Eksodo 20 - Mawu a Mulluku

Malamulo khumi

¹ Vano Mulluku aallota mawu mattheenaalla wi,

² “Mi tti Apwiya Mullukwaawo oyo kuukhumihalle mu okaporo o Iguputo.

³ “Ohikhalleke ni milluku ddimodda koma meeneve.

⁴ “Ohiipangelleke nifano noophwanaphwana ni erive ello yooddullu apaalle erive ello ya va ellapo yavatthi apaalle erive ello ya m'maaddini a vatthi va ellapo.

⁵ Ohinikokhorelleke nirive nifano apaalle onillapella kaambiiwa mi Apwiya Mullukwaawo kiri Mulluku eehache. Kinnaallaka anamwani ni edduullu ekaamba ya machimo a makhollwiiwa ophiyera mbado waneeraru ni waneesese wa ayo eniitana ni miyaano.

⁶ Koma mibado ddooheerengeya nnddo ddinakikonda miyaano ni wiiwellella malamulwaaka, kinnaddikonda ni echikondi yoohisintheya.

⁷ “Ohiromolleke shisha nnddina na Apwiya Mullukwaawo kaambiiwa Apwiya eneeromullaka arive muthu ooromolla shisha nnddina niwa.

⁸ “Osungeke nllapo na Sabata wi nikhalle noopatuleya.

⁹ Va mallapo matthanu ni nimodda ophareke mitteko ddawo.

¹⁰ Koma nllapo naneetthanu ni piilli tti na Apwiya Mullukwaawo, sika wi va nllapo nenna ohiphareke orive mutteko, weyaano, mwanawo aamullopwana, mwanawo aamutthiyana, mullupa muttekwaawo aamullopwana, mullupa muttekwaawo aamutthiyana, erive echiwetwaawo apaalle mulleto ookhalla ni weyaano.

¹¹ Valle va mallapo matthanu ni nimodda Apwiya yaaphatusa oddullu, ellapo yavatthi, enyanja ni ddittheddene ddiri mwemmo koma va nllapo naneetthanu ni piilli ahiithuuwa. Sika ekaambiiwa Apwiya yadalisalliiwa nllapo na Sabata ni onipatula wi nikhalle naweella.

¹² “Waavaheke olemu attiittho ni amaayo wi enthawi ya okumaawo erekame mu ellapo eyo Apwiya Mullukwaawo enuuvahiiwa.

¹³ “Ohiiphe.

¹⁴ “Ohiraruwe.

¹⁵ “Ohiiye.

¹⁶ “Ohivelleelle omboni woomootthera mukhwaawo.

¹⁷ “Ohisilile enyumba ya mukhwaawo. Ohimusilile mwaara a mukhwaawo, mullupa muttekwaaye aamullopwana, mullupa muttekwaaye aamutthiyana, eng'ombaaye, bulwaaye apaalle erive ello ya mukhwaawo.”

Athu enimoova

¹⁸ Athu attheene yaaniiwa ogugudeya wa murimu ni winlla wa nipallapata, nngu yoonaka ettari ni mwiisi vamwaangonimvo nave yaanoova enatthukumella, yiimellille voorekamella

¹⁹ nave yaamulleella Mose wi, “Munilleelle hiyaano nave nineerewiiwa. Mulluku ahillote ni hiyaano, woova wi ninaakhwe.”

²⁰ Vano Mose awaakhulla wi, “Muhoove vawi Mulluku oophiya wi aweeseni wi mumooveke m'murimani mwanyu navettho wi muhichimwe.”

²¹ Koma athu yahiimella voorekamella, Moseve sika aatamelle murapo wooripa mmo mwaari Mulluku.

Malamulo a makuwa

²² Nave Apwiya yaamulamula Mose wi, “Khawe waalleelle Aisraele wi, Mohoona wi mi Apwiya koollota ni nyuwaano kiri oddullu.

²³ Muhiipangelle weekhiinyu milluku dda siliva apaalle dda golide wi muddillapelleke moopweserera ni miyaano.

²⁴ Mukillapelleke va nikuwa na ethaya nave vaavo muheraatthikivo mikutho ddanyu ddooshellelliha, dda eyaattano ni dda enkhosa, epuri ni eng'ombe ddanyu. Miyaano kineeroowa wi kuudaliseni va mapuro mattheene ayo kinuulleelleemini wi mukillapellekevo.

²⁵ Koma mwaakimakellaka nikuwa namalluku, muhaasemeke mallukwaayo kaambiiwa mwaawaasemaka ni mukoko, muneeroripiha nikuwanno.

²⁶ Vooyaani o nikuwa naka, muhiphariheke mutteko makwelelo, woova wi munoonelliwe epwillimwinddaanyu.