Eksodo 31 - Mawu a Mulluku

Ootthipella musasa wamutthukumano

¹ Apwiya yaamulleella Mose wi,

² “Koomutthoolla Bezalele, mwaana a Uri, edduullu ya Huri, a nlloko na Yuda.

³ Olliyoolla koomuvaha munepaaka mwawi ookhalla ni eruso, ezeru ni odduwella phaama mitteko ddittheddene ddeeruso monga

⁴ ojambula mapulani a mitteko ddeeruso ni ophara mitteko ni golide, siliva ni mukuwa,

⁵ ogoba malluku, ogoba miteekho ni weera ddeeruso ddittheddene.

⁶ Koomutthoollattho Oholiyabu, mwaana a Ahisamaki, a nlloko na Dani. Nave athu amodda attheene eeruso kohaavaha eruso ddinchichi ddaweera erive ello eyo kuulamulalleemi.

⁷ Emake musasa wamutthukumano, nibokosi na echipangano, yookhuneella ya nibokosi ni ezipangizo ddittheddene dda musasa wamutthukumano,

⁸ tebulo ni ezipangizo ddiwa, yoohiyavo enyali ni ezipangizo ddiwa, nikuwa nawoosellavo lubani,

⁹ nikuwa na mukutho wooshellelliha ni ezipangizo ddiwa, nibeseni noohapellamo ni marwiiweene,

¹⁰ ddoowara ddaphaama wunchichi ni ddoopatuleya dda Aroni ni anaaye enaawarekiiwa voorumeyellani,

¹¹ makhura oozozella navettho lubani* na nthuko naphaama na nipuro naweella. Epange ddittheddenenndda moollikana ni mmo kuulamulelleemi.”

Lamulo na nllapo na Sabata

¹² Apwiya yaamulleellattho Mose wi,

¹³ “Alleelle Aisraele wi, ‘Musungeke Sabata, kaambiiwa tti echizindikiro yoohimalla variyari va miyaano ni nyuwaano mu mibado ddanyu ddittheddene, yawooniha wi mi tti Apwiya, ayo kinuupatulani.

¹⁴ Sika musungeke Sabata, kaambiiwa tti noopatuleya wa nyuwaano. Arive muthu oohiisunga, iiphiwe. Arive muthu oophara mutteko va nllapo nenno avenyihiwe variyari va athwaaka.

¹⁵ Muthu aphareke mitteko ddaye ddittheddene mallapo matthanu ni nimodda koma nllapo naneetthanu ni piilli tti na Sabata nawiithuuwa, nllapo noopatuleya na Apwiya. Arive muthu oophara mutteko va nllapo nenna iiphiwe.

¹⁶ Aisraele ni mibado ddiwa ddittheddene ddamuhoollo esungeke na Sabata wonanko echipangano yoohimalla.

¹⁷ Ella tti echizindikiro yoohimalla variyari va miyaano ni Aisraele vawi mi Apwiya kaaphatusa oddullu ni ellapo yavatthi wa mallapo matthanu ni nimodda nave kahiithuuwa nave masiva yaahokollweellamo va nllapo naneetthanu ni piilli.’ ”

¹⁸ Apwiya emallihalle ollota ni Mose vamwaangoni wa Sinai, yaamwinnya malluku meelli a echipangano ayo Mulluku mwaneena alembilleeyevo khalle ni eyaallaaye.