Eksodo 28 - Mawu a Mulluku

Ddoowara dda allupa mukutho

¹ “Omwiithanihe Aroni ni anaaye, Nadabu, Abihu, Eleazara ni Itamara wi ewe. Kohaatthoolla variyari va Aisraele wi ekhalle allupa mukutho.

² Omusowelle muullupallaawo Aroni ddoowara ddoopatuleya wi ooneyeke phaama navettho wi avahiweke olemu.

³ Waalamule athu attheene eeruso, attheene ayo kaavahilleemi ezeru wi esowe ddoowara dda Aroni nnddo anaawareeye yaamuzozaka wi akhalle mullupa mukuthwaaka.

⁴ Esowe yoowara ya vakhakaddani, yoowara ya efodi,* mukanjo, malaya oopetiwa phaama, enduwira ni laamba. Esowe ddoowara ddoopatuleyannddo dda mbalaawo Aroni ni dda anaaye wi ekhalle allupa mukutho.

⁵ Ddoowara ddenndda athu eeruswaayo eddisowe ni olusi wagolide ni mapururu abululu, ooreera oofiira ni oofiira navettho ekuwo yabafuta aphaama.

⁶ “Yoowara ya efodi eyisowe ni olusi wagolide ni mapururu abululu, ooreera oofiira ni oofiira navettho ekuwo yabafuta aphaama ni yawoopiwa mweeruso.

⁷ Ekhalle ni malaamba meelli oowulluka vamathurini oosowella nimodda o etthoka ddiwa piilli oomakella efodooyo.

⁸ Vikhallettho laamba oolluwa mweeruso, oomakellana efodi. Laambooyottho akhalle a olusi wagolide ni a mapururu abululu, ooreera oofiira ni oofiira navettho a ekuwo yabafuta aphaama.

⁹ Okuse malluku meelli a onikisi nave olembevo manddina a anamwani aallopwana a Israele.

¹⁰ Va nlluku nimodda olembevo manddina matthanu ni nimodda nave vanllukuni nimoddanno weere emoddamoddave yeeyo. Olembe manddinaayo moollikana ni oyariwa wiwa wa anamwani a Israelaayo.

¹¹ Manddiniiwaayo waalembe mowaagobani vamallukuni meellaayo, mweeruso ya muthu oogoba malluku. Nave mallukwaayo ekhalle mu ddoohiyamo ddiwa ddagolide.

¹² Ohiye malluku meellaalla va malaamba a vamathurini a efodi, wonanko yawuupusella ya Aisraele. Mwa ettilla yeella, Aroni aneerekewaatukhulla manddinaayo vamathurini nave mi Apwiya kineerekowuupuwella.

¹³ Opangettho ddoohiyamo ddimodda piilli ddookhalla wonanko malluwa agolide

¹⁴ navettho onyolo miilli wagolide aphaama ooritthiwa phaama wonanko mikwe oyo onaamakellelleewe o ddoohiyamonnddo.

Yoowara ya vakhakaddani

¹⁵ “Osowe yoowara ya vakhakaddani yaweeruzella nave yoopetiwa mweeruso. Epangiwe wonanko efodi, sika ottaphullella wi mapangello a olusi wagolide ni a mapururu abululu ooreera oofiira ni oofiira navettho a ekuwo yabafuta aphaama.

¹⁶ Wunnuwa wiwa okhalle woophwanaphwana embali ddittheddene nave ekhalle yoopinda opiilli. Orekama wiwa okhalle masentimita 23, emoddamoddave yeeyottho okhuveya wiwa.

¹⁷ Ohiyevo mizere misese dda malluku. Vamuzerani wawaamba vikhalle malluku a rubi, topazi ni garaneti.

¹⁸ Vamuzerani waneepiilli vikhalle malluku a emeradi, safiro ni daimondi.

¹⁹ Vamuzerani waneeraru vikhalle malluku a yasinti, agate ni ametisiti.

²⁰ Vamuzerani waneesese vikhalle malluku a berulo, onikisi ni jasipere nave ddittheddenennddo ddikhalle mu ddoohiyamo ddagolide.

²¹ Malluku yaalla ekhalle khumi ni meelli moollikana ni malloko a Aisraele. Mallukwaayo egobiwe wonanko ezidindo, nirive nlluku nikhalle ni nnddina na nlloko nimodda.

²² Opange onyolo wagolide aphaama wa va yoowara ya vakhakaddani, wooritthiwa phaama wonanko mikwe.

²³ Opangettho emphete piilli nave oddimakellelle va makona amuddullu a yoowara ya vakhakaddani.

