Eksodo 32 - Mawu a Mulluku

Musaanaang'ombe agolide

¹ Athu yoonille wi Mose oollekellawo omwaangoni wulle ahikitthakawo, yaatthukumana emwaapheella Aroni nave yaamulleella wi, “Noopelle mulluku awi anihoollelleke vawi khaninadduwella emweereyelle Mose, oyo anikhumihalle o Iguputo.”

² Sika Aroni ahaalleella athwaayo wi, “Arulleni awarinyu, aniinyu aallopwana ni aatthiyana endolo ddagolide ovenyera omaaruniiwa nave muweena wa miyaano.”

³ Vano athwaayo yaarulla endolo ddiwa ddagolide nave yaawaana wa Aroni.

⁴ Sika Aroni aamwaakhella golidooyo ovenyera wa athwaayo nave aamweeka, amoopa musaanaang'ombe mu echikombole. Nave athu yahaamba okhuwa wi, “Aisraele, olla sika mullukwaahu oyo anikhumihalle o Iguputo.”

⁵ Aroni oonilleeye ddenndda aamaka nikuwa vahoollo va musaanaang'ombe a golidooyo. Vano aallalleya wi, “Osiisello oneerokhalla ehakallallo yoowaatitimiha Apwiya.”

⁶ Sika osaka wene ohinase aavelleella mikutho ddooshellelliha ni mikutho ddeeyaattano. Nave athu yaayo yaakeraatthi wi eche ni owirya nave yaavenya yiina.

⁷ Vano Apwiya yaamulleella Mose wi, “Akuva, kittha mwaango vawi athwaawo waakhumihalleewe o Iguputwaalle aachimwa nave aakikhoota wunchichi.

⁸ Aahiya khalle mwawaakuva ddittheddene kaalamulelleemi wi eddeereke. Yooddoopella weekhiiwa musaanaang'ombe a golide aweeka nave enimamullapella ni omuvelleellella mikutho ni ollota wi, ‘Aisraele, olla sika mullukwaahu oyo anikhumihalle o Iguputo.’ ”

⁹ Nave Apwiya yaavirellella ollota wi, “Athu yaalla kinnaadduwella wi tti awumma murima.

¹⁰ Vano ohikivaanyihe wi kiwoononge athwaalla vawi koosha murima wunchichi koma weyaano kineerewuutthattusa mutundu muullupalli.”

¹¹ Koma Mose ahaapepesa Apwiya Mullukwaaye wi, “Nyu Apwiya kaambiiwa tini mwaashenlleenyu murima athwaanyu mwawi ddiidda, athu ayo mwaakhumihalleenyu o Iguputo ni masivaanyu uullupalli ni nnatta nanyu namasiva?

¹² Ethiyo munapaalla wi Aiguputwaayo elloteke wi, ‘Ahaakhumiha o Iguputo ni yoolinga yoonanara wi awiiphelle omiyaangoni ni waatthollosa va ellapo yavatthi?’ Hiyani owallaanyu wookhara wonanko munllooyo nave muhiwoononge athwaanyu.

¹³ Muupuwelle oorumeyellaanyu, Abrahamu, Isaki ni Yakobo navettho nndde mwallupenlleenyu mu nnddina nanyu wi, ‘Kineerewuuvahani edduullu ddinchichi, ddawaata wonanko etheneeri dda oddullu. Edduullu ddaanyunnddo kineeroddivaha ellapo ettheene eyo kalonjezilleemi wi ekhalle yayiwa wa enthawi yoohimalla.’ ”

¹⁴ Sika Apwiya yaasintha maganizwiiwa a ollaka wawoopiha nko yapaalliiwa oweerella athwiiwa.

¹⁵ Mose aahokollowa akittha ovenyera omwaangoni, akusalle malluku meelli a echipangano oolembiwa embali piilli ddittheddene.

¹⁶ Olla waari mutteko wa Mulluku nave ddoolembiwannddo alembille tti Mulluku mwaneena moogoba vamallukunimvo.

¹⁷ Nave Yoswa iiwalleeye athu ekhuwaka, aamulleella Mose wi, “Kinniiwa onyakulla wa ekhoto omisasani.”

¹⁸ Koma Mose ahaakhulla wi, “Onyakulla wenko khoniiweya wonanko onyakulla wa athu oopambana vakhotoni apaallettho winlla wa oogonjihiwa koma kiniiwa onyakulla wa machipo.”

¹⁹ Mose aphiyalle vakhuviru ni misasa ni woona musaanaang'omboolle ni athu awiina, aasha murima wunchichi. Ahaavokhella vatthi malluku yaari m'mattani mwayaalle, aapwesa museresere mwa mwaangoolle.

²⁰ Vano aamukusa musaanaang'ombe yamoopilliiwoolle, aamweeka, aamusilla wonanko othu nave aahella m'maaddini nave vatulli viwa ahaawiryiha Aisraele maaddaalle.

²¹ Nave Mose aamukoha Aroni wi, “Ethiyo athwaalla yaweerille ddawiidde ophiyera weyaano wi waachimwihe mwawi ddiidda?”

²² Aroni ahaakhulla wi, “Pepaani apwiya muhikishelle murima. Munnadduwellattho wi athu yaalla tti ookopeya ni machimo.

²³ Alliwaalla yaakilleella wi, ‘Noopelle mulluku awi anihoollelleke vawi khaninadduwella emweereyelle Mose, oyo anikhumihalle o Iguputo.’

²⁴ Sika kahaalleella wi, ‘Arive muthu oyo ari ni golide aweena wa miyaano.’ Nave oyo aarina ddeko ni golide aakivaha. Kaaddivokhella vamunlloni nave mwaakhuma musaanaang'ombe.”

²⁵ Mose ahoona wi athwaayo tti ookatamiha kaambiiwa Aroni ahaattumera ophiyera alliwaayo yaatthattuwa athu oovevulliwa vamiitthoni va adaniiwa.

²⁶ Mosooyo ahiimella vahoollo va misasa nave aakoha mookhuwa wi, “Ethiyo ttaani ari o embali ya Apwiya? Waani wuno wa miyaano.” Nave Alevi attheene yaatthukumana emwaapheella olliye.

²⁷ Nave Mose ahaalleella wi, “Apwiya Mulluku a Aisraele enallota wi, ‘Arive muthu a nyuwaano akuse nsupada naye nave eete m'misasani mutthemwene, erive embali nave amwiiphe mwanamunne apaalle mukhwaaye apaalle munasaaye.’ ”

²⁸ Alevaayo yaheera moollikana ni mmo Mose aalamulelliiwa nave allopwana 3,000 yahiiphiwa nllapo nenno.

²⁹ Vano Mose ahaalleella Alevaayo wi, “Ollellova mohiipatula weekhiinyu wi mukhalle allupa mukutho owaarumeyella Apwiya, voowiiphani aniinyu ni asinninyu. Sika Apwiya ahuudalisani ollello.”

³⁰ Osaka wene Mose ahaalleella athu wi, “Nyu mwaachimwa wunchichi. Koma vano kineerooya wa Apwiya omwaangoni nave kuuvekellellani apaalle eneerewuukhululukellani machimwaanyu.”

³¹ Vano Mose aahokollweella wa Apwiya allota wi, “Athwaalla yaachimwa wunchichi. Yahiipangella mulluku agolide.

³² Koma vano pepaani mwaakhululukelle machimwiiwa. Mwaahaakhululukella, pepaani muvenyihemo nnddina naka munibukhuni mmo mwaalembilleenyu manddina a athwaanyu.”

³³ Koma Apwiya yaamulleella Mose wi, “Yooyove akichimwelle miyaano, sika kinaavenyiheemi nnddina naye munibukhuni mwaka.

³⁴ Vano khawe waahoollelle athu onipuroni nko kuulleelleemi. Upuwella wi mungelwaaka sika anuuhoollelle koma nllapo ninimawa nno kinawaallakeemi ekaamba ya machimwiiwa.”

³⁵ Sika Apwiya yaarumiha ereta wa athwaayo ekaamba yawi yaamuwatihera Aroni wi aapangelle musaanaang'ombe agolide.