Eksodo 36 - Mawu a Mulluku

¹ “Nave Bezalele, Oholiyabu ni athu eeruso attheene ayo Apwiya yaavahilliiwa eruso ni ezeru ddoodduwella opanga ddoopaalleya ddittheddene ddoomakella musasa wamutthukumano, eneeropanga ddittheddene moollikana ni mmo Apwiya yalamulelliiwa.”

Athu enawa ni ddoovelleella ddawaata

² Vano Mose aawiithana Bezalele, Oholiyabu ni athu eeruso attheene ayo Apwiya yaavahilliiwa ezeru nave yapaallille ni murimiiwa muttheene okavihera.

³ Nave Mose aanawinnya ddoovelleella ddittheddene ddoomakella musasa wamutthukumano nnddo Aisraele yawiilleewena. Koma Aisraelaayo mwa opaalla wiwa yaavirellella ovelleella wa Mose orive ohinase.

⁴ Vano athu eeruso attheene ayo yaphara mutteko woomakooyo, yaahiya mitteko ddiwa,

⁵ emulleella Mose wi, “Athu enimavirellella owaana ddoovelleella ddinchichi okhwaranya mmo ddinapaalleyelliiwa va mutteko oyo Apwiya yanilamulelliiwa.”

⁶ Sika Mose ahaalamula athu m'misasani mutthemwene wi, “Arive mullopwana apaalle mutthiyana ahivirellelle ovelleella o mutteko woomakooyo.” Sika athu yaahiya owaana.

⁷ Nnddo yadditthukumanihalliiwa ddahaata okhwaranya nnddo ddapaalleya wi emallihe muttekooyo.

Ootthipella musasa wamutthukumano

⁸ Sika athu eeruso attheene variyari va oophara mutteko yaatthipella musasa wamutthukumano voopharihani mutteko ekuwo ddabafuta aphaama khumi navettho ni ekuwo ddabululu, ddooreera ddoofiira ni ddoofiira. Ekuwo ddenndda yaaddipeta phaama ni ezithuzi dda akerubi.*

⁹ Erive ekuwo yaari yoorekama mamita 13 nave okhuveya wiwa waari mamita meelli. Ekuwo ddittheddenennddo ddaari ddoophwanaphwana wunnuwa wiwa.

¹⁰ Yaallundellella ekuwo dditthanu voosowani wi ddikhalle ekuwo emodda nave yaheerattho emoddamoddave yeeyo ni ekuwo dditthanu ddimoddannddo.

¹¹ Yaapanga makwelelo akuwo yabululu mukhwipi mwa ekuwo. Yaheerattho emoddamoddave yeeyo ni ekuwo emoddeeyo.

¹² Sika yaasowella makwelelo 50 mukhwipi mwa ekuwo yawaambeeyo nave makwelelo 50 mamodda va ekuwo yaneepiilleeyo wi makwelelwaayo ekhalle moowehana.

¹³ Nave yaapanga engowi 50 ddagolide ddoollundellellana ekuwo piillinnddo nave musasooyo waakhalla mmodda.

¹⁴ Yaapangattho ekuwo khumi ni emodda ddamapururu eepuri nave ddaakhalla echirona yoothunyellana vaddullu va musasooyo.

¹⁵ Erive ekuwo orekama wiwa waari mamita 14 nave okhuveya wiwa waari mamita meelli. Ddittheddenennddo ddaari ddoophwanaphwana.

¹⁶ Yaasowa ekuwo dditthanu nave ddaakhalla ekuwo emodda nave dditthanu ni emoddeeyo ddaakhallattho ekuwo emodda.

¹⁷ Sika yaasowella makwelelo 50 mukhwipi mwa ekuwo yawaambeeyo nave makwelelo 50 mamodda va ekuwo yaneepiilleeyo.

¹⁸ Nave yaapanga engowi 50 ddamukuwa ddoollundellellana ekuwo piillinnddo nave echironeeyo yaakhalla emodda.

¹⁹ Yaapanga echirona ya mattapara awoollowa a nankhoro a enkhosa ooruweyiwa mu otooto woofiira nave echirona emodda ya mattapara mamodda awoollowa.

²⁰ Yaapanga meto dda matabwa akesha a musasooyo.

²¹ Nirive ntabwa orekama wiwa waari mamita masese ni hafu nave okhuveya wiwa waari masentimita 69.

²² Nirive ntabwa naari ni misomali miilli ddamatabwa ddoollundellellana matabwa nave matabwa mattheene yapangiwe mwawi ddiidda.

²³ Yaapanga matabwa 20 embali yoomwera,

²⁴ Nave yaapanga matthipello 40 asiliva wi etthipellemo matabwa 20. Vatthi va nirive ntabwa vaakhalla matthipello meelli a misomali miilli ddamatabwanndde.

²⁵ Nave embali yoompoto wa musasooyo yaapangattho matabwa 20,

²⁶ ni matthipello 40 asiliva, meelli va ntabwa nimodda.

²⁷ Okhote wiwa wa musasooyo, woovollowa nndduwa, yaapanga matabwa matthanu ni nimodda,

²⁸ Okhote wa musasooyo, va ekona, vaakhalla matabwa meelli.

²⁹ Matabwa a va konaalla yaallundellelliwa waambeella vatthi ophiyera vaddullu. Mmu sika yakhallelliiwa matabwa meelli ayo yapangille makona meelli.

³⁰ Sika okhotenko waakhalla matabwa matthanu ni mararu ookhalla ni matthipellwiiwa 16 asiliva, meelli vatthi va ntabwa nimodda.

³¹ Yaapanga ekopo ddakesha dditthanu nave ddaakhalla machengo va matabwa a embali emodda ya musasa,

³² ni dditthanu ddimoddattho va matabwa a embali emodda. Vaakhallattho ekopo dditthanu va matabwa woovollowa nndduwa, embali yookhote.

³³ Nchengo na variyari naari variyari va machengo ooddullu ni avatthi nave naambeelle o makomihello ophiya o makomihello mamodda.

³⁴ Matabwaayo yahaahuruwella ni golide nave yaapangattho emphete ddagolide nave emakella vamodda matabwaayo ni ekoponnddo nave ekoponnddo ddaakhalla ddoohuruwelliwa ni golide.

³⁵ Yaasowa ekatani yabululu, yooreera yoofiira ni yoofiira navettho yabafuta aphaama. Nave ekataneeyo yaayipeta phaama ni ezithuzi dda akerubi.

³⁶ Yaayitthomeya va apoto asese akesha oohuruwelliwa ni golide, ookhalla ni engowi ddagolide nave ookeraattheya va matthipello masese asiliva.

³⁷ Va mullako wa musasa yaahiyavo ekatani yoowallana yabululu, yooreera yoofiira, yoofiira, yabafuta aphaama navettho yoopetiwa mweeruso.

³⁸ Yaayitthomeya va apoto atthanu ni engowi. Yaahuruwella etthoka dda apoto ni ekopo ddiwa ni golide koma matthipellwiiwa matthanu yaari a mukuwa.