Eksodo 24 - Mawu a Mulluku

Okeraatthihiwa wa echipangano

¹ Apwiya yaamulleella Mose wi, “Ngawa wa miyaano omwaangoni wuno ni Aroni, Nadabu, Abihu navettho oohoollella 70 a Aisraele. Vano mukillapelleke miyaano muri voorekamella.

² Weyaano Mose sika onaakaatamelle koma amoddaayo ehikaatamelle. Aisraele attheene oohallaayo ehiwe omwaangoni.”

³ Mose aaya aalleella athu mawu ni malamulo mattheene ayo Apwiya yamulleelliiwa. Nave athwaayo yahaakhulla vamodda wi, “Nineereweera ddittheddene nnddo Apwiya ellotilliiwa.”

⁴ Nave Mose aalemba mawu mattheene a Apwiya. Nave aavenya moopeha ohinase aamba omaka nikuwa museresere mwa mwaango. Nave ahiimesa malluku khumi ni meelli a malloko khumi ni meelli a Aisraele.

⁵ Vano ahaaruma asombwe a Aisraele wi yavelleelle mikutho ddooshellelliha ni wiipha eng'ombe wi yavelleelle wa Apwiya mikutho ddeeyaattano.

⁶ Mose aakusawo hafu a nikhame, anihella mu embale nave nikhame noohalla aaniithella vanikuwani.

⁷ Vano aakusa nibukhu na echipangano, aweerengella athwaayo mowiiweya phaama. Nave athwaayo yaallota wi, “Nineereweera ddittheddene nnddo Apwiya ellotilliiwa nave nineerowiiwellella alliwaayo.”

⁸ Vano Mose aakusa nikhame na m'mbaleninne aamiddana athwaayo nave aallota wi, “Nikhame nenna sika ninasimikiza echipangano eyo Apwiya ekeraatthihalliiwa ni nyuwaano vawuuvahani mawu mattheenaalla.”

⁹ Sika Mose, Aroni, Nadabu ni Abihu navettho oohoollella 70 a Aisraele yaawella mwaango

¹⁰ nave yaamoona Mulluku a Aisraele. Vatthi va manyallwaaye vaakhalla ello yawooneya wonanko musewu woopangiwa ni nlluku na safiro noowala wonanko oddullu.

¹¹ Mulluku khaawoonongille oohoollella a Aisraelaayo. Alliwaayo yaamoona Mulluku nave yaacha ni owirya.

Mose vamwaangoni wa Sinai

¹² Apwiya yaamulleella Mose wi, “Ngawa wa miyaano omwaangoni wuno nave otiyere weewuno. Kineerewuuvaha malluku ayo kilembilleemivo malamulo wi kaahuddihe athu.”

¹³ Vano Mose aatimulla ni oomurumeyellaaye, Yoswa nave Mosooyo aawella mwaango wa Mulluku.

¹⁴ Olliyooyo aari aalleellille khalle oohoollellaalle wi, “Munitiyereke vaava ophiyera nuuphwanyeni. Aroni ni Huri munaakhallekena vaava. Oyo anaakhalleke ni millatu ddaye ayeekena wa alliwaayo.”

¹⁵ Sika Mose aawella mwaango nave mwaangooyo waakhuneelliwa ni murapo.

¹⁶ Ntitimiho na Apwiya naakitthella vamwaangoni wa Sinai nave waakhuneelliwa ni murapo mallapo matthanu ni nimodda. Va nllapo naneetthanu ni piilli, Apwiya yaamwiithana muwari mwa murapommo.

¹⁷ Wa Aisraelaalle, ntitimiho na Apwiyanne nooneya wonanko okhara wa munllo vamwaangoni.

¹⁸ Mose aavollowa m'muraponimmo aphiya vaddullu va mwaango. Mose aakhalla wenko mallapo 40, otthaana ni mahiiyu.