Eksodo 10 - Mawu a Mulluku

Yoottikhiniha yaneetthanu ni raru: Nazombe

¹ Vano Apwiya yaamulleella Mose wi, “Oye wa Farao. Kohummiha murima wa Farao ni wa enduna ddaye wi kiwoonihe ddoottikhiniha ddittheddenenndda variyari viwa

² wi nyuwaano mwaalleelleke aniinyu ni edduullu ddanyu dda mmo kaweerelleemi ekuku Aiguputo vaweerani ddoottikhiniha variyari viwa. Sika attheenenyu muneerodduwella wi mi tti Apwiya.”

³ Mose ni Aroni yaaya wa Farao yamulleella wi, “Apwiya Mulluku a Aheberi, anakoha wi, ‘Ethiyo onaakhooteve wiiyeviha vamiitthoni vaka ophiyera niini? Owaakhullelle athwaaka evenyewo wi eye yakillapelle.

⁴ Waahiwaakhullellave wi evenyewo, osiisello kineerommoriha nazombe mwiillaponi mwawo

⁵ nave ethaya ettheene eneerohuruwelliwa ni nazombooyo wi ethayeeyo ehooneyettho. Aneerocha ddeko ddittheddene nnddo ddahoonongeye ni marallalla. Aneerocha miteekho nnddo ddinaphuwella wiilli.

⁶ Nave enyumba ddawo, dda enduna ddawo ni dda athwaawo, ddittheddene ddineeroddalla ni nazombeve, eyo eri ello yawi naari attiitthaanyu apaalle makhollwaanyu khenaddooneke ephatuwellwiiwa.’ ” Vano Mose aavenyawo wa Farao.

⁷ Enduna dda Farao ddaamukoha wi, “Ethiyo muthu yoolla anaahiye niini onihoosa mwawi ddiidda? Waakhullelleni athwaayo evenyewo wi eye yaallapelle Apwiya Mullukwiiwa. Ethiyo khemunoona wi vano ellapo ya Iguputo yoomalla woonongeya?”

⁸ Sika Farao aamwiithanihattho Mose ni Aroni aalleella wi, “Khawekeni mwaallapelle Apwiya Mullukwaanyu. Koma vano anaayeewo ttaani?”

⁹ Nave Mose ahaakhulla wi, “Attheenehi, anamwani ni attekweene nineeroyaawo. Ninaayeewo ni aniihu aallopwana, aniihu aatthiyana, enkhosa, epuri, abulu ni eng'ombe ddahu ddene, ekaamba yawi nineereweera ehakallallo yowaallapella Apwiya.”

¹⁰ Koma Farao ahaalleella wi, “Kinimallupella vamiitthoni va Apwiya Mullukwaanyu wi ngiwaakhullellani wi mwaakuse aniinyu ni awarinyu. Kinnadduwella wi nyuwaano mookhalla ni yoolinga yoonanara m'murimani mwanyummo.

¹¹ Ata! Nyuwaano, allopwana sika munaaye wi mwaallapelle Apwiya vawi nnddo sika munapaalleenyu.” Vano Mose ni Aroni yahiikariwa vamiitthoni va Farao.

¹² Vano Apwiya yaamulleella Mose wi, “Tukhullella nnatta nawo va ellapo ya Iguputo wi nazombe awe nave ache ddoomella ddittheddene nndde marallallaalle yahoonongilliiwa.”

¹³ Vano Mose aatukhullella ekopwaaye va ellapweeyo nave Apwiya yahaambiha ephevo yoovenyera wookhuma nndduwa wi yoope va ellapo ettheene ya Iguputo otthaana ni mahiiyweene. Osaka wene, nazombe aari virive veko.

¹⁴ Aaddalla va ellapo ettheene ya Iguputo. Waata wa nazombooyo waari wawi khawunooneyekettho waambeella khalle nave khawiwa wooneyakattho.

¹⁵ Aahuruwella ellapo ettheene nave ethaya ettheene yaaripa ekaamba ya nazombooyo. Aacha erive ello yoomella muthayani ni ezipaso dda m'miteekhoni ddahoonongiwe ni marallallaalle. Kheyaarivo ello ekitthi yahallille vamuteekhoni apaalle yoomella mu ellapo ettheene ya Iguputo.

¹⁶ Vano Farao aamwiithana Mose ni Aroni mwawaakuva aalleella wi, “Kohaachimwella Apwiya Mullukwaanyu nave kohuulakwellanittho.

¹⁷ Koma vano pepaani, mukikhululukelle va enthawi yeellave nave muvekelle wa Apwiya Mullukwaanyu wi ekivenyihelle ollaka wawoopihanngu.”

¹⁸ Mose aavenyawo wa Farao wulle, aya avekella wa Apwiya.

¹⁹ Apwiya yaatthattusa ephevweeyo ekhalla ephevo yawoopiha yoovenyera woovollowa nndduwa nave yaamuthamakihella nazombooyo o Enyanja Yoofiira. O Iguputo wulle khewaahallillettho naari nazombe mmodda.

²⁰ Koma Apwiya yaamummihave murima Farao nave khaawaakhullelle Aisraele wi evenyewo.

Yoottikhiniha yaneetthanu ni sese: Epiphi

²¹ Vano Apwiya yaamulleella Mose wi, “Tukhullella nnatta nawo muddullu wi vikhalle epiphi yawoopiha wunchichi va ellapo ettheene ya Iguputo.”

²² Sika Mose aatukhullella nnatta naye muddullu nave waamora epiphi yawoopiha wunchichi wa mallapo mararu mu ellapo ettheene.

²³ Aiguputwaayo kheyaaworattho woonana nave khaarivo naari muthu mmodda asusalle vamullakoni vaye wa mallapo mararu mattheenaayo. Koma nko wakhalla Aisraele khawaari epiphi.

²⁴ Vano Farao aamwiithana Mose amulleella wi, “Khaweni mwaallapelle Apwiya. Muyeenawottho awarinyu ni aniinyweene. Koma enkhosa ddanyu, epuri ddanyu, abulwaanyu ni eng'ombe ddanyu ddene ddineerosungiwa weewuno.”

²⁵ Mose aallota wi, “Vanothi nyuwaano sika munaanivahe eziweto ddoovelleellella mukutho wooshellelliha wa Apwiya Mullukwaahu.

²⁶ Koma nineerokusa eziweto ddahu nave wuno khohalla naari echiweto emodda. Vawi ninaphwanella wi natthoolle eziweto ddawaarumeyellana Apwiya Mullukwaahu. Nave khaninadduwella ddoophwanella ophariha mutteko vawaallapellani Apwiya ophiyera niphiyalle wenko.”

²⁷ Koma Apwiya yaamummihave murima Farao nave khaawaakhullelle athwaayo wi evenyewo.

²⁸ Vano Farao aamulleella Mose wi, “Kivenyerevo! Chenjera nave ohiphiyettho vamiitthoni vaka vawi nllapo nno kineereemi kiwoone kinimawiipha.”

²⁹ Mose ahaakhulla wi, “Ddawoona moollikana ni mmo mullotelleenyu, ngiwa kiwoonakanittho.”