Deuteronomo 9 - Mawu a Mulluku

Ohiiwellella wa athu

¹ “Ngiiwani nyu Aisraele! Muhanlle vang'ono ollapuwa muhinje wa Yordani ni waakha ellapo ya mitundu dda athu anchichi ni amasiva wuukhwaranyani nyuwaano. Mizinda ddiwa tti dda mipanda ddoorekama.

² Athwiine tti amasiva navettho oorekama, edduullu dda Anaki munaadduwelleenywaalle. Vawi mwahiiwa ddillotiwaka wi, ‘Ethiyo ttaani anaawore ollipana ni edduullu dda Anaki?’

³ Koma ollello mudduwelle wi Apwiya Mullukwaanyu sika anuuhoollelleni wonanko munllo wooshellelliha. Eneerewaagonjiha attheene vamiitthoni vanyu ophiyera muneerowiikariha ni waatthollosa mwawaakuva moollikana ni mmo Apwiya yalonjezelliiwa.

⁴ “Vano Apwiya Mullukwaanyu yawiikariha alliwaayo nyu muhilloteke ni murima wi yuuvollochihalleni ni wuuvahani ellapweeyo ekaamba ya echilungamwaanyu. Khe ddiiddo! Apwiya eneerowiikarellani athwaayo vamiitthoni vanyu kaambiiwa alliwaayo tti oonanara.

⁵ Khe ekaamba ya echilungamwaanyu apaalle oreera wa murimaanyu wi muneerewaakha ellapwiiwa koma tti ekaamba yawi athwaayo tti oochimwa sika Apwiya enawiikarelliiwa navettho wi Apwiya tti oororomelleya va echipanganwiiwa eyo yallupenlliiwa wa makhollwaanyu Abrahamu, Isaki ni Yakobo.

⁶ Vano dduwellani wi Apwiya khenuuvahani ellapo yaphaameella ekaamba yawi muri oolungama vawi nyuwaano muri athu awumma murima.

⁷ “Upuwellani nave muhitiwalle mulle mwaashihelleenyu murima Apwiya Mullukwaanyu muchipululuni. Ovenyera nllapo nne mwakhumalleenyu mu Iguputo ophiyera nllapo nno mwaphiyalleenyu wuno mookhalla mwaawukila Apwiya Mullukwaanyu.

⁸ Naari o mwaango wa Horebu mwaattatthamulla owalli wa Apwiya nave yahuushellani murima vawi yahanlle vang'ono owoonongani.

⁹ Miyaano kaawella mwaango wi kaakhelle malluku meelli mvo valembiwe echipangano eyo Apwiya yakeraatthihalliiwa ni nyuwaano. Kaakhalla omwaangoni wulle mallapo 40, otthaana ni mahiiyu nave ngaachille apaalle owirya erive ello.

¹⁰ Nave Apwiya yaakinnya malluku meellaalle mvo yalembilliiwa ni eyaalliiwa ddittheddene nnddo yallotilliiwa ni nyuwaano eri m'munlloni va nllapo nne mwatthukumanneenyu omwaangoni wulle.

¹¹ Ddawoona, vimanlle mallapo 40 Apwiya yaakinnya malluku meellaalle mvo yalembilliiwa echipangano.”

¹² “Sika Apwiya yaakilleella wi, ‘Akuva, kittha mwaango vawi athwaawo waakhumihalleewe o Iguputwaalle aachimwa. Aahiya mwawaakuva ddittheddene kaalamulelleemi wi eddeereke. Aaddoopella weekhiiwa nifano.’

¹³ “Apwiya yaavirellella ollota wi, athu yaalla kinnaadduwella wi tti awumma murima.

¹⁴ Vano ohikivaanyihe vawi kinapaalla kiwoononge nave khewa yuupuwelleya va ellapo yavatthi. Koma weyaano kineerewuutthattusa mutundu muullupalli ni wamasiva okhwaranya alliwaalla.

¹⁵ “Sika kaarukunuwa kikittha mwaango kitukhullalle malluku a echipangano meellaalle. Nave m'mwaangonimmo mwaanakhuma mallumi amunllo.

¹⁶ Kahoona wi mwahaachimwella Apwiya Mullukwaanyu vooddoopellani nifano na musaanaang'ombe. Mwaahiya mwawaakuva osunga malamulo ayo Apwiya yuulamulalleewani.

¹⁷ Sika miyaano kaavokhella vatthi mallukwaayo ni waapwesa nyuwaano moonaka.

¹⁸ Vano mallapo mamoddattho 40, otthaana ni mahiiyu, kaakokhora vamiitthoni va Apwiya nave kaavekella. Ngaachille apaalle owirya erive ello kaambiiwa mwaheera ddoonanara vamiitthoni va Apwiya vaweerani ddoonanara nave ddahaashiha murima.

¹⁹ Miyaano kaanoova osha murima wa Apwiya wawoopihanko ekaamba yawi yaaweerowoonongani. Koma enthawi yeeyo Apwiya yahiiwattho ovekella waka.

²⁰ Apwiya yaamushellattho murima Aroni vawi yahanlle vang'ono omwiipha koma kaamuvekellattho enthawi yeeyo.

²¹ Ello yoonanara mwayoopilleenyu, musaanaang'ombe, kaayivokhella vamunlloni. Nave kaayinyenyanyenya ni oyisillasilla nave kitathillella ntuura nene m'muhinjeni woovenyera m'mwaangonimmo.

²² “Nyu mwahaashiha murima Apwiya Mullukwaanyu mwaariinyu o Tabera, o Masa ni o Kiburoti Hatava.

²³ Nave Apwiya yuurumalliiwani ovenyera o Kadeshi Baranea wi mwaakhe ellapo yuuvahilleewani, nyuwaano mwahaawukila Apwiya Mullukwaanyu nave khemwaawaakhulupililalle apaalle wiiwellella mawiiwa.

²⁴ Mookhalla mwaawukilaka Apwiya ovenyera nllapo nno kuudduwenlleemini.

²⁵ “Sika kaakokhora vamiitthoni va Apwiya nave kaavekella mallapo 40, otthaana ni mahiiyu, ekaamba yawi yaasimikiza wi ewoonongeni.

²⁶ Nave kaavekella wa Apwiya wi, Nyu Apwiya Mulluku, pepaani muhiwoononge athu ayo mwaatthoollilleenyu wi ekhalle yoohallanaanyu. Athu yaalla mwaawoopolla nave mwahaakhumiha ni masivaanyu muullupalli o Iguputo.

²⁷ Wuupuwelleni oorumeyellaanywaalle, Abrahamu, Isaki ni Yakobo nave muhipwathe wumma murima wa athwaalla, onanara wiwa ni ochimwa wiwa,

²⁸ woova Aiguputo enaalloteke wi nyuwaano khemwaaworille waavollochiha athwaanyu mu ellapo eyo mwaalonjezilleenyu. Eneerekollota wi mwaakhumihalle athwaalla wi mwawiiphe o echipululu kaambiiwa mwahiitanana.

²⁹ Koma athwaalla mwahaatthoolla wi ekhalle yoohallanaanyu sika mwahaakhumiha ni masivaanyu muullupalli nave ni ekophollo ddanyu mu Iguputo.”