Eksodo 2 - Mawu a Mulluku

Oyariwa wa Mose

¹ Muthu mmodda a nlloko na Levi aamutthella mutthiyana a nlloko nenno.

² Mutthiyanooyo aakhalla ni erukullu nave amuyara mwaana aamullopwana. Oonilleeye wi mwaanooyo tti ooreera, aamwiipitthiha wa miyeri miraru.

³ Koma mutthiyanooyo aphiyalleeye voohiworani omwiipitthihattho, aakusa mutaanga wa epango awumara onyoma. Vano mwaanooyo aamuhiya mwemmo, aya awuhiya variyari va epango, mukhwipi mwa muhinje.

⁴ Nave murokoriye a mwaanooyo ahiimella vakhuviru anawehesesa wi oone nnddo ddinaamweereyelle.

⁵ Enthawi emodda, mwaana aamutthiyana a Farao aaya omuhinjeninko wi ahape nave akaporwaaye aatthiyana yeeta mukhwipi mwa muhinje mulle. Vano olliye ahoona mutaangoolle mupangonimmo, amuruma kaporo mmodda wi awukuse.

⁶ Mwaana a Farao awukhunuullalle mutaangoolle, aamuphwanyamo mwaana inllaka, aamumorella ethakaraka olliyooyo nave aallota wi, “Yoolla tti mwaana a Eheberi.”

⁷ Vano murokoriye a mwaanooyo aaya amukoha wi, “Apaalle kawiithanelleni mutthiyana a Eheberi wi awaamwihellekeni mwaanoolla?”

⁸ Mwaana a Faraoolle ahaakhulla wi, “Khawe.” Sika murokoriyooyo aaya awiithana amennya a mwaanooyo.

⁹ Vano mwaana a Faraoolle aamulleella mutthiyanooyo wi, “Mukuseni mwaanoolla mwakaamwihelle nave kineerewuullivellani.” Sika mutthiyanooyo aamukusa mwaanooyo, anamwaamwiha.

¹⁰ Mwaanoolle unnuwalle aamuvelleella wa mwaana a Farao nave mwaanooyo aatthattuwa akhalla aaye. Mwaana a Faraooyo aamuvaha mwaanooyo nnddina nawi Mose ekaamba yawi aallota wi, “Kaamuruulla m'maaddini.”

Mose anathawella o Midiyani

¹¹ Nllapo nimodda Mose unnuwalle, aaya wa athu a mutundwaayaalle nave ahoona yaapharihelliiwa mutteko mwa ekuku. Aamoona Muiguputo mmodda amuukuthaka Muheberi, mmodda mwa athu a mutundwaaye.

¹² Vano Mose awehille nngu ni nngu nave oonille wi khawuri athu, aamwiipha Muiguputooyo, avuhella mutembwaaye m'mihavani.

¹³ Osaka wene awiillettho, aawoona Aheberi eelli ewanaka. Nave aamukoha oolakwooyo wi, “Ethiyo kaambiiwa tini onamuukutheewe Muheberi mukhwaawo?”

¹⁴ Olliyoolle aamukoha Mose wi, “Ethiyo ttaani aweerille wi okhalle muullupallaahu nave aweeruzaahu? Ethiyo onapaalla okiiphe wonanko wamwiiphelleewe Muiguputoolle?” Vano Mose ahoova wunchichi nave aaganiza wi, “Haa, athu ennadduwella keerilleeminndde!”

¹⁵ Nave Farao iiwalle, aheeseesa wi amwiiphe Mose koma aathawawo aya akhalla o ellapo ya Midiyani. Ari wenko, nllapo nimodda aakeraatthi vakhuviru ni ehime.

¹⁶ Nave anamwani aatthiyana atthanu ni eelli a Yetero, mullupa mukutho a o Midiyaninko yaawa wi erike maaddi wi yaddallihe mubwatoni oowiryellamo eziweto dda attiitthiiwa.

¹⁷ Koma waaphiya abusa amodda ewiikara asinamwallaayo. Vano Mose aavenya aya aakavihera asinamwallaalle nave aaddiwiryiha eziweto ddiwa ddittheddenenndde.

¹⁸ Asinamwallaalle ehokollweelle wa attiitthiiwa yahaakoha wi, “Ethiyo ddiworeyille mwawiidde ollello wi muweewo mwawaakuva ddiidda?”

¹⁹ Alliwaalle yahaakhulla wi, “Muiguputo mmodda sika anooponlle wa abusa nave aanirikella maaddi addiwiryiha ddittheddenenndda.”

²⁰ Sika attiitthiiwaayo yahaakoha wi, “Vano olliyooyo ari wuuwi? Ethiyo kaambiiwa tini mumuhiyalleenyu wenko muthu yooyo? Khaweni mwamwiithane ache weewuno.”

²¹ Sika Mose ahaakhullella okhalla wenko nave Yetero aamuvaha Mosooyo mwanaye, Zipora wi akhalle mwaariye.

²² Zipora aamuyara mwaana aamullopwana. Vano Mose aallota wi, “Mi tti mulleto mwiillaponi yeelleto,” Sika aamuvaha mwaanooyo nnddina nawi Gereshomo.

²³ Viviralle enthawi yoorekama wunchichi mwene a o Iguputoolle aakhwa. Nave Aisraelaalle yaavirellella winlla ekaamba ya okaporwiiwoolle nave yaakhuwa wi ekaviheriwe, sika okhuwa wiwa wahiiweya wa Mulluku.

²⁴ Mulluku ahiiwa okhuwa wiwanko nave ahuupuwella echipanganwaaye apanganilleeye ni Abrahamu, Isaki ni Yakobo.

²⁵ Sika Mulluku aawoona Aisraelaayo nave aamoriwa ethakaraka.