Eksodo 23 - Mawu a Mulluku

Echilungamo wa athu attheene

¹ “Ohinamoottheraka muthu mmodda. Ohilloteke omboni wawoottha nave ohimukavihereke muthu oolakwa voovelleellani omboni wawoottha.

² Naari athu anchichi yeeraka ddoonanara ohaattakihereke. Nave ohivelleelleke omboni wookhoromaniha echiweruzo munthatoni namillatu wi waaddivellihe athu anchichi.

³ Waamweeruzaka muthu ohoowa, oheeruzeke moomukondella.

⁴ “Woona eng'ombe ya mudanaawo ehollowaka apaalle bulwaaye, omukuse wamwinnye.

⁵ Wamoona bulu a mudanaawo iikuhalle ni katundu, ohimukhwaranye koma omuvenyihe.

⁶ “Muthu mmodda oohoowa aawiipiwaka mullatu, ohimwimmane echilungamo.

⁷ Orekamellane ddawoottha. Ohimwiiphe muthu oohilakwa ni oolungama vawi miyaano ngimukhululukella muthu awiipha.

⁸ Ohaakhullelle ddamukaphwani vawi nndda ddinnaweeriha athu oweeruza ohoona echilungamo nave sika mullatu onimaakhoromanella athu oohilakwa.

⁹ “Ohimuhoose mulleto. Weyaano onnadduwella mmo mulleto anakhallelleeye vawi naweenettho waari mulleto o Iguputo wulle.

Muyakha waneetthanu ni piilli navettho nllapo naneetthanu ni piilli

¹⁰ “Wa miyakha mitthanu ni mmodda, ollimeke mmiddo m'matani mwawo nave owuhateke.

¹¹ Koma muyakha waneetthanu ni piilli oddiithuuwiheke ematannddo. Athu oohoowa sika enaacheke ddoomella dda m'matanimmo nave enama ddamuhakani ddinaacheke ddoohalla. Weereke emoddamoddave yeeyo ni emata ddampesa ni dda olivi ddene.

¹² “Ophareke mutteko mallapo matthanu ni nimodda koma va nllapo naneetthanu ni piilli ohiphareke mutteko wi eng'ombe ddawo ddiithuuweke ni abulwaaweene nave wi masiva ehokollweelle mwa akaporwaawo ni alleto.

¹³ “Wiiwesese ddittheddene kuulleelleminndda. Ohiddillapelleke milluku ddimodda nave ohiromollekettho ni manddiniiwa.

Ehakallallo ddiraru

¹⁴ “Okhalleke ni nllapo na ehakallallo oraru vamuyakhani wi okititimihe miyaano.

¹⁵ Okhalleke ni nllapo na Ehakallallo ya Buledi Oohikhalla ni Yisiti. Wonanko mmo kuulamulelleemi, omucheke buledi oohikhalla ni yisiti mallapo matthanu ni meelli mu mweeri wa Abibu, ekaamba yawi mweeri yooyo waavenyawo o Iguputo. Arive muthu ahiphiyeke vakhuviru ni miyaano ari mattave.

¹⁶ “Okhallekettho ni nllapo na Ehakallallo ya Ddoohata Ddawaamba va enthawi yawaamba ohata. Okhallekettho ni nllapo na Ehakallallo Yootthukumaniha Ddoohata ddittheddene va omalla wa muyakha.

¹⁷ Sika allopwana attheene yooneyelleke vamiitthoni va mi Apwiya Mullukwaanyu, oraru vamuyakhani.

¹⁸ “Waavelleellaka mukutho wa enama wa miyaano, ohivelleelleke ni buledi ookhalla ni yisiti nave makhura a enama yoovelleella va nllapo naka na ehakallallo ehisungiwe ophiyera ohinase.

¹⁹ “Oweekena ddeko ddaphaama wunchichi dda ddoohata ddawo ddawaamba dda m'matani mwawo, onipuroni na mallapello na Apwiya Mullukwaawo. “Ohaapeyeke enama ya musaana a epuri apaalle a enkhosa voopharihellani mutteko mukaka wa amennya.

Malonjezo ni malangizo

²⁰ “Kineeromurumiha mungelwaaka vahoollo vanyu wi uutetezeni mu ettilla ni wuuphiyihani onipuroni nko kuukhozelleemini.

²¹ Mumwiiwelle olliyooyo nave mwiiwesese nnddo anaalloteeye. Muhimuwukile vawi khawa uukhululukellakani nichimo nawi ddiidda vawi masivaaka eri mwa olliyooyo.

²² Koma mwamwiiwella olliyooyo ni weera ddittheddene kinaalloteemi, miyaano kineerewiitana ni adanaanyu nave kineerewaagonjiha attheene ayo enuuvaanyihekeni.

²³ Mungelwaaka aneerewuuhoollellani nave aneerewuuvollochihani mu ellapo ya Aamori, Ahiti, Aperezi, Akanani, Ahivi ni Ayebusi nave kineerowoononga attheenaayo.

²⁴ Sika muhiddikokhorelle milluku ddiwa apaalle oddillapella. Muheerekena nnddo eneeresa athu yaayo. Moonongelleetu milluku ddiwa navettho mwakumulle apotwiiwa oollapellavo.

²⁵ Mwaallapelleke Apwiya Mullukwaanyu wi kuudaliseni vawuuvahani yoocha ni maaddi nave kineerewuuchirihani ereta ddittheddene.

²⁶ Khakhallavo mutthiyana naari mmodda anaanyingalle nihaka mwiillaponi mwanyummo naari oohiyara khaphwanyeyamo. Kineerewuuvahani okumi woorekama.

²⁷ “Kineeroweeriha wi ekooveke miyaano athu attheene enaallipaneke ni nyuwaano. Kineerowaapheelliha muru athu ayo munaawanekeenyuna. Nave kineerowiikariha adanaanyu attheene.

²⁸ Kineerowiikara Ahivi, Akanani ni Ahiti muhinaphiye nave eneerothawa wonanko kaarumihelle enwi.

²⁹ Ngiwiikariha mu muyakha mmodda woova wi mu ellapweeyo khemukhalla athu nave wi enama ddamuhakani ddineerottotthollanamo.

³⁰ Koma kinaawiikareke vang'ono vang'ono ophiyera mwaayarille anamwani anchichi ayo enaakuse ellapweeyo.

³¹ Kineerokeraatthiha ellapwaanyu ovenyera o Enyanja Yoofiira ophiya o enyanja ya Afilisti navettho ovenyera o echipululu ophiya o muhinje wa Yufurate. Kineeroweerihani wi mwaagonjihe athu ookhalla mu ellapweeyo nave muneerowiikariha.

³² Muheerena echipangano alliwaayo naarittho milluku ddiwa.

³³ Ehikhalleke mwiillaponi mwanyu, woova wi enuuchimwiheni. Mwaallapellaka milluku ddiwa, ddawoona, munimaphariwa m'musamphani.”