Eksodo 13 - Mawu a Mulluku

Omuvelleella mwaana aamullopwana awaamba wa Apwiya

¹ Apwiya yaallota wa Mose wi,

² “Waavelleelle anamwani aallopwana awaamba attheene wa miyaano. Variyari va Aisraele, arive mwaana aamullopwana awaamba a muthu apaalle a enama, tti aaka.”

Ehakallallo ya Buledi Oohikhalla ni Yisiti

³ Vano Mose ahaalleella athu wi, “Muupuwelleke nllapo nno mwakhumalleenyu o Iguputo, mu ellapo ya okaporo kaambiiwa Apwiya yahuukhumihani ni nnatta niwa namasiva. Muhiche erive ello yookhalla ni yisiti.

⁴ Ollello, nllapo na okhuma wanyu mu Iguputo, tti na mu mweeri wa Abibu.

⁵ Apwiya yaallupella wa makhollwaanyu wi eneerewuuvahani ellapo ya Akanani, Ahiti, Aamori, Ahivi ni Ayebusi. Ellapo yeeyo tti yooddalla ni mukaka ni enwi. Yuuvollochihani mu ellapo yeeyo, musungeke ehakallallo yeella mu mweeri yoolla.

⁶ Wa mallapo matthanu ni meelli, mumucheke buledi oohikhalla ni yisiti nave va nllapo naneetthanu ni piillinno vikhalleke ehakallallo yowaallapella Apwiya.

⁷ Mumucheke buledi oohikhalla ni yisiti wa mallapo matthanu ni meelli. Vihikhalle buledi ookhalla ni yisiti apaalle yisiti mu echigawaanyu ettheeneeyo.

⁸ Va ehakallallo yeeyo mwaatthopoollelleke aniinyu wi, ‘Nineera ddittheddenenndda ekaamba ya nnddo Apwiya yaneerelliiwa navenyaahu o Iguputo.’

⁹ Ehakallallo yeella enaakhalle wonanko echizindikiro yoomakiwa va nnatta nanyu apaalle yawuupusella yoomakiwa vayuuchini vanyu wi malamulo a Apwiya khewa evenyaka vayanoni vanyu kaambiiwa olliye ahuukhumihani o Iguputo ni nnatta naye namasiva.

¹⁰ Musungeke ehakallallo yeella va enthawi yawi ddiidda muyakha ni muyakha.

Omoopolla mwaana aamullopwana awaamba

¹¹ “Apwiya eneerewuuvollochihani mu ellapo ya Akanani eyo yallupenlliiwa wa nyuwaano ni makhollwaanyu. Yuuvahani ellapo,

¹² mumuvelleelleke wa Apwiya arive nankhoro awaamba. Anankhoro awaamba a eziweto ddanyu tti a Apwiya.

¹³ Koma mwaanabulu aamullopwana awaamba, mumoopolleke voomwaakakhanihani ni mwaanaankhosa. Koma mwahipaallaka omoopolla, mumunyokotholleke nikohi. Mumoopolleke arive mwaana aamullopwana awaamba.

¹⁴ Muhoollo, aniinyu yuukohani wi, ‘Ethiyo ddenndda ddinattaphullella tini?’ Vano nyuwaano muwaakhulle wi, ‘Apwiya yaanikhumiha o Iguputo, mu ellapo ya okaporo ni nnatta niwa namasiva.

¹⁵ Farao ummihalle murima, aanikhootiha ovenyawo. Vano Apwiya yaamwiipha arive mwaana aamullopwana awaamba a Aiguputo attheene, athu ni a eziweto. Sika ekaamba ya yeella, arive nankhoro a enama awaamba ninnamuvelleella wa Apwiya. Koma aniihu aallopwana awaamba ninnawoopolla.’

¹⁶ Yeella enaakhalle yawuupusella, wonanko echizindikiro yoomakiwa va nnatta nanyu apaalle vayuuchini vanyu kaambiiwa Apwiya yaanikhumiha o Iguputo ni nnatta niwa namasiva.”

Opoto amurapo ni amunllo

¹⁷ Farao awaakhullelle Aisraele wi evenyewo, Mulluku khaawaahoollelle wi eyeelle ettilla yooya o ellapo ya Afilisti naari ettilla yeella yaari yoophadda. Vawi Mulluku aallota wi, “Nginapaalla wi athu yaalla esinthe maganizwiiwa wi ehokollweellewottho o Iguputo, yaakumanaka ni ekhoto.”

¹⁸ Munipuroni mwiwa Apwiya yaaweeriha wi eyeelle ettilla yoorekama ya mu echipululu yooya o Enyanja Yoofiira. Mutthemwenemmo Aisraele yaari ekhozekenlle dda ekhoto.

¹⁹ Mose aakusa makhuva a Yosefe, ekaamba yawi Yosefooyo aari aallupellihalle khalle Aisraelaalle voollotani wi, “Ddawoona, Mulluku aneerewuuweherani phaama nave vano muneerotukhulla makhuvaaka mwaatthaamaka wuno.”

²⁰ Aisraele yaavenyawo o Sukoti, eya yatthipella misasa ddiwa o Etamu, mukhwipi mwa echipululu.

²¹ Enthawi yootthaana Apwiya yaanaahoollella ni opoto amurapo nave enthawi ya mahiiyu, yaanaahoollella ni opoto amunllo, waamolleella ettilla wi yeeteke otthaana ni mahiiyu.

²² Sika enthawi ddittheddene opoto amurapo aanaahoollella athu otthaana nave opoto amunllo aanaahoollella mahiiyu.