Eksodo 14 - Mawu a Mulluku

Aisraele enallapuwa Enyanja Yoofiira

¹ Vano Apwiya yaallota wa Mose wi,

² “Alleelle Aisraele wi ehokollowe, yatthipelle misasa vahoollo va Pihahiroti, variyari va Migidoli ni enyanja, moowehana ni Baala Zefoni, mukhwipi mwa enyanja.

³ Vano Farao anaaganizeke wi, ‘Aisraele aahollowa, enimoona weeteeta mwiillaponimmo ehuruwelliwa ni echipululu.’

⁴ Kineeromummiha murima Farao nave aneerewaathwara Aisraelaayo. Koma kineeromugonjiha Farao ni akhotwaaye attheene wi kititimihiwe nave Aiguputo attheene eneerodduwella wi mi tti Apwiya.” Vano Aisraele yaheera ddittheddene moollikana ni mmo Apwiya yaalleellelliiwa.

⁵ Farao iiwalleeye wi Aisraele aathawa, olliye ni enduna ddaye ddittheddene, yaasintha maganizwiiwa dda Aisraelaayo. Yaallota wi, “Ethiyo hiyaano vaava neerillevo tini voowaakhullellani Aisraele wi ethawe ehiya onirumeyella?”

⁶ Vano Farao aanikhozekelliha nigareta naye nakhoto nave ahaalleella akhotwaaye wi eyeewo nimodda.

⁷ Aakusa magareta aphaama wunchichi 600 ni magareta mamodda mattheene nave aakeraatthiha oohoollella va magareta mattheenaayo.

⁸ Apwiya yaamummiha murima Farao, mwene a o Iguputo nave olliye ahaathwara Aisraele ayo yavenyillewo mookotella.

⁹ Aiguputwaayo, sika wi, akavalo ni magareta a Farao, oowella va akavalo ni akhoto a Farao, yahaathwara Aisraelaalle eya yaaphwanya vanipuroni valle yatthipenlliiwa misasa, mukhwipi mwa enyanja, vakhuviru ni Pihahiroti, moowehana ni Baala Zefoni.

¹⁰ Vano Farao aatamelle, Aisraelaalle yaawoona Aiguputwaalle yaathwaraka nave yahoova wunchichi, yaambella winlla mookhuwa wa Apwiya.

¹¹ Yaamukoha Mose wi, “Ethiyo tti ekaamba yawi o Iguputo khewaari nipuro na mahame nyuwaano muniphiyihalleenyu o echipululu wuno wi nikhwellewo? Muneerille tini onikhumiha mu Iguputo?

¹² Ethiyo hiyaano nihinavenye o Iguputo, khenaawuulleelleni khalle dda ddenndda? Hiyaano naallota wi, ‘Munihiye, nikhalleve akaporo a Aiguputo.’ Ddeerokhalla phaama wa hiyaano okhallave akaporo ohiyana ni wi nikhwelle o echipululu wuno.”

¹³ Vano Mose aawaakhulla athwaayo wi, “Muhoove! Llipani murima nave mweerekemoona oweha mmo Apwiya enaawuuvulluselleniiwa. Vawi Aiguputo ayo munawooneenyu ollello, khamuwa muwoonattho.

¹⁴ Apwiya sika enuuwanelleni ekhoto nave nyuwaano khemweeravo ello.”

¹⁵ Vano Apwiya yaamukoha Mose wi, “Ethiyo kaambiiwa tini oninllelleewe mookhuwa wa miyaano? Alleelle Aisraele wi yeeteke oya muhoollo.

¹⁶ Tukhullella ekopwaaweeyo muddullu nave oyitthoonyihelle vanyanjani nave maaddi eneerokawaneya wi Aisraele ellapuwe vawumma.

¹⁷ Kineerewummiha murima Aiguputwaayo, sika wi eneerewaathwara Aisraele. Nave vaweerani ddiiddo kineeromugonjiha Farao ni akhotwaaye, magaretaaye ni oowella va akavalo wi kititimihiwe.

¹⁸ Aiguputwaayo eneerodduwella wi mi tti Apwiya, yaawoonaka mmo kinaamugonjihelleemi Farao ni magaretaaye ni oowella va akavalo.”

¹⁹ Vano mungelo a Mulluku, oyo aahoollella Aisraelaalle aaya akhalla otulli wiwa. Nave opoto amurapo oyo akhallesa vahoollo viwoolle, aaya akhallattho mutulli mwiwa.

²⁰ Opoto amurapo aari variyari va Aiguputo ni Aisraele. Vano opoto amurapo aawiiha epiphi wa Aiguputo nave aawiiha owala wa Aisraele, mwawi milloko miillinnddo kheddaawaatamanne mahiiyu mattheene.

²¹ Sika Mose aatthoonyiha nnatta naye vanyanjani nave Apwiya yahoopiha ephevo yuullupalli yoovenyera wookhuma nndduwa, eyo yoopille mahiiyu mattheene nave yahummiha enyanjeeyo. Maaddaayo yaakawaneya

²² nave yaari wonanko esiri onnattanatta ni wuunyotthoni, mwawi Aisraele yaallapuwa vawumma.

²³ Aiguputwaalle yahaathwara Aisraelaayo ophiyera ovollowana mu enyanja mulle. Akavalo attheene a Farao yaavollowa mu enyanja ni magaretaaye ni oowella va akavalo.

²⁴ Vano ohinase, oyaaka ni osa, Apwiya yaariiwa mu opoto amurapo ni amunllo, enaaweha akhoto a Aiguputo nave enaaweeriha akhotwaayo wi epaneye.

²⁵ Magudumu a magaretiiwa yaaddalla ni matokwi mwawi magaretaayo yaaneeta mookatamiha. Vano Aiguputwaalle yaallota wi, “Hankoni naathawe Aisraelaalla, ekaamba yawi Apwiya ennaawanella ekhoto, ollipana ni hiyaano.”

²⁶ Vano Apwiya yaamulleella Mose wi, “Tthoonyihella nnatta nawo onyanjaninko wi maaddaayo ekumanelle ni waamirya Aiguputwaayo ni magaretiiwa ni oowella va akavalo.”

²⁷ Nave aatthoonyihella nnatta naye onyanjani nave oyaaka ni osa, maaddaayo yaari ehokollweellaka m'mapuroni mwiwa. Aiguputo yaheeseesa wi ethawe koma Apwiya yahaahokollosa ni waakakhella munyanjanimmo.

²⁸ Nave maaddaayo yaakumanella, emirya magaretaalle ni oowella va akavalwaayo, mulloko muttheene wa akhoto a Farao olle waathwara Aisraele. Khaarivo naari mmodda avulluwalle.

²⁹ Koma Aisraele attheenaalle yaallapuwa enyanjeeyo vawumma, maaddi yiimenlle wonanko esiri onnattanatta ni wuunyotthoni.

³⁰ Sika va nllapo nenno Apwiya yahaavullusa Aisraele m'mattani mwa Aiguputo. Aisraele yahoona mitembo dda Aiguputwaayo ddikakhelliwaka mukhwipi mwa enyanja.

³¹ Yahoona masiva muullupalli ayo Apwiya yoonihalliiwa vawaagonjihani Aiguputwaalle. Sika yahaamba owoova Apwiya nave yaanaakhulupilila Apwiyaayo ni Mose oorumeyelliiwa.