofiira ni ddabafuta aphaama.

⁴ Yaakhalla ni malaamba meelli oowulluka vamathurini oosowella nimodda o etthoka ddiwa piilli oomakella efodooyo.

⁵ Vaakhallattho laamba oolluwa mweeruso, oomakellana efodi. Laambooyottho aari a olusi wagolide ni a mapururu abululu, ooreera oofiira ni oofiira navettho a bafuta aphaama moollikana ni mmo Apwiya yamulamulelliiwa Mose.

⁶ Vano yaakusa malluku a onikisi yaahiya mu ddoohiyamo ddiwa ddagolide. Nave yahaagoba mweeruso wonanko echidindo, elembavo manddina mattheene a anamwani aallopwana a Israele.

⁷ Malluku meellaayo yaahiyalle va malaamba a vamathurini a efodi wonanko yawuupusella ya Aisraele moollikana ni mmo Apwiya yamulamulelliiwa Mose.

Mapangello a yoowara ya vakhakaddani

⁸ Yaasowa yoowara ya vakhakaddani nave yoopetiwa mweeruso. Yaapanga wonanko efodi, sika ottaphullella wi mapangello a olusi wagolide ni a mapururu abululu ooreera oofiira ni oofiira navettho a bafuta aphaama.

⁹ Wunnuwa wiwa waari woophwanaphwana embali ddittheddene nave yaari yoopinda opiilli. Orekama wiwa waari masentimita 23, emoddamoddave yeeyottho okhuveya wiwa.

¹⁰ Yaahiyavo mizere misese dda malluku. Vamuzerani wawaamba vaakhalla malluku a rubi, topazi ni garaneti.

¹¹ Vamuzerani waneepiilli vaakhalla malluku a emeradi, safiro ni daimondi.

¹² Vamuzerani waneeraru vaakhalla malluku a yasinti, agate ni ametisiti.

¹³ Vamuzerani waneesese vaakhalla malluku a berulo, onikisi ni jasipere nave ddittheddenennddo ddaari mu ddoohiyamo ddagolide.

¹⁴ Malluku yaalla yaari khumi ni meelli moollikana ni malloko a Aisraele. Mallukwaayo yagobiwe wonanko ezidindo, nirive nlluku naari ni nnddina na nlloko nimodda.

¹⁵ Yaapanga onyolo wagolide aphaama wa va yoowara ya vakhakaddani, wooritthiwa phaama wonanko mikwe.

¹⁶ Yaapangattho ddoohiyamo ddiwa piilli ddagolide ni emphete piilli nave yaamakellella emphete piillinnddo va makona amuddullu a yoowara ya vakhakaddaneeyo.

¹⁷ Yaamaka onyolo wagolide miilli o emphete piillinnddo.

¹⁸ Nave etthoka ddiwa ddimodda piilli dda onyolooyo yaamakellella o ddoohiyamo dda malaamba a vamathurini vahoollo va efodi.

¹⁹ Yaapangattho emphete piilli ddagolide nave yaaddimakellella o makona amuhito mwa yoowara ya vakhakaddani muwari waatamana ni yoowara ya efodi.

²⁰ Yaapangattho emphete ddimodda piilli ddagolide nave yaaddimakellella muhito mwiwa, muhoollo mwiwa mwa malaamba meelli a vamathurini a efodi vakhuviru ni laamba oolluwiwa mweerusoolle.

²¹ Sika yaamakella emphete dda yoowara ya vakhakaddaneeyo o emphete dda yoowara ya efodeelle ni mukwe wabululu wi yoowara ya vakhakaddaneeyo ekhalle vaddullu va laamba oolluwiwa mweerusoolle nave wi yoowara ya vakhakaddani emakellelliwe phaama o yoowara ya efodi moollikana ni mmo Apwiya yamulamulelliiwa Mose.

Mapangello a ddoowara ddimodda dda allupa mukutho

²² Yaasowa mukanjo wa ekuwo yabululu woowara muwari mwa yoowara ya efodi.

²³ Variyari viwa va mukanjooyo yaahiya mulliha wookwakhwana ovollochihavo muru. Mulliha yoolla waasowiwa moollipiha moowaapheella mutthemwene wonanko nikohi na malaya wi mukanjoolla ohaahuwe.

²⁴ Moominika mwiwa, muhito mwa mukanjooyo yaapanga ddeko wonanko ezipaso dda makangaza. Ddaakhalla dda mapururu abululu, ooreera oofiira ni oofiira navettho ddabafuta aphaama waapheella mukanjo muttheenooyo.

²⁵ Yaapangattho mabelo agolide aphaama nave yahaahiya variyari va makangaza muhito mwa mukanjo.

²⁶ Sika vaakhalla nikangaza nimodda va arive belo waapheella moominika mutthemwene mwa mukanjo oyo allupa mukutho yawariiwa voorumeyellani moollikana ni mmo Apwiya yamulamulelliiwa Mose.

²⁷ Vano Aroni ni anaaye yaasowelliwa malaya,

²⁸ enduwira, ezikofiya ni makabudula, ddittheddenennddo ddoosowiwa ni ekuwo yabafuta aphaama.

²⁹ Yaasowattho laamba a bafuta aphaama ni a mapururu a bululu, oofiira ni ooreera oofiira nave oopetiwa mweeruso moollikana ni mmo Apwiya yamulamulelliiwa Mose.

³⁰ Nave yaapanga malluwa agolide aphaama wunchichi. Navettho yaagoba wonanko echidindo mawu awi, “Yoovelleelliwa wa Apwiya.”

³¹ Yaamakellella ni mukwe wabululu o enduwira ya Aroni nave naakhalla muhoollo mwa enduwireeyo moollikana ni mmo Apwiya yamulamulelliiwa Mose.

Omalliha wa musasa wamutthukumano

³² Vano mutteko muttheene wootthipella musasa wamutthukumano waamalla. Aisraele yaheera ddittheddene moollikana ni mmo Apwiya yamulamulalliiwa Mose.

³³ Vatulli viwa yaawaana ddittheddenennddo wa Mose, ekuwo dda musasa ni ezipangizo ddiwa ddittheddene, engowi ddiwa, meto ddiwa, machengwiiwa, apotwiiwa ni matthipellwiiweene.

³⁴ Yaawaanattho echirona ya mattapara awoollowa a nankhoro a enkhosa ooruweyiwa mu otooto woofiira, echirona ya mattapara mamodda awoollowa, ekatani yootchingana,

³⁵ nibokosi na echipangano ni ekopo ddiwa navettho yookhuneellaniiwa.

³⁶ Yaawaanattho tebulo ni ezipangizo ddiwa, buledi oopatuleyella wa Mulluku,

³⁷ yoohiyavo enyali yagolide aphaama wunchichi, enyali ddiwa ni ezipangizo ddiwa, makhura a enyali,

³⁸ nikuwa nagolide, makhura oozozella, lubani* a nthuko naphaama, ekatani yoowallana va mullako wa musasa wamutthukumano,

³⁹ nikuwa namukuwa ni echiwayiiwa, ekopo ddiwa ni ezipangizo ddiwa ddittheddene navettho nibeseni noohapella ni marwiiweene,

⁴⁰ ekuwo ya mpanda wa nthato, apoto ni matthipellwiiwa, ekatani ya mullako wa nthato ni mikwe ddiwa ni ekhomo ddiwa navettho ezipangizo ddittheddene ddoorumeyellana mu musasa wamutthukumano.

⁴¹ Yaawattho ni ddoowara ddaphaama wunchichi dda athu oorumeyella munipuroni noopatuleya navettho ddoowara ddoopatuleya dda Aroni ni dda anaaye wi ekhalle allupa mukutho.

⁴² Sika Aisraele yaheera ddittheddene moollikana ni mmo Apwiya yamulamulelliiwa Mose.

⁴³ Vano Mose ahoona ddittheddene ddapangiwennddo nave aasimikizella wi yaaddipanga moollikana ni mmo Apwiya yalamulelliiwa. Sika Mose ahaadalisa athu attheenaayo.