Eksodo 1 - Mawu a Mulluku

Aisraele enahoosiwa o Iguputo

¹ Anamwani aallopwana a Yakobo ayo yakelle o Iguputo ni olliyooyo ni mabanjiiweene yaari,

² Rubeni, Simeoni, Levi, Yuda,

³ Isakara, Zebuloni, Benjamini,

⁴ Dani, Nafutali, Gadi ni Ashere.

⁵ Yosefe aari akeraattheye khalle o Iguputo. Echiwerengero ya athu ooyariwa mwa Yakobo yaari 70.

⁶ Vano Yosefe aakhwa nave asinne ni mbadwiiwa muttheenoolle yaakhwattho.

⁷ Koma Aisraele, edduullu ddiwa, yahaayara anamwani anchichi. Yaaruuwa, yahaata ekhalla amasiva manchichi nave eddalla ellapweeyo.

⁸ Vatulli viwa o Iguputo waavollochihiwa mwene mmodda oyo ahimudduwellille Yosefe.

⁹ Mwenooyo ahaalleella athwaaye wi, “Aisraelaalla ennaatesa nave tti amasiva manchichi onikhwaranya hiyaano.

¹⁰ Nave ngiiwesesani, hiyaano neerena mweezeru athu yaalla. Naachenjerelle wi ehivirellelle waata kaambiiwa enthawi ya ekhoto, alliwaalla ttuuwora ottakanyiherana ni adanaahu ni ollipana ni hiyaano, eneerothawamo mwiillaponi mwahummu.”

¹¹ Nave yahaahiyavo uullupalli a thangata owaaphariha mutteko Aisraelaayo mwa ekuku. Aisraele yaamumakella Faraooyo mizinda dda Pitomu ni Ramsesi, nko wasungiwa ddoocha.

¹² Koma alliwaayo yahoosiwiiwa wunchichi, yaanavirellella waata wi emwareyelle mu ellapo ettheeneeyo. Sika wi Aiguputo yaanawoova alliwaayo,

¹³ nave yaanaawatihera mwa ekuku ophara mutteko wa okaporo.

¹⁴ Okumi wa Aisraele waari wookatamiha ekaamba ya mutteko woovoreya wawoopa enjerwa navettho mitteko ddoohiyanahiyana dda m'matani. Yaanaawatihera mwa ekuku ophara mitteko ddittheddene ddootopiha.

¹⁵ Sika mwene a o Iguputoolle aallota ni Sifira ni Puwa, azamba ayo yaakavihera atthiyana a Eheberi vooyarani wi,

¹⁶ “Mwaawaayarihaka atthiyana a Eheberi, ayariwa mwaana aamullopwana, mwiipheni koma akhalla aamutthiyana, muhiyeni.”

¹⁷ Koma azambaayo yaanamoova Mulluku, mwawi mawu a mwenaalle kheyaawaapwathillettho, sika anamwani aallopwanaayo yaanaahiya ni okumi.

¹⁸ Vano mwenoolle aawiithana azambaalle ni waakoha wi, “Ethiyo kaambiiwa tini mwaahiyalleenyu ni okumi anamwani aallopwana?”

¹⁹ Azambaalle yaamwaakhulla wi, “Atthiyana a Eheberi khenaphwanaphwana ni atthiyana a Aiguputo. Atthiyana a Eheberi tti amasiva vawi muzamba ahinaphiye, alliwa enakhalla emuyarille mwaana khalle.”

^20-21 Sika Mulluku aaweerella ddaphaama azambaayo nave ekaamba yawi azambaayo yaanamoova Mulluku, ahaavaha anamwani. Nave Aisraele yaavirellellave oruuwa, waata ni okhalla amasiva manchichi.

²² Vano Farao ahaalamula athwaaye attheene wi, “Arive mwaana aamullopwana ooyariwa mwa Aheberi mumuvokhelleke m'muhinjeni wa Nailo koma anamwani attheene aatthiyana, mwaahiyeke ni okumi.”