Eksodo 29 - Mawu a Mulluku

Ozoziwa wa Aroni ni anaaye

¹ “Voomuzozani Aroni ni anaaye wi ekhalle allupa mukutho, okuse nankhoro a eng'ombe ni anankhoro a enkhosa eelli oohirakalla.

² Omukusettho buledi oohikhalla ni yisiti, buledi oohikhalla ni yisiti oottakanyihera ni makhura navettho buledi oohikhalla ni yisiti ooshashaalla oomara makhura. Ddenndda oddipange ni othu waphaama watirigu.

³ Oddihiye mu mutaanga nave oweena wa miyaano, mvo onavelleelleewe mukutho wa nankhoro a eng'ombe ni anankhoro a enkhosanndde.

⁴ “Oweena Aroni ni anaaye o mullako wa musasa wamutthukumano nave attheenaayo oweerihe wi ehape moopatuleya.

⁵ Sika okuse ddoowaranndde nave omuwarihe Aroni malaya, mukanjo muwari mwa yoowara ya efodi,* yoowara ya efodi, yoowara ya vakhakaddani nave ommakelle laamba a efodooyo.

⁶ Omuwarihe enduwira omuruni waye ni malluwa oopatuleyaalle vanduwiranimvo.

⁷ Sika okuse makhura oozozellaalle ni waahella vamuruni vaye wi omuzoze.

⁸ “Weera ddiiddo oweena anaaye nave waawarihe malaya.

⁹ Nave waamakellettho laamba muyuununi mwiwa ni waawarihattho enduwira omuruni mwawi alliwaalla eneerokhalla allupa mukuthwaaka moollikana ni lamulo wa enthawi yoohimalla. Mmu sika onaamuzozelleewe Aroni ni anaaye.

¹⁰ “Vatulli viwa oweena nankhoro a eng'ombe vahoollo va musasa wamutthukumano. Nave Aroni ni anaaye etthinddaanyere mattiiwa va muru wa nankhorooyo.

¹¹ Nave oyiiphe eng'ombeeyo vamiitthoni va Apwiya, vakhuviru ni mullako wa musasa wamutthukumano.

¹² Okusewo nikhame na eng'ombeeyo nave omare ni eyaallaawo va manyaka a nikuwa. Nave nikhame noohallanno oniithelle vatthi va nikuwanno.

¹³ Vatulli viwa okuse makhura mattheene awaapheella nave oohuruwella marupo, makhura mattheene a ohapa ni apellepetu ni makhuriiweene nave oshellellihe vanikuwanimvo.

¹⁴ Koma enamiiwa, nttapara niwa ni marupwiiwa waashellellihe otte wa misasa. Yoovelleella yeella tti ya mukutho woopepesella machimo.

¹⁵ “Omukuse mmodda mwa anankhoro a enkhosa eelli nave Aroni ni anaaye etthinddaanyere mattiiwa va muru wa enkhoseeyo.

¹⁶ Vano oyiiphe nave okuse nikhame niwa ni oniitha moowaapheella nikuwa.

¹⁷ Enkhoseeyo oyiphadde enthuli enthuli nave wahuwa marupwiiwa ni meto ddiwa, odditthinddaanyere vaddullu va enthulinnddo ni muru.

¹⁸ Nave oshellellihe enkhosa ettheeneeyo va nikuwamvo. Yooyo onaakhalle mukutho wooshellelliha woovelleella wa Apwiya, mukutho wa nthuko nawaaddivella, wawoosiwa viikho.

¹⁹ “Nave okuse nankhoro a enkhosa emoddeeyo. Aroni ni anaaye etthinddaanyere mattiiwa vamuru wa enkhoseeyo.

²⁰ Oyiiphe nave okusewo nikhame niwa omare va etthoka ya naaru na onnattanatta na Aroni ni va etthoka ya naaru noonnattanatta na anaaye. Omarettho va eyaalla ddiwa dduullupalli ddoonnattanatta ni va eyaalla yuullupalli ya o nnyallo noonnattanatta. Nikhame noohalla oniithelle moowaapheella nikuwa.

²¹ Okuse nikhame noohalla va nikuwa navettho makhura mamodda oozozella, ommidde Aroni ni ddoowara ddaye. Waamiddettho anaaye ni ddoowara ddiwa. Sika olliyooyo ni anaaye enaakhalle oopatuleya ni ddoowarannddo.

²² “Okusewo makhura a nankhoro a enkhosa, makhura mattheene a omwiillani, a vamaruponi, a voohapani, a vaapellepetuni ni mweto wamutulli wonnattanatta kaambiiwa enkhosa yeella tti mukutho wa va mutetho woozozella.

²³ Nave ovenyera m'mutaangani wa buledi oohikhalla ni yisiti, woopatulelliwa wa mi Apwiya okusemo mwitthi mmodda wa buledi oohikhalla ni yisiti, mwitthi mmodda wa buledi ooruweyiwa m'makhurani ni mwitthi mmodda wa buledi ooshashaalla.

