Deuteronomo 8 - Mawu a Mulluku

Waakhella ellapo yaphaama

¹ “Upuwellani wi mwiiwellelleke moororomelleya malamulo mattheene kuulamulalleemini ollellwaalla wi mukhalle ni okumi, mwaate nave mwaakhe mu ellapo eyo Apwiya yallupenlliiwa wa makhollwaanyu.

² Upuwellani mmo Apwiya Mullukwaanyu yuuhoollelliiwani muchipululuni va olendo wa miyakha ddittheddene 40 ddivirallenndda. Yahuukhