Eksodo 37 - Mawu a Mulluku

Mapangello a nibokosi na echipangano

¹ Vatulli viwa Bezalele aapanga nibokosi na matabwa akesha. Orekama wiwa waari masentimita 114, okhuveya wiwa waari masentimita 69 navettho oya muddullu wiwa waari masentimita 69.

² Aahuruwella ni golide aphaama wunchichi muwari mwiwa ni otte wene. Nave ahaapheelliha mukoko wagolide.

³ Aapanga emphete ddisese ddagolide ddootukhullella nibokosinno nave aamakellella emphetennddo omasitandiniiwa masese, nngu piilli nngu piilli.

⁴ Aapangattho ekopo ddakesha nave ekoponnddo aaddihuruwella ni golide,

⁵ Nave ekoponnddo aaddiherera mu emphetennddo va embali piilli dda nibokosinno wi etukhullekena.

⁶ Yookhuneella ya nibokosinno aayipanga ni golide aphaama wunchichi, orekama wiwa waari masentimita 114 nave okhuveya wiwa waari masentimita 69.

⁷ Golide a mukhwipi vaddullu va yookhuneelleeyo aamuhana nave aapanga akerubi* eelli,

⁸ mmodda nngu ni mmoddattho nngu. Sika akerubaayo yaakhalla oovenyera va golide a va yookhuneelleeyo.

⁹ Muuphello a akerubaayo ahaattaphurusella muddullu va yookhuneelleeyo. Akerubi yaakhalla moowehana, arive kerubi aweha vatthi va yookhuneelleeyo.

Mapangello a tebulo a buledi oopatuleya

¹⁰ Aapanga tebulo a matabwa akesha, orekama wiwa waari masentimita 91, okhuveya wiwa waari masentimita 46, oya muddullu wiwa waari masentimita 69,

¹¹ Sika aahuruwella ni golide aphaama wunchichi. Nave ahaapheelliha mukoko wagolide owanoni wa nikuwanno.

¹² Golidooyo aari wonanko eferemu mukhwipi mwa tebulo, oramballalla waye waari wonanko orekama wa nnatta.

¹³ Aapanga emphete ddisese ddagolide nave aaddimakellella o makona masese a meto ddiwa ddisese.

¹⁴ Emphete mwahereriwe ekopo ddoomutukhullellana tebulo ddaamakellelliwa vakhuviru ni eferemu yatebulweeyo.

¹⁵ Aapangattho ekopo ddakesha ddoomutukhullellana tebulo nave ekoponnddo eddihuruwelle ni golide.

¹⁶ Aapangattho eziwiya dda vatebuloni monga embale, ebakuli, mino ni mabeseni oopaalleya va ddoovelleella dda ddoowirya. Ddittheddenenndda ddaari dda golide aphaama wunchichi.

Mapangello a yoohiyavo enyali

¹⁷ Aapanga yoohiyavo enyali ya golide aphaama wunchichi. Nthimwa niwa, mwiirukulluni mwiwa, makapwiiwa ni ddooreerihella ottaphullella wi malluwa ni murwiiwa ddittheddenennddo ddaahaniwa ovenyera va mukoko wagolide mmoddave.

¹⁸ Vaddullu va erukullwiiwa vaakhalla enthambi dditthanu ni emodda, ddiraru erive embali.

¹⁹ Erive enthambi ya enthambi dditthanu ni emodda yaakhalla ni malluwa mararu ni miru ddiwa. Malluwaalla yaari wonanko a muteekho wa manangwa.

²⁰ Erukullu ya enyaleeyo yaakhalla ni malluwa masese ni miru ddiwa. Malluwaalla yaari wonanko a muteekho wa manangwa.

²¹ Mararu mwa malluwa masesaalla yaphuwalle vatthi va voomellella enthambi.

²² Yoohiyavo enyali ettheeneeyo opwesereravo enthambi ni malluwa addihanille ovenyera va mukoko wagolide aphaama mmoddave.

²³ Aapanga enyali dditthanu ni piilli dda yoohiyavo enyali. Ezipangizo dda enyaleeyo, ddoopanella ddeko ni embale, ddaari dda golide aphaama wunchichi.

²⁴ Yoohiyavo enyaleeyo ni ezipangizo ddittheddene addipangille ni golide aphaama oollemella makilogaramu 34.

Mapangello a nikuwa nawoosellavo lubani

²⁵ Aamaka nikuwa nawoosellavo lubani nave naari na matabwa akesha. Orekama wiwa masentimita 46 nave okhuveya wiwa masentimita 46 navettho masentimita 91 oya muddullu. Manyakiiwa yapangiwe ni ntabwa nimoddave.

²⁶ Onihuruwelle ni golide aphaama wunchichi vaddullu viwa, mukhwipi mwiwa musese mutthemwene ni va manyakiiwaayo. Nave ahaapheelliha mukoko wagolide owanoni wa nikuwanno.

²⁷ Va embali piilli ddoowehana, vatthi va mukoko wagolide wowaapheellooyo, aapanga emphete piilli ddagolide. Ekopo ddootukhullella nikuwanno ddaahereriwa mu emphetennddo.

²⁸ Ekopo ddenndda ddaari dda kesha nave aaddihuruwella ni golide.

Mapangello a makhura oozozella ni lubani

²⁹ Aapangattho makhura oopatuleya oozozella navettho lubani na nthuko naphaama wonanko muthu oopanga ddawunkhella.