²⁴ Omake onyolo wagolide miilli o emphete piillinnddo.

²⁵ Nave etthoka ddiwa ddimodda piilli dda onyolooyo omakellelle o ddoohiyamo dda malaamba a vamathurini vahoollo va efodi.

²⁶ Opangettho emphete piilli ddagolide nave oddimakellelle o makona amuhito mwa yoowara ya vakhakaddani muwari waatamana ni yoowara ya efodi.

²⁷ Opangettho emphete ddimodda piilli ddagolide nave oddimakellelle muhito mwiwa, muhoollo mwiwa mwa malaamba meelli a vamathurini a efodi vakhuviru ni laamba oolluwiwa mweerusoolle.

²⁸ Sika omakellelle emphete dda yoowara ya vakhakaddaneeyo o emphete dda yoowara ya efodeelle ni mukwe wabululu wi yoowara ya vakhakaddaneeyo ekhalle vaddullu va laamba oolluwiwa mweerusoolle nave wi yoowara ya vakhakaddani emakellelliwe phaama o yoowara ya efodi.

²⁹ “Nave Aroni aavollowaka munipuroni naweella, awareke yoowara ya vakhakaddani yaweeruzella yoolembiwa manddina mattheene a anamwani a Aisraele wi mi Apwiya kiwuupuwelleke.

³⁰ Mu yoowara ya vakhakaddaneeyo ohiyemo ddeko ddooromolliwa Urimu ni Tumimu* wi ddennddo ddikhalle vakhakaddani ya Aroni aawaaka wa mi Apwiya. Sika Aroni aawaaka vamiitthoni va mi Apwiya awareke enthawi ddittheddene yoowara ya vakhakaddani wi adduwelleke oweeruza phaama Aisraele.

Ddoowara ddimodda dda allupa mukutho

³¹ “Osowe mukanjo wa ekuwo yabululu woowara muwari mwa yoowara ya efodi.

³² Variyari viwa va mukanjooyo ohiye mulliha wookwakhwana ovollochihavo muru. Mulliha yoolla osowiwe moollipiha moowaapheella mutthemwene wonanko nikohi na malaya wi mukanjoolla ohaahuwe.

³³ Moominika mwiwa, muhito mwa mukanjooyo opange ddeko wonanko ezipaso dda makangaza. Ddikhalle dda mapururu abululu, ooreera oofiira ni oofiira, waapheella mukanjo muttheenooyo. Variyari va makangazaayo vikhalle mabelo agolide.

³⁴ Nave vikhalle nikangaza nimodda va arive belo agolide waapheella moominika mutthemwene mwa muhitommo.

³⁵ Sika Aroni awareke mukanjooyo aapharaka mitteko dda mukutho. Aavollowaka apaalle aakhumaka munipuroni naweella vamiitthoni va Apwiya winlla wa mabelwaayo wiiweyeke wi ahiiphiwe.

³⁶ “Opangettho malluwa agolide aphaama, ogobevo wonanko echidindo mawu awi, ‘Yoovelleelliwa wa Apwiya.’

³⁷ Onimakellelle ni mukwe wabululu o enduwira ya Aroni nave nikhalle muhoollo mwa enduwireeyo.

³⁸ Enthawi ddittheddene ekhalle vayuuchini va Aroni wi olliyooyo iireye ddoolakweya ddittheddene dda va ddoovelleella dda Apwiya nnddo Aisraele enaddipatuliiwa wi Apwiyaayo eddaakhelle ddoovelleella dda athunnddo.”

³⁹ “Omusowellettho Aroni malaya abafuta aphaama, enduwira yabafuta aphaama navettho laamba oopetiwa mweeruso.”

⁴⁰ Waasowelle anamwani a Aroni mikanjo, malaamba ni enduwira wi alliwaayo yooneyeke phaama navettho evahiweke olemu.

⁴¹ Ddoowara ddenndda omuwarihe mwanamunno Aroni ni anaaye. Nave waazoze, waavahe odindo ni waapatula wi ekhalle allupa mukutho.

⁴² Waasowelle makabudula ookomella mukasambarani wi ehooniheke epwillimwinddi ddiwa.

⁴³ Aroni ni anaaye ewareke ddenndda enthawi ddittheddene yaayaaka o musasa wamutthukumano apaalle onikuwani wookirumeyella onipuroni naweella woova wi enaachimwe ni okhwa. Lamulo nenna noollota dda Aroni ni edduullu ddaye nikhalle lamulo wa enthawi yoohimalla.