Eksodo 35 - Mawu a Mulluku

Malamulo a nllapo na Sabata

¹ Mose aawiithana Aisraele attheene aalleella wi, “Apwiya enimuulamulani wi,

² Muthu aphareke mitteko ddaye ddittheddene mallapo matthanu ni nimodda koma nllapo naneetthanu ni piilli tti na Sabata nawiithuuwa, nllapo noopatuleya na Apwiya. Arive muthu oophara mutteko va nllapo nenna iiphiwe.

³ Va Sabata muhikhariheke naari munllo mpa mwanyu.”

Ddoovelleella ddoomakella musasa wamutthukumano

⁴ Mose ahaalleella Aisraele attheenaalle wi, “Apwiya enimuulamulani wi,

⁵ ‘Muweekena ddoovelleella wa Apwiya. Sika arive muthu oyo anapaalla ovelleella ni murimaaye muttheene aweena ddeko wonanko golide, siliva, mukuwa,

⁶ ekuwo ddabululu, ddooreera ddoofiira, ddoofiira, ekuwo ddabafuta aphaama, ekuwo ddawoopiwa ni mapururu eepuri,

⁷ mattapara awoollowa a nankhoro a enkhosa ooruweyiwa mu otooto woofiira, mattapara mamodda awoollowa, matabwa akesha,

⁸ makhura a enyali, ddawunkhella dda makhura oozozella navettho lubani* na nthuko naphaama,

⁹ malluku aphaama a onikisi navettho malluku mamodda oohiya va yoowara ya efodi* ni va yoowara ya vakhakaddani.’ ”

Ezipangizo dda musasa wamutthukumano

¹⁰ “Athu attheene eeruso ewe wi epange ddittheddene Apwiya elamulalliiwa.

¹¹ Emake musasa wamutthukumano wa Apwiya, musasooyo ni echironiiwa, engowi ddiwa, meto ddiwa, machengwiiwa, apotwiiwa ni matthipellwiiweene.

¹² Epangettho nibokosi na echipangano ni ekopo ddiwa, yookhuneellaniiwa ni ekatani yootchinga,

¹³ tebulo ni ekopo ddiwa vamoddattho ni ezipangizo ddiwa ni buledi oopatuleyella wa Mulluku,

¹⁴ yoohiyavo enyali ni ezipangizo ddiwa, enyali ddiwa ni makhura a enyalinnddo,

¹⁵ nikuwa nawoosellavo lubani ni ekopo ddiwa, makhura oozozella, lubani a nthuko naphaama navettho ekatani yoowallana va mullako wa musasa wamutthukumano wa Apwiya.

¹⁶ Epangettho nikuwa na mukutho wooshellelliha ni mukoko wa echiwaya yamukuwa yookhalla wonanko esefa, ekopo ni ezipangizo ddiwa, nibeseni noohapellamo ni marwiiwa,

¹⁷ ekuwo ya mpanda wa nthato, apoto ni matthipellwiiwa, ekatani ya mullako wa nthato,

¹⁸ ekhomo ni mikwe dda musasa wamutthukumano wa Apwiya ni dda nthato,

¹⁹ ddoowara ddaphaama wunchichi dda athu oorumeyella munipuroni noopatuleya navettho ddoowara ddoopatuleya dda Aroni ni dda anaaye enaawarekiiwa voorumeyellani.”

Athu enawa ni ddoovelleella

²⁰ Sika Aisraele attheene yaavenyavo emuhiya Mose.

²¹ Nave arive muthu, moollikana ni mmo murimaaye muttheene wapaallelliiwa, aawa wa Apwiya ni ddoovelleella ddoomakella musasa wamutthukumano ni ddoopangella ezipangizo ddiwa ddittheddene owaakattho dda ddoowara ddoopatuleya.

²² Nave yaawa allopwana ni atthiyana, attheene mwa opaalla wiwa yaawaana endolo, emphete, ogufu wamukohi ni ddooreeriha ddimodda ddagolide nave yaaddivelleella wa Apwiya.

²³ Arive muthu aari ni ekuwo ddabululu, ddooreera ddoofiira, ddoofiira, ekuwo ddabafuta aphaama, ekuwo ddamapururu eepuri, mattapara awoollowa a nankhoro a enkhosa ooruweyiwa mu otooto woofiira ni mattapara mamodda awoollowa, yaawaana wa Apwiya.

²⁴ Athu attheene ayo yaari ni siliva apaalle mukuwa, yaavelleella wa Apwiya. Attheene yaari ni matabwa akesha, oopharihella muttekooyo, yaawaana.

²⁵ Atthiyana attheene eeruso yaapanga olusi wabululu, woofiira vang'ono ni woofiira. Yaawaanattho olusi wabafuta aphaama.

²⁶ Atthiyana attheene eeruswaayo yaapangattho olusi wamapururu eepuri.

²⁷ Nave oohoollella yaawa ni malluku aphaama a onikisi ni malluku mamodda oohiya va yoowara ya efodi navettho va yoowara ya vakhakaddani.

²⁸ Yaavelleellattho ddeko ddawunkhella, makhura a enyali, makhura oozozella navettho lubani na nthuko naphaama.

²⁹ Sika Aisraele attheene, allopwana ni atthiyana, ayo yavelleella mwa opaalla wiwa o mutteko oyo Apwiya yalamulalliiwa oweella mwa Mose, yaawa ni ddoovelleella ddiwa wa Apwiya.

Bezalele ni Oholiyabu

³⁰ Vatulli viwa Mose ahaalleella Aisraele wi, “Apwiya aamutthoolla Bezalele mwaana a Uri, edduullu ya Huri, a nlloko na Yuda.

³¹ Apwiya aamuvaha olliyoolla munepiiwa mwawi ookhalla ni eruso, ezeru ni odduwella phaama mitteko ddittheddene ddeeruso monga

³² ojambula mapulani a mitteko ddeeruso ni ophara mitteko ni golide, siliva ni mukuwa,

³³ ogoba malluku, ogoba miteekho ni weera ddeeruso ddittheddene.

³⁴ Nave Apwiya yaamuvaha ezeru olliye ni Oholiyabu mwaana a Ahisamaki, a nlloko na Dani wi yaahuddiheke amodda erusweeyo.

³⁵ Alliwaalla aavahiwa eruso yuullupalli wi ephare mitteko ddittheddenenndda wonanko athu oogoba, oojambula mapulani ni awoopa ekuwo ddabafuta aphaama, dda bululu, ddooreera ddoofiira ni dda nthoche naphaama. Ennadduwella ophara mitteko ddittheddene nave ennawora ojambula mapulani a mitteko ddittheddene ddeeruso.