Eksodo 15 - Mawu a Mulluku

Nchipo na Mose

¹ Vano Mose ni Aisraelaalle yahiipa nchipo wa Apwiya wi, “Kinapaalla kiwiipelle Apwiya ekaamba yawi aapambana mootitimiheya, ahaavokhella mu enyanja akavalo ni oowellavo.

² Apwiya sika masivaaka ni ekophollo ddaka, alliwa tti oovullusaaka. Alliwa tti Mullukwaaka nave kineerewaatitimiha, tti Mulluku a attiitthaaka nave kineerewaatthamalla wunchichi.

³ Apwiya tti mullupa akhoto, Apwiya sika nnddina niwa.”

⁴ “Apwiya yaavokhella mu enyanja magareta ni akhoto a Farao, yahaapwiniha oohoollellaaye aphaama wunchichi mu Enyanja Yoofiira.

⁵ Maaddi a enyanja yoowallamelleeyo yahaahuruwella attheene, yaapwina ophiyera vatthi va enyanja wonanko nlluku.

⁶ Nyu Apwiya, nnattanatta nanyu tti nootitimiheya, ekaamba ya masiviiwa, Apwiya, nnattanatta nanyu ninnaanyenya adani.

⁷ Munnaagonjiha adanaanyu ni ntitimiho nanyu nuullupalli, osha murima wanyu onnawoosa wonanko mittatthi.

⁸ Mwaaviddeellelleenyu maaddaalle, yahuukellana vanipuroni nimodda, maaddi oothamaka yahiimella wonanko esiri, embali yoowallamella ya enyanja yaari yoollipa.

⁹ Mudanoolle aallota wi, ‘Kineerewaathwara nave kineerewaaphara, kineerokawa eyuumiiwa nave murimaaka oneerokwakhwanihiwana, kineerokhumiha nsupada nave kineerowoononga ni nnatta naka.’

¹⁰ Koma mwahaaviddeellella ni ephevwaanyu nave enyanja yahaamirya, yaapwina wonanko mukoko ophiyera vatthi va maaddi awoopiha.”

¹¹ “Nyu Apwiya, ethiyo vookhalla mulluku mmodda oophwanaphwana ni nyuwaano? Ttaani ari wonanko nyuwaano, ootitimiheya ekaamba ya weella wanyu? Ttaani ari wonanko nyuwaano vaweerani mitteko dda masiva ni ddoottikhiniha?

¹² Mwaatthoonyiha nnattanatta nanyu, nave ethaya yahaamirya.”

¹³ “Koma athu ayo mwawoopollilleenyu, mwahaahoollella ni echikondaanyu yoohimalla, mwahaahoollella ni masivaanyu, oya onipuroni nanyu naweella.

¹⁴ Mitundu ddimodda ddahiiwa nave ddaatthukumella, woova wunchichi wohaaphara Afilisti.

¹⁵ Sika vano mamwene a o Edomu aatathilla murima, oohoollella a o Mowabu ahaamba otthukumella, athu attheene enakhalla o Kanani aakukhumuwa.

¹⁶ Attheenaayo ennoova wunchichi. Ekaamba ya masivaanyu muullupalli, alliwaayo eri ellapo tuu wonanko nlluku, ophiyera athwaanyu, nyu Apwiya, eviralle, athu mwawooponlleenyu wuukaporoni.

¹⁷ Munnaavollochiha nave munnaahiya vamwaangonaanyu, vanipuroni mvo nyu Apwiya mwapangilleenyu wi mukeraattheyevo, mu enyumbaanyu eyo mwayimakelleenyu.

¹⁸ Nyu Apwiya, muneerokhalla mwene wa enthawi yoohimalla.”

Nchipo na Miriyamu

¹⁹ Mvo akavalo a Farao ni magareta ni oowella va akavalo yavollowilliiwa mu enyanja, Apwiya yahaahokollosella maaddaayo nave yaaweeriha attheenaayo wi epwine. Koma Aisraele yaheeta vawumma muwari mwa enyanjeeyo.

²⁰ Vano Miriyamu, namallotella aamutthiyana, murokoriye a Aroni, aamukusa maasa nave atthiyana attheene yaamuthwara vatulli ewiipaka amaasiiwa, yiinaka.

²¹ Nave Miriyamu aawiipella alliwaayo nchipo nawi, “Wiipelleni Apwiya ekaamba yawi aapambana mootitimiheya, ahaavokhella mu enyanja akavalo ni oowellavo.”

Maaddi oowaawa

²² Vano Mose ahaahoollella Aisraele ovenyera o Enyanja Yoofiira wulle eya yavollowa mu echipululu ya Shuri. Yaheeta mwemmo mallapo mararu, oohiphwanya maaddi.

²³ Nave yaaphiya o Mara koma wenko maaddiiwa yaari oowaawa, mwawi kheyaaworille waawirya. Sika ekaambiiwa nipuronno yanivahilliiwa nnddina nawi Mara.

²⁴ Nave athwaalle yaakhupanyella wa Mose, emukoha wi, “Ethiyo hiyaano ninaawirye tini?”

²⁵ Sika Mose aavekella moollipiha wa Apwiya nave Apwiya yaamooniha mwanakopo. Mose aavokha mwanakopooyo m'maaddini nave maaddaayo yaahiya owaawanko. Wenko Apwiya yahaavaha athwaayo malamulo ni ehuddiho nave aaweesattho.

²⁶ Yaallota wi, “Mwaakiiwellellaka mi Apwiya Mullukwaanyu, muneera ddoolungama ni opwatha malamulwaaka ni wiiwellella nnddo kinuuhuddiheemini, nguullakani ni erive ereta eyo kaallakilleemina Aiguputo. Mi tti Apwiya ayo enuuchirihani.”

²⁷ Vatulli viwa yaaphiya o Elimu nko waari aneetuutu khumi ni eelli ni miteekho dda kanjeza 70. Nave yaatthipella misasa ddiwa vakhuviru ni mvo vaari maaddi.