Eksodo 11 - Mawu a Mulluku

Yoottikhiniha yaneekhumi: Okhwa wa anamwani aallopwana awaamba

¹ Vano Apwiya yaamulleella Mose wi, “Vano ohanlle omullaka omodda Farao ni Aiguputo. Nave vatulli viwa va ollaka wonngu aneerowaakhullellani wi muvenyewo. Ddawoona aawaakhullellakani wi muvenyewo, aneerowiikarani attheene.

² Vano alleelle athu, arive mullopwana ni arive mutthiyana wi aveke wa Aiguputo awaatamanana enyumba ddawiireerihana, ddasiliva ni ddagolide.”

³ Nave Apwiya yaaweeriha Aiguputwaalle wi ekhalle ooreera murima wa Aisraele. Ello emoddattho yaari yawi Mose aari muthu oovuwa wunchichi mu ellapo ya Iguputo, vamiitthoni va enduna dda Farao navettho vamiitthoni va athu attheene.

⁴ Vano Mose aamulleella Farao wi, “Apwiya enallota wi, ‘Kineerewaapheella mu Iguputo variyari va mahiiyu,

⁵ nave arive mwaana aamullopwana awaamba a Aiguputo aneerewiiphiwa mu Iguputo mutthemwenemmu. Waambeella mwaana aamullopwana awaamba a Farao, oyo anaphwanella ovollowa omwene, aneerewiiphiwa, ophiyera mwaana aamullopwana awaamba a kaporo aamutthiyana oyo anasilla vansilloni. Mwaana aamullopwana awaamba a eziweto aneerokhwattho.

⁶ Mu ellapo ettheene ya Iguputo muneerokhalla winlla wuullupalli nko khoniiweyekevottho waambeella khalle nave khowa wiiweyakavottho.

⁷ Koma variyari va Aisraele naari mwanapwa khawa amuuwaka muthu apaalle erive echiweto wi mudduwelle wi Apwiya ennaahiyaniha Aiguputo ni Aisraele.

⁸ Vano enduna ddanyu ddittheddene ddineeroowa wa miyaano wi ddikikokhorelle nave ddineerollota wi, “Venyaniwoni wuno nyu ni athwaanyu attheene!” Sika vatulli viwa, kineerovenyawo.’ ” Nave Mose aavenyawo wa Farao wulle ashille murima wunchichi.

⁹ Apwiya yaamulleella Mose wi, “Farao khawiiwellella weyaano wi miyaano keere ddoottikhiniha ddinchichi mu ellapo ya Iguputo.”

¹⁰ Sika Mose ni Aroni yaheera ddoottikhiniha ddittheddenendda vamiitthoni va Farao. Koma Apwiya yaamummiha murima Faraooyo nave khaawaakhullelle Aisraelaayo wi evenyemo mwiillaponi mwaye.