Eksodo 17 - Mawu a Mulluku

Maaddi ookhuma munllukuni

¹ Aisraele attheenaalle yaavenyawo o echipululu ya Sini wulle nave yaamoona weeta ovenyera va makonello mamodda ophiyera va makonello mamoddattho moollikana ni mmo Apwiya yalamulelliiwa. Vano yaatthipella misasa o Refidimu nave khewaari maaddi oowirya.

² Vano athwaayo yahaamba okangana ni Mose nave yaallota wi, “Nivaheni maaddi oowirya.” Mose ahaakoha wi, “Kaambiiwa tini munakanganeenyu ni miyaano? Kaambiiwa tini munaweeseenyu Apwiya?”

³ Koma athwaalle yaakhalla ni nthona wunchichi nave yaakhupanyella wa Mose ellota wi, “Kaambiiwa tini mwanikhumihelleenyu o Iguputo wi muniiphe ni nthona, hiyaano ni aniihu vamodda ni eziweto ddahu?”

⁴ Sika Mose aavekella wa Apwiya mookhuwa allota wi, “Ethiyo keerena tini athu yaalla? Alliwaalla ehannlle vang'ono okivokha malluku.”

⁵ Vano Apwiya yaamulleella Mose wi, “Waakusewo oohoollella amodda a Aisraele, mwakhalle vahoollo va athwaayo. Nave okuse ekopo elle wawashunlleewena maaddi a m'muhinjeni wa Nailo nave oyeewo.

⁶ Miyaano kinaakhalle vahoollo vawo vanllukuni vamwaangoni wa Horebu. Wawashulle nllukunno nave munllukunimmo muneerokhuma maaddi wi athwaayo ewirye.” Mose aheera ddennddo vamiitthoni va oohoollella a Aisraele.

⁷ Nipuronno yaanivaha nnddina nawi Masa navettho Meriba, ekaamba yawi Aisraele yaakangana ni Mose nave yaaweesa Apwiya vawaakohani wi, “Ethiyo Apwiya eri ni hiyaano apaalle iyaayi?”

Aisraele enaagonjiha Aamaleke

⁸ Nave Aamaleke yaawa o Refidimu wi ewane ekhoto ni Aisraele.

⁹ Mose aamulleella Yoswa wi, “Nitthoollelle allopwana amodda, osiisello muye mwawane ekhoto ni Aamaleke. Miyaano kineerewiimella vaddullu va mwaango, kiphareelle ekopo ya Mulluku.”

¹⁰ Yoswa aheera moollikana ni mmo Mose amulamulelleeye, aaya wi awane ekhoto ni Aamalekaayo. Enthawi yeeyo Mose, Aroni ni Huri yaawella vaddullu va mwaango.

¹¹ Mose atukhullella muddullu mattaaye, Aisraele yaanapambana ekhotweeyo koma akitthiha matta, Aamaleke sika yapambana.

¹² Koma matta a Mose etopille, Aroni ni Huri yaakusa nlluku emususera Mose wi akeraatthelle. Athu eellaayo yaakhalla mmodda nngu ni mmoddattho nko emuphareelle Mose matta. Yaamuphareella matta ophiyera ovollowa wa nndduwa.

¹³ Nave Yoswa ahaatthollosa Aamaleke ni nsupada.

¹⁴ Vano Apwiya yaamulleella Mose wi, “Ddenndda muddilembe munibukhuni wi dduupuwelliweke nave mullote vamiitthoni va Yoswa wi kineerothiimiha nnddina na Aamaleke.”

¹⁵ Nave Mose aamaka nikuwa aanivaha nnddina nawi, “Apwiya sika embenderaaka.”

¹⁶ Aallota wi, “Tukhullellani muddullu embendera ya Apwiya! Apwiya eneerovirellella owana ekhoto ni Aamaleke wa enthawi yoohimalla.”