Eksodo 21 - Mawu a Mulluku

Malamulo oosungella akaporo

¹ “Vano waalleelle Aisraele malamulo wi,

² Mwamukulla kaporo a Eheberi, aneerowuupharellani mutteko wa miyakha mitthanu ni mmodda nave mumuttaphulleke m'muyakhani waneetthanu ni piilli, voohikhallattho ekongoli.

³ Aarimi aari yeekha aweeye, anaavenyewottho yeekha. Koma aarimi aari ni mwaariye aweeye, aneerovenyawo ni mwaariyooyo.

⁴ Yaarimi eri apwinnyaayo yamuvahille mutthiyana oyo amuyarelle anamwani, mutthiyanooyo ni anamwanaayo attheene enaakhalle a apwinnyaayo. Vano kaporooyo sika anaavenyewo.

⁵ Koma kaporooyo allota wi, ‘Kinnaakonda apwiyaaka, mwaaraka ni anaaka, nginapaalla wi kittaphulliwe.’

⁶ Vaavo apwinnyaayo eweena kaporooyo onipuroni noomullapella Mulluku. Eweena va mullako apaalle va Eferemu nave apwinnyaayo emphovolle naaru naye. Sika anaakhalle kaporo a apwinnyaayo okumaaye muttheene.

⁷ “Muthu amukulliha mwanaye aamutthiyana wi akhalle kaporo, mwaanooyo khattaphulliwa wonanko mmo eneerelliiwa ni akaporo aallopwana.

⁸ Koma kaporo aamutthiyanooyo aahaayaaka m'mwiitthoni apwinnya ayo yapaalla omutthellaayo, attiitthinnyaayo emoopolle. Apwinnyaayo khenaakhullelliwa omukulliha wa athu eelleto ekaamba yawi khemweerelle ddoororomelleya.

⁹ Komattho aganiza ddoomuvaha mwanaye mutthiyanooyo, amusungeke wonanko mwanaye aamutthiyana.

¹⁰ Amutthellattho mutthiyana mmodda, anaphwanella ovirellella omuvaha mutthiyana awaambooyo ddoocha, ddoowara nave amweerelleke nnddo amweerelleeye vawaamba wonanko mwaariye.

¹¹ Aahimweerella ddenndda, amuhiye wi akhalle oottaphulliwa koma ahaakhellevo makobiri.

Malamulo a ekuku

¹² “Arive muthu anamuukutha muthu ni omwiipha, olliyettho iiphiwe.

¹³ Koma amwiipha muthu moohidduwella koma kakhalla wi tti miyaano Mulluku keerihalle wi ddimweereyelle, muthooyo ttuuwora othawella onipuroni nko kinuuvaheemini.

¹⁴ Koma muthu amwiipha muthu mwaphudda, moomulleka, iiphiwe naari athawenlle onikuwani naka.

¹⁵ “Arive muthu anaawuukuthe attiitthinnya apaalle amennya, iiphiwe.

¹⁶ “Arive muthu anaamwiiye muthu ni omukulliha apaalle omusunga wonanko kaporo, iiphiwe.

¹⁷ “Arive muthu anaatembelelle attiitthinnya apaalle amennya, iiphiwe.

¹⁸ “Athu yaawanaka nave mmodda amuvadda mukhwaaye ni nlluku apaalle ni ekhonya nave ahimwiipha koma amuphoreyiha wunchichi,

¹⁹ nave vatulli viwa achira aneeteeta naarive eetaka ni ekopo, muthu amuukuthallooyo ahillakiwe koma allive ekaamba ya enthawi yoovoriiweelle nave wi olliviwanko omukavihere ophiyera achire.

²⁰ “Muthu amuukutha kaporwaaye aamullopwana apaalle aamutthiyana ni ekopo nave kaporooyo akhwella vaavo, muthooyo aneerollakiwa.

²¹ Koma kaporooyo akhwa vimanlle nllapo nimodda apaalle mallapo meelli, apwinnyaayo ehillakiwe ekaamba yawi ollakiwa waye tti okhwa wa kaporooyo vawi aari eyuumaaye.

²² “Allopwana yaawanaka nave emuphoriiha mutthiyana ookhalla ni erukullu nave mutthiyanooyo anyingalla nihaka koma ahikhwa, oyo amphoreyihallooyo allivelle makobiri ayo mamune a mutthiyanooyo anaaromolleeye nave moollikana ni mmo athu aweeruza enaallotelliiwa.

²³ Koma mutthiyanooyo aphoreya ollakiwa wene onaakhalle wawi okumi olliva okumi,

²⁴ niittho olliva niittho, niino olliva niino, nnatta olliva nnatta, nnyallo olliva nnyallo,

²⁵ woosa ni munllo olliva woosa ni munllo, nikhwata olliva nikhwata nave nrudda olliva nrudda.

²⁶ “Muthu amuukutha kaporwaaye aamullopwana apaalle aamutthiyana vaniitthoni ni onipwesa niitthonno, amuttaphulle kaporooyo olliva niitthonno.

²⁷ Amukhulla niino, amuttaphulle kaporooyo olliva niinonno.

Odindo wa aneena a eziweto

²⁸ “Eng'ombe yamukhuddulla ni omwiipha muthu aamullopwana apaalle aamutthiyana, yiiphiwe moovokhiwa malluku nave enamiiweeyo ehichiwe. Nave mwaneena a eng'ombooyo ahillakiwe.

²⁹ Koma mutetho wa eng'ombeeyo waarimi waari wowaakhuddulla athu nave mwaneenooyo aachenjeziwa koma olliye ahinayimakellella, eng'ombeeyo yamwiipha muthu aamullopwana apaalle aamutthiyana, yiiphiwe moovokhiwani malluku nave mwaneenooyo iiphiwettho.

³⁰ Koma aakhullelliwa wi oopolle okumaaye anaphwanella wi allivelle makobiri mattheene alamuliwaayaayo.

³¹ Eng'ombe yamukhuddulla musombwe apaalle namwalli, malamulweene tti mamoddamoddave.

³² Eng'ombe yamwiipha kaporo aamullopwana apaalle aamutthiyana, mwaneena a eng'ombooyo amullivelle mwaneena a kaporooyo makobiri a siliva 30 navettho eng'ombeeyo yiiphiwe voovokhiwani malluku.

³³ “Muthu ahiya nlliti noohikhuneella apaalle akata nlliti ahinikhuneella nave eng'ombe apaalle bulu amorellamo,

³⁴ anaphwanella wi allivelle ekaamba ya echiwetweeyo. Allivelle makobiri wa mwaneena a echiwetweeyo koma enameeyo ayikuse ekhalle yaaye.

³⁵ “Eng'ombe ya muthu yiipha eng'ombe ya muthu mmodda, eellaayo ekullihe eng'ombe eri ni okumeeyo nave makobireene ekawane. Enama ya eng'ombe yookhweeyo ekawanettho.

³⁶ Koma ddadduwanyeya wi eng'ombeeyo yaakhalla ni mutetho wowaakhuddulla athu, mwaneenooyo ahinayimakellella, mwaneenooyo anaphwanella ollivella eng'ombe ekumi ekaamba ya eng'ombe yookhweeyo. Koma eng'ombe yookhweeyo ekhalle yaaye.