Eksodo 33 - Mawu a Mulluku

Apwiya enaalamula Aisraele wi evenyewo omwaangoni wa Sinai

¹ Vano Apwiya yaamulleella Mose wi, “Ovenyewo wuno ni athu ayo waakhumihalleewe o Iguputo nave oye o ellapo eyo kallupenlleemi wi kineeromuvaha Abrahamu, Isaki ni Yakobo voollotani wi, ‘Ellapo yeella kineeroyivaha wa edduullu ddanyu.’

² Kineeromuruma mungelo vahoollo vawo nave kineerowiikara Akanani, Aamori, Ahiti, Aperezi, Ahivi ni Ayebusi.

³ Khaweni o ellapo yooddalla mukaka ni enwi. Koma miyaano ngithaananana kaambiiwa nyuwaano tti athu awumma murima nave miyaano ttuuwoonongani m'musewuni.”

⁴ Sika athu yiiwalliiwa mawu awoopihaalle, yahaamba winlla nave khaarivo naari mmodda awarille ddawiireerihana.

⁵ Sika Apwiya yaari emulleellille Mose wi, “Alleelle Aisraelaayo wi, ‘Nyu tti athu awumma murima. Kathaananilleke ni nyuwaano naari va enthawi yooyeva, ddaano kiwoonongilleni attheene. Vano rullani ddawiireerihana ddanyu nave kineerewoona yawi kiweereni.’ ”

⁶ Sika ovenyera o mwaango wa Horebu Aisraele kheyaawarattho ddawiireerihana.

Musasa wa ophwanyeya wa Apwiya

⁷ Mose aakusa musasa woopatuleya aya awutthipella otte wa misasa wuuteete vang'ono. Sika aawuvaha musasooyo nnddina nawi, “Musasa wa ophwanyeya wa Apwiya.” Arive muthu apaalla okoha ello wa Apwiya aanakhumawo omisasaninko aya o musasa wa ophwanyeya wa Apwiya.

⁸ Enthawi ddittheddene Mose aayaaka omusasaninko, athu attheene yaaniimella m'millakoni mwiwa enamuweha ophiyera avollowille.

⁹ Mose avollowille mumusasani mulle, opoto amurapo aanakittha atiitha vamullakoni va musasooyo nave Apwiya yaanallota ni Mose ovenyera m'muraponimmo.

¹⁰ Nave athu yoona murapooyo vamullakoni wa musasooyo, attheene yaanakokhora ni ollapella vamullakoni va misasa ddiwa.

¹¹ Sika Apwiya yaanallota ni Mose vamiitthoni ni vamiitthoni, wonanko mmo muthu anallotelleeye ni mukhwaaye. Nave vatulli viwa Mose aanahokollweella omisasani. Koma musombwe mmodda nnddina naye Yoswa, mwaana a Nuni, oyo aari oomukavihera Mose, khaavenyawo.

Lonjezo nawi Apwiya eneerokhallavo

¹² Mose ahaalleella Apwiya wi, “Mookhalla mukilleellaka wi kaahoollelle athwaalla o ellapweeyo koma khemukilleelle oyo munaamurumeenyu wi athaanane ni miyaano. Komave moollota khalle wi, ‘Kinnuudduwella phaama nave kooweerella echifundo.’

¹³ Vano mwaarimi mukeerelle echifundo koonihelleni ettilla ddanyu wi kuudduwelleni nave wi muvirellelle okeerella echifundo. Muupuwellettho wi mutundoolla tti waanyu.”

¹⁴ Nave Apwiya yaallota wi, “Mi kineerothaana ni weyaano nave kineerewuuvaha murendelle.”

¹⁵ Nave Mose ahaalleella Apwiya wi, “Mwaahithaanana ni hiyaano, muhinaakhullelle wi nivenyevo mva.

¹⁶ Ethiyo ddinaadduwanyeye mwawiidde wi mookeerella echifundo ni athwaanyu mwaahithaanana ni hiyaano? Mwathaanana ni hiyaano ddineeronihiyaniha ni athu amodda attheene a va ellapo yavatthi.”

¹⁷ Vano Apwiya yaamulleella Mose wi, “Kineereweera moollikana ni mmo ollotilleewe ekaamba yawi kooweerella echifundo ni weyaano nave kinnuudduwella phaama.”

¹⁸ Nave Mose ahaaveka Apwiya wi, “Pepaani mukoonihe ntitimiho nanyu.”

¹⁹ Vano Apwiya yahaakhulla wi, “Kineerowooniha oreera murima waka ottheene nave kineeroromolla nnddina naka nawi Apwiya vamiitthoni vawo. Kineeromweerella echifundo arive muthu kinapaalleemi omweerella. Nave kineerommorella ethakaraka arive muthu kinapaalleemi oommorella.”

²⁰ Apwiya yaavirellella ollota wi, “Koma khowora woona ekhovaaka, ekaamba yawi khaavo anaawore okoona miyaano ni okhalla ni okumi.”

²¹ Nave Apwiya yaavirellella ollotattho wi, “Ngoona, vakhuviru ni miyaano, vookhalla nipuro vanllukuni wi wiimellevo.

²² Sika ntitimiho naka naaviraka, kineerewuuhiya m'muttharini mwa nlluku nave kineerewuukhuneella ni nnatta naka ophiyera kiviralle.

²³ Vatulli viwa kineerovenyihavo nnatta naka nave oneerokoona omutthanani koma ekhovaaka khoyoona.”