Eksodo 22 - Mawu a Mulluku

Malamulo a eyuuma

¹ “Muthu iiya eng'ombe apaalle enkhosa, ayiipha apaalle oyikulliha, allivelle eng'ombe dditthanu va eng'ombe emodda apaalle enkhosa ddisese va enkhosa emodda.

² “Mullupaawiiya aphwanyeya akothollaka enyumba mahiiyu nave iiphiwa, muthu amwiiphallooyo ahillakiwe ekaamba ya nikhame na mullupaawiiyooyo.

³ Koma iiphiwa osille, nndduwa nikhumalle, amwiiphallooyo allakiwe ekaamba ya nikhame naye. Arive mullupaawiiya anaphwanella ollivella. Mullupaawiiya aphariwa nave alephela ollivella mullatu, emukullihe ekaamba ya wiiyanko.

⁴ Ello iiyalleeyeeyo yaphwanyeya eri ekumi m'mattani mwaye, khaya tti eng'ombe, bulu apaalle enkhosa, mullupaawiiyooyo allivelle opiilli.

⁵ “Muthu aahiddipwatha eziweto ddaye nave ddavollowa m'matani mwa muthu mmodda, ddichamo mmiddo, mwaneena a eziwetonnddo ahokollose mmiddo waphaama wunchichi wa m'matani mwaye apaalle mpesaaye waphaama munchichi.

⁶ “Muthu aviddeella munllo oya waphiya ohakani nave woosa mapwiddi a tirigu apaalle tirigu oohiretiwa apaalle emata eyo eri ni mmiddo, oyo addoosillooyo allivelle ddawoonongeyannddo.

⁷ “Muthu asungiha wa muthu mmodda makobiri apaalle ddeko ddimodda ddoowallamella mutengo nave ddiiyiwa mpa mwa muthummo, mullupaawiiyooyo aphariwa allivelle opiilli.

⁸ Mullupaawiiyooyo aahiphariwa, mwaneena a enyumboolle akuselliwe onipuroni noomullapella Mulluku wi ddidduwanyeye aarimi mwaneena a enyumbooyo ahimukusalle katundooyo.

⁹ “Vakhalla waakanella ello ya mwaneena, khaya tti eng'ombe, bulu, enkhosa, epuri, ddoowara apaalle erive ello yarimeelle, eyo muthu mmodda analloteeye wi tti yaaye, athu eellaayo eweena vamiitthoni va Mulluku. Oyo Mulluku anamphwanyeeye wi tti oolakwa amullivelle mukhwaayooyo opiilli.

¹⁰ “Muthu amwinnya muthu mmodda eng'ombe, bulu, enkhosa, epuri apaalle erive echiweto wi amusungelle nave echiwetweelle ekhwa, ephoreya apaalle yiiyiwa,

¹¹ ddisimikizeye voomullupellihani oosungooyo vamiitthoni va Apwiya wi khiiyalle ello ya mwaneeneeyo. Akhalla wi oosungooyo khiiyalle, mwaneenooyo aakhullelle ollupellanko nave oosungooyo ahillivelle.

¹² Koma akhalla wi oosungooyo ohiiya, allivelle.

¹³ Yattakhuniwa ni enama ddamuhakani, akusewo ddoohallannddo wi ddikhalle omboni koma ahillivelle eyo yattakhuniwe ni enameeyo.

¹⁴ “Muthu avalla echiweto wa muthu mmodda nave echiwetweeyo yaphoreya apaalle yakhwa mwaneenooyo ahiivo, muthu oovallooyo allivelle.

¹⁵ Koma yakhwa mwaneenooyo arivo, oovallooyo ahillivelle. Apolleya ni makobiri echiweto nave yakhwa, ahillivelle ekaamba yawi aavelleella makobiri voopolleyani echiwetweeyo.

Malamulo a nllapo ni nllapo

¹⁶ “Muthu araruwa ni namwalli oyo ahinatomeliwe, allivelle makobiri anaalamuliweeye nave amutthelle.

¹⁷ Koma attiitthinnya a namwallooyo yakhoota wi muthooyo ahimutthelle mwaniwooyo, muthooyo aneerollivellave makobiri anaalamuliweeye.

¹⁸ “Muthu aamutthiyana oweera ddookhwiri, iiphiwe.

¹⁹ “Arive muthu anakonana ni enama iiphiwe.

²⁰ “Arive muthu oovelleella mukutho wa milluku, ohiri wa Apwiyave, iiphiwe.

²¹ “Ohimuhoose mulleto apaalle omweeriha okhalla moopaneya vawi naweenettho waari mulleto o ellapo ya Iguputo.

²² Ohimuhoose naamukhwelle apaalle mukhwaadduni.

²³ Waamuhoosaka, miyaano kineerowiiwa olliyooyo aawinllellaka wa miyaano.

²⁴ Nave kineerewuushella murima nave kineerowiipha okhotoni wi mwaariyo atthattuwe naamukhwelle nave anaawo etthattuwe ookhwelliwa.

²⁵ “Wamukongoliha makobiri muthu oohoowa variyari vawo, oheereke wonanko eneerelliiwa aniihu ookongoliha makobiri, ohimuwatihere ovelleella makobiri awoonjereravo.

²⁶ Wakusa yawiikhuneella wa muthu mmodda wonanko echikole wi uullivelle makobiraawo, oyihokollose nndduwa nihinavollowe,

²⁷ vawi yawiikhuneellaaye tti yeeyove yootetezellana mwiillaaye. Vano aniikhuneelleke ni tini? Olliyoolla inlla wa miyaano wi kimukavihere, kineeromwiiwa kaambiiwa mi tti eechifundo.

²⁸ “Ohimullotelleke epewe Mulluku nave ohimutembeleleke muthu oyo anaahoollella athwaawo.

²⁹ “Ohisellihe ovelleella wa miyaano ddoovelleella ddoovenyera va ddinchichi dda ddoohata ddawo dda vinywaawo ni dda makhuraawo a olivi. “Waavelleellekettho wa miyaano anaawo aallopwana awaamba.

³⁰ Ovelleellekettho wa miyaano eng'ombe ddawo, enkhosa ddawo ni epuri ddawo ddawaamba. Mwaana awaambooyo anaakhalle ni amennya mallapo matthanu ni meelli nave oneeromuvelleella wa miyaano va nllapo naneetthanu ni raru.

³¹ “Okhalle muthwaaka oopatuleya. Sika ohicheke enama yoottakhuniwa ni enama ddamuhakani koma waavahereke anapwa.