Eksodo 34 - Mawu a Mulluku

Malluku meelli mamodda

¹ Apwiya yaamulleellattho Mose wi, “Oseme malluku mamodda wonanko meelli akhallaalle wi kilembevo mawu alle yaari va malluku awaamba waapwesilleewaalle.

² Okhozeke ohinase, owelle mwaango wa Sinai wi okumane ni miyaano vaddullu vamwaangonimvo.

³ Ohiwe ni arive muthu nave arive muthu ahooneye vamwaangonimvo. Eziweto ddihiche vakhuviru ni mwaangooyo.”

⁴ Sika Mose aasema malluku mamodda meelli wonanko awaambaalle nave ohinase aawella mwaango wa Sinai akusalle malluku meellaalle moollikana ni mmo Apwiya yamulamulelliiwa.

⁵ Apwiya yaakittha m'muraponi yiimella ni Mose nave yaaromolla nnddina niwa nawi Apwiya.

⁶ Apwiya yaavira vakhuviru ni Mose ekhuwaka wi, “Apwiya, Apwiya Mulluku eechifundo ni ooreera murima, oohisha murima mwawaakuva, ooddalla ni echikondi yoohisintheya ni oororomelleya.

⁷ Alliwa tti eechikondi wa mibado ddooheerengeya nave tti ookhululukella ddoolakwa, ddoonanara ni machimo. Koma tti oohihiyerera oochimwa nave ennaallaka anamwani ni edduullu ekaamba ya machimo a makhollwiiwa ophiyera mbado waneeraru ni waneesese.”

⁸ Vano Mose ahaakuva, aakokhora, allapella enthawi yeeyo.

⁹ Sika aallota wi, “Apwiya, mwaarimi mukeerelle echifundo, kinimuuvekani wi muthaanane ni hiyaano. Athwaalla tti awumma murima koma pepaani munikhululukelle ddoolakwa ddahu ni machimwaahu nave munaakhelle hiyaano wi nikhalle athwaanyu.”

Okeraatthihattho echipangano

¹⁰ Vatulli viwa Apwiya yaallota wi, “Kineerokeraatthiha echipangano ni nyuwaano. Kineereweera ddoottikhiniha dduullupalli variyari va athu attheene, nnddo ddihineereyekevo khalle va ellapo yavatthi ettheene variyari va mitundu ddimodda ddittheddene. Athu attheene ayo eri ni weyaano eneerewoona nnddo mi Apwiya kineereemi, kaambiiwa nnddo kineereemi oweella mwa weyaano tti ddoottikhiniha.

¹¹ Mwiiwellelleke malamulo alla kuulamulelleemi ollellwaalla. Kineerowiikariha Aamori, Akanani, Ahiti, Aperezi, Ahivi ni Ayebusi.

¹² Moonesese wi muhikeraatthihe echipangano ni athu a ellapo eyo munayaanyunko woova wi ttuukhalla musampha wawuuchimwihani.

¹³ Mwakumulle makuwiiwa, moononge mallukwiiwa oopatuleya nave mwakakathe mafanwiiwa a Asherimu.

¹⁴ “Muhillapelleke milluku ddimodda, ekaamba yawi Apwiya ayo nnddina niwa tti Nahache, tti Mulluku eehache.

¹⁵ Muhikeraatthiheke echipangano ni athu a ellapo yeeyo kaambiiwa yaachimwaka voollapellani milluku ddiwa ni ovelleella mikutho apaalle ttuuwiithanani wi muchena yoocha ya mikutho ddiwannddo.

¹⁶ Apaalle aniinyu aallopwana ttuuwaatthella atthiyana eelleto. Sika atthiyana yaalla yaachimwaka voollapellani milluku ddiwa, eneerewaakopa aniinyu aallopwana wi ellapelleke milluku ddiwannddo.

¹⁷ “Muhiipangelle milluku dda mikoko.

¹⁸ “Mukhalleke ni Ehakallallo ya Buledi oohikhalla ni yisiti moollikana ni mmo kuulamulelleemini. Mumucheke buledi oohikhalla ni yisiti wa mallapo matthanu ni meelli mu mweeri wa Abibu kaambiiwa tti mweeri oyo mwakhumalleenyu o Iguputo.

