Eksodo 26 - Mawu a Mulluku

Musasa wamutthukumano

¹ “Amake musasa wamutthukumano voopharihani mutteko ekuwo ddabafuta aphaama khumi navettho ni ekuwo ddabululu, ddooreera ddoofiira ni ddoofiira. Ekuwo ddenndda addipete phaama ni ezithuzi dda akerubi.*

² Erive ekuwo ekhalle yoorekama mamita 13 nave okhuveya wiwa okhalle mamita meelli. Ekuwo ddittheddenennddo ddikhalle ddoophwanaphwana wunnuwa wiwa.

³ Allundellelle ekuwo dditthanu voosowani wi ddikhalle ekuwo emodda nave eerettho emoddamoddave yeeyo ni ekuwo dditthanu ddimoddannddo.

⁴ Apange makwelelo akuwo yabululu mukhwipi mwa ekuwo. Eerettho emoddamoddave yeeyo ni ekuwo emoddeeyo.

⁵ Sika asowelle makwelelo 50 mukhwipi mwa ekuwo yawaambeeyo nave makwelelo 50 mamodda va ekuwo yaneepiilleeyo wi makwelelwaayo ekhalle moowehana.

⁶ Nave apange engowi 50 ddagolide ddoollundellellana ekuwo piillinnddo wi musasooyo okhalle omodda.

⁷ “Apangettho ekuwo khumi ni emodda ddamapururu eepuri wi ddikhalle echirona yoothunyellana vaddullu va musasooyo.

⁸ Erive ekuwo orekama wiwa okhalle mamita 14 nave okhuveya wiwa okhalle mamita meelli. Ddittheddenennddo ddikhalle ddoophwanaphwana.

⁹ Asowe ekuwo dditthanu wi ddikhalle ekuwo emodda nave dditthanu ni emoddeeyo ekhallettho ekuwo emodda. Sika ekuwo yaneetthanu ni emoddeeyo ayipinde omodda vahoollo va musasa.

¹⁰ Nave asowelle makwelelo 50 mukhwipi mwa ekuwo yawaambeeyo nave makwelelo 50 mamodda va ekuwo yaneepiilleeyo.

¹¹ Nave apange engowi 50 ddamukuwa ddoollundellellana ekuwo piillinnddo wi echironeeyo ekhalle emodda.

¹² Ekuwo ya echirona yoohalla otulli wa musasooyo ekhulumbeke.

¹³ Nave ekuwo yachirona ya masentimita 46 yoohalla o embali piilli ddimoddannddo eneerekokhulumba ekhuneellaka embali piillinnddo.

¹⁴ “Ayipange echirona ya mattapara awoollowa a nankhoro a enkhosa ooruweyiwa mu otooto woofiira nave echirona emodda ya mattapara mamodda awoollowa.

¹⁵ “Apange meto dda matabwa akesha a musasooyo.

¹⁶ Nirive ntabwa orekama wiwa nikhalle mamita masese ni hafu nave okhuveya wiwa nikhalle masentimita 69.

¹⁷ Nirive ntabwa nikhalle ni misomali miilli ddamatabwa ddoollundellellana matabwa nave matabwa mattheene epangiwe mwawi ddiidda.

¹⁸ Apange matabwa 20 embali yoomwera.

¹⁹ Nave apange matthipello 40 asiliva wi etthipellemo matabwa 20. Vatthi va nirive ntabwa vikhalle matthipello meelli a misomali miilli ddamatabwanndde.

²⁰ Nave embali yoompoto wa musasooyo apangettho matabwa 20

²¹ ni matthipello 40 asiliva, meelli va ntabwa nimodda.

²² Okhote wiwa wa musasooyo, woovollowa nndduwa, apange matabwa matthanu ni nimodda.

²³ Okhote wa musasooyo, va ekona, vikhalle matabwa meelli.

²⁴ Matabwa a va konaalla ellundellelliwe waambeella vatthi ophiyera vaddullu. Mmu sika enaakhallelliiwa matabwa meelli ayo enaapange makona meelli.

²⁵ Sika okhotenko okhalle matabwa matthanu ni mararu ookhalla ni matthipellwiiwa 16 asiliva, meelli vatthi va ntabwa nimodda.

²⁶ “Apange ekopo ddakesha dditthanu wi ddikhalle machengo va matabwa a embali emodda ya musasa

²⁷ ni dditthanu ddimoddattho va matabwa a embali emodda. Vikhallettho ekopo dditthanu va matabwa woovollowa nndduwa, embali yookhote.

²⁸ Nchengo na variyari nikhalle variyari va machengo ooddullu ni avatthi nave naambeelle o makomihello ophiya o makomihello mamodda.

²⁹ Matabwaayo aahuruwelle ni golide nave apangettho emphete ddagolide wi amakelle vamodda matabwaayo ni ekoponnddo nave ekoponnddo ddikhalle ddoohuruwelliwa ni golide.

³⁰ Sika amake musasa moollikana ni mmo kawoonihelleemi vamwaangoni valle.

³¹ “Asowe ekatani yabululu, yooreera yoofiira ni yoofiira navettho yabafuta aphaama. Nave ekataneeyo ayipete phaama ni ezithuzi dda akerubi.

³² Ayitthomeye va apoto asese akesha oohuruwelliwa ni golide, ookhalla ni engowi ddagolide nave ookeraattheya va matthipello masese asiliva.

³³ Atthomeye ekatani vatthi va engowi ddoollundellellana ekuwo piilli nave ahiye nibokosi na echipanganonno muwari, ntthella na ekuwo. Ekataneeyo eneerohiyaniha nipuro naweella ni nipuro naweellesesa.

³⁴ Akhuneelle nibokosi na echipanganonno ni yookhuneelliiwa onipuroni naweellesesanno.

³⁵ Tebuloolle amuhiye otte wa ekatani. Yoohiyavo enyaleelle ayihiye o embali yoomwera wa musasooyo moowehana ni tebulo oyo anaakhalle o embali yoompoto.

³⁶ “Va mullako wa musasa ahiyevo ekatani yoowallana yabululu, yooreera yoofiira, yoofiira, yabafuta aphaama navettho yoopetiwa mweeruso.

³⁷ Ayitthomeye va apoto atthanu akesha oohuruwelliwa ni golide, ookhalla ni engowi ddagolide nave ookeraattheya va matthipello matthanu amukuwa.