²⁴ Ddoocha ddittheddenenndda oddihiye m'mattani mwa Aroni ni mwa anaaye nave alliwaayo eyitukhullelle muddullu wi ddikhalle yoovelleella yootukhullella muddullu wa miyaano.

²⁵ Sika oddikuse nndde ovenyera m'mattani mwiwa nave oddishellellihe va nikuwa ni mukutho wooshellelliha wi ddikhalle mukutho wa nthuko nawaaddivella Apwiya, mukutho wawoosiwa viikho woovelleelliwa wa Apwiya.

²⁶ “Okuse ekhakadda ya nankhoro a enkhosa yoomuzozella Aroni nave oyitukhullelle muddullu ekhalle yoovelleella yootukhullella muddullu wa miyaano. Yeella sika enaakhalle echigawaawo.

²⁷ “Vatulli viwa opatule embali dda nankhoro a enkhosa yoovelleella va mutetho woomuzozella Aroni ni anaaye, sika wi ekhakadda ni mweto wamutulli ddoovelleelliwa wonanko yoovelleella yootukhullella muddullu.

²⁸ Aisraele yavelleella mikutho ddeeyaattano, ddenndda ddikhalle dda Aroni ni anaaye enthawi ddittheddene vawi tti ddoovelleella dda Aisraele wa Apwiya.

²⁹ “Ddoowara ddoopatuleya dda mukutho dda Aroni ddikhalle dda edduullu ddaye olliyooyo akhwa wi edduullunnddo ddiwareke ddaazoziwaka ni waakhella odindwiiwa.

³⁰ Mwaana a Aroni oyo anaavollowe munipuroni mwaye wi akhalle mullupa mukutho muullupalli awareke ddenndda mallapo matthanu ni meelli aavollowaka m'musasani wamutthukumano wi arumeyelle munipuroni naweella.

³¹ “Sika omukuse nankhoro a enkhosa yoozozella mullupa mukutho, omwaapeye onipuroni noopatuleya.

³² Nave Aroni ni anaayaayo eche enama ya nankhoro a enkhosa ni buledi a m'mutaangani va mullako wa musasa wamutthukumano.

³³ Eche ddittheddene nndde yaddivelleelliiwa wa Apwiya va mutetho woopepesella machimo voowaazozani ni waavaha odindo. Muthu shisha ahiche vawi tti ddoopatuleya.

³⁴ Enama yaahalla apaalle buledi ahalla ophiyera ohinase omushellellihe. Ehichiwe kaambiiwa tti yoopatuleya.

³⁵ “Ddittheddene kuulamulelleeminndda omweerelle Aroni ni anaayeene. Weere mutetho wowaazoza wa mallapo matthanu ni meelli.

³⁶ Nllapo ni nllapo ovelleelleke nankhoro a eng'ombe oopepesella machimo. Nave ovelleelleke mukutho woopepesella machimo weelliha nikuwa nave onizoze wi nikhalle noopatuleya.

³⁷ Wa mallapo matthanu ni meelli ovelleelleke mukutho woweellihella nikuwanno nave onipatuleke. Vatulli viwa nikuwanno nineerokhalla naweella wunchichi nave erive ello enaattannye nikuwanno eneerewoonongiwa ni masiva a weella wiwa.

Mikutho dda nllapo ni nllapo

³⁸ “Enthawi ddittheddene nllapo ni nllapo, ovelleelleke asaanaankhosa eelli a muyakha mmodda va nikuwa.

³⁹ Mwaanaankhosa mmodda omuvelleelleke ohinase nave mmodda misikuwa.

⁴⁰ Vamodda ni mwaanaankhosa awaambooyo, ovelleelleke ekilogaramu emodda ya othu waphaama woottakanyihera ni lita nimodda na makhura. Navettho wiithellelle lita nimodda na vinyo wonanko mukutho wayoowirya.

⁴¹ Vano waamuvelleellaka mwaanaankhosa aneepiillooyo misikuwa oweekena ni muyezo woophwanaphwana wa othu, makhura ni vinyo wonanko ohinase. Ddennddo ddikhalle mukutho wa nthuko nookiddivella, wawoosiwa viikho wa mi Apwiya.

⁴² Mikutho ddooshellelliha ddenndda ddivelleelliweke enthawi ddittheddene va mibado ddanyu ddittheddene. Muddivelleelleke vamiitthoni va mi Apwiya o mullako wa musasa wamutthukumano, nko kinaakumanekeemina ni ollota ni athwaaka.

⁴³ Wenko sika kinaakumanekeemi ni Aisraele nave nipuro nenno nineerokhalla naweella ekaamba ya ntitimiho naka.

⁴⁴ Kineerowupatula musasa wamutthukumano ni nikuwa nene. Nave kineerewaapatula Aroni ni anaaye wi ekhalle allupa mukutho.

⁴⁵ Kineerokhalla variyari va Aisraele nave kineerokhalla Mullukwiiwa.

⁴⁶ Eneerodduwella wi mi tti Apwiya ayo kaakhumihalle o Iguputo wi kikhalle variyari viwa. Mi tti Apwiya Mullukwiiwa.