¹⁹ “Arive mwaana aamullopwana awaamba tti aaka navettho arive mwaana awaamba a eziweto ddittheddene.

²⁰ Koma mwaanabulu aamullopwana awaamba, mumoopolleke voomwaakakhanihani ni mwaanaankhosa. Koma mwahipaallaka omoopolla, mumunyokotholleke nikohi. Mumoopolleke arive mwaana aamullopwana awaamba. “Arive muthu ahiphiyeke vakhuviru ni miyaano ari mattave.

²¹ “Muphareke mitteko ddanyu wa mallapo matthanu ni nimodda koma va nllapo naneetthanu ni piilli muhiphareke mutteko naari enthawi yoollima apaalle yoohata.

²² “Mukhalleke ni Ehakallallo ya Milungu, Ehakallallo ya Ddoohata Ddawaamba nave mukhallekettho ni Ehakallallo Yotthukumaniha Ddoohata ddittheddene va omalla wa muyakha.

²³ “Allopwana attheene yooneyelleke vamiitthoni va mi Apwiya Mulluku a Aisraele, oraru vamuyakhani.

²⁴ Vawi kineerowiikariha mitundu ddimoddannddo nyuwaano mwaaphiyaka nave kineerewunnuwiha malire a ellapwaanyu. Khaavo naari mmodda anaapaalle waakha ellapwaanyweeyo va enthawi eyo mwaawooneyellaka vamiitthoni va mi Apwiya, oraru vamuyakhani.

²⁵ “Mwaavelleellaka mukutho wa enama wa miyaano, muhivelleelleke ni buledi ookhalla ni yisiti. Erive enama yaawiiphella mukutho wa Paska, muhiyisunge ophiyera ohinase.

²⁶ “Muweekena ddeko ddaphaama wunchichi dda ddoohata ddanyu ddawaamba dda m'matani mwanyu, onipuroni na mallapello na Apwiya Mullukwaanyu. “Muhaapeyeke enama ya musaana a epuri apaalle a enkhosa voopharihellani mutteko mukaka wa amennya.”

²⁷ Apwiya yaamulleellattho Mose wi, “Lemba mawaalla, ekaamba yawi moollikana mawu yaalla, kinnakeraatthiha echipangano ni weyaano ni Aisraele attheene.”

²⁸ Sika Mose aakhalla ni Apwiya wenko mallapo 40, otthaana ni mahiiyu ohicha apaalle owirya erive ello. Nave aalemba vamallukunaalle mawu mattheene a echipangano, sika malamulo khumi.

Mose anakittha ovenyera omwaangoni wa Sinai

²⁹ Mose akitthalleeye ovenyera o mwaango wa Sinai akusalle malluku meelli a echipangano, khaadduwellille wi ekhovaaye yaawala kaambiiwa aallota ni Apwiya.

³⁰ Aroni ni athu attheene emuwehille Mose, yahoona wi ekhovaaye tti yoowala sika yahoova omwaatamella.

³¹ Koma Mose aawiithana nave Aroni ni oohoollella a Aisraele ewiille wa olliye, ahaamba waallotiha.

³² Vatulli viwa Aisraele attheene yaawa vakhuviru nave Mose ahaavaha malamulo mattheene ayo Apwiya yamulleelliiwa o mwaango wa Sinai wulle.

³³ Mose amallihalle ollota, aahiya yawiikhuneella va ekhovaaye.

³⁴ Enthawi ddittheddene Mosooyo avollowa m'musasani wa ophwanyeya wa Apwiya, aanakhunuulla yawiikhuneellaneelle va ekhovaaye ophiyera akhumalle. Vano akhuma, aanaalleella Aisraele ddittheddene Apwiya emulamulalliiwa wi allote.

³⁵ Nave athwaayo yaanoona wi ekhovaaye tti yoowala koma olliye aaniikhuneellattho ekhove ophiyera enthawi emodda yawi ayettho allote ni Apwiya.