Eksodo 25 - Mawu a Mulluku

Ddoovelleella ddoomakella musasa wamutthukumano

¹ Apwiya yaamulleella Mose wi,

² “Alleelle Aisraele evelleelle ddoovelleella ddiwa wa miyaano. Nave weyaano waakhelle ddoovelleella ovenyera wa arive muthu nnddo anapaalleeye ovelleella ni murimaaye muttheene.

³ Ddoovelleella onaakhelleewennddo tti ddeko wonanko, golide, siliva, mukuwa,

⁴ ekuwo ddabululu, ddooreera ddoofiira, ddoofiira, ekuwo ddabafuta aphaama, ekuwo ddawoopiwa ni mapururu eepuri,

⁵ mattapara awoollowa a nankhoro a enkhosa ooruweyiwa mu otooto woofiira, mattapara mamodda awoollowa, matabwa akesha,

⁶ makhura a enyali, ddawunkhella dda makhura oozozella navettho lubani* na nthuko naphaama.

⁷ Waakhellettho malluku aphaama a onikisi navettho malluku mamodda oohiya va yoowara ya efodi* ni yoowara ya vakhakaddani.

⁸ Nave ekimakelle musasa woopatuleya wi miyaano kikhalle variyari viwa.

⁹ Emake musasa navettho ehiyemo ezipangizo ddittheddene moollikana ni mmo kinawoonihelleemi.”

Nibokosi na echipangano

¹⁰ “Nave apange nibokosi na matabwa akesha. Orekama wiwa nikhalle masentimita 114, okhuveya wiwa okhalle masentimita 69 navettho oya muddullu wiwa okhalle masentimita 69.

¹¹ Anihuruwelle ni golide aphaama wunchichi muwari mwiwa ni otte wene. Nave aapheellihe mukoko wa golide owanoni wa nikuwanno.

¹² Apange emphete ddisese ddagolide ddootukhullella nibokosinno nave amakellelle emphetennddo omasitandiniiwa masese, nngu piilli nngu piilli.

¹³ Apangettho ekopo ddakesha nave ekoponnddo addihuruwelle ni golide.

¹⁴ Nave ekoponnddo addiherere mu emphetennddo va embali piilli dda nibokosinno wi atukhullekena.

¹⁵ Ekoponnddo ddikhalle mu emphetennddo nave ddihivenyihiwekemo.

¹⁶ Munibokosinimmo ahiyemo malluku meelli ayo kinaamuvaheemi elembiwe malamulo a echipangano.

¹⁷ “Yookhuneella ya nibokosinno ayipange ni golide aphaama wunchichi, orekama wiwa okhalle masentimita 114 nave okhuveya wiwa okhalle masentimita 69.

¹⁸ Golide a mukhwipi vaddullu va yookhuneelleeyo amuhane wi aapange akerubi* eelli,

¹⁹ mmodda nngu ni mmoddattho nngu. Sika akerubaayo ekhalle oovenyera va golide a va yookhuneelleeyo.

²⁰ Muuphello a akerubaayo aattaphuruselle muddullu va yookhuneelleeyo. Akerubi ekhalle moowehana, arive kerubi aweheke vatthi va yookhuneelleeyo.

²¹ Munibokosinimmo ahiyemo malluku meelli oolembiwa malamulo a echipangano ayo kinaamuvaheemi. Vano anikhuneelle nibokosinno ni yookhuneelleeyo.

²² Kineerekokumana ni olliye vaavo nave ovenyera vaddullu va yookhuneelleeyo, variyari va akerubi eri vaddullu va nibokosaayo, kineeromulleella malamulwaaka mattheene wa Aisraele.

Tebulo a buledi oopatuleya

²³ “Ampange tebulo a matabwa akesha, orekama wiwa okhalle masentimita 91, okhuveya wiwa okhalle masentimita 46, oya muddullu wiwa okhalle masentimita 69.

²⁴ Sika amuhuruwelle ni golide aphaama wunchichi. Nave aapheellihe mukoko wagolide owanoni wa nikuwanno.

²⁵ Golidooyo akhalle wonanko eferemu mukhwipi mwa tebulo, oramballalla waye okhalle wonanko orekama wa nnatta.

²⁶ Apange emphete ddisese ddagolide nave eddimakellelle o makona masese a meto ddiwa ddisese.

²⁷ Emphete munaaherereenyu ekopo ddoomutukhullana tebulo ddimakellelliwe vakhuviru ni eferemu yatebulweeyo.

²⁸ Apangettho ekopo ddakesha ddoomutukhullellana tebulo nave ekoponnddo addihuruwelle ni golide.

²⁹ Apange embale, ebakuli, mino ni mabeseni oopaalleya va ddoovelleella dda ddoowirya. Ddittheddenenndda ddikhalle dda golide aphaama wunchichi.

³⁰ Vatebulonimvo amuhiyekevo buledi oopatuleyella wa miyaano wi akhalleke vamiitthoni vaka enthawi ddittheddene.

Yoohiyavo enyali

³¹ “Apange yoohiyavo enyali ya golide aphaama wunchichi. Nthimwa niwa, mwiirukulluni mwiwa, makapwiiwa ni ddooreerihella ottaphullella wi malluwa ni murwiiwa ddittheddenennddo ddihaniwe ovenyera va mukoko wagolide mmoddave.

³² Vaddullu va erukullwiiwa vikhalle enthambi dditthanu ni emodda, ddiraru erive embali.

³³ Erive enthambi ya enthambi dditthanu ni emodda ekhalle ni malluwa mararu ni miru ddiwa. Malluwaalla ekhalle wonanko a muteekho wa manangwa.

³⁴ Erukullu ya enyaleeyo ekhalle ni malluwa masese ni miru ddiwa. Malluwaalla ekhalle wonanko a muteekho wa manangwa.

³⁵ Mararu mwa malluwa masesaalla ephuwe vatthi va voomellella enthambi.

³⁶ Yoohiyavo enyali ettheeneeyo opwesereravo enthambi ni malluwa ddihaniwe ovenyera va mukoko wagolide aphaama mmoddave.

³⁷ Apange enyali dditthanu ni piilli nave addihiye otthoka wa erukullu ni enthambi dda yoohiyavo enyaleeyo wi ddimolleelleke muhoollo.

³⁸ Ezipangizo dda enyaleeyo, ddoopanella ddeko ni embale ddikhalle dda golide aphaama wunchichi.

³⁹ Yoohiyavo enyaleeyo ni ezipangizo ddittheddene addipange ni golide oollemella makilogaramu 34.

⁴⁰ Achenjere wi epangiwe moollikana ni mmo kawoonihelleemi vamwaangoni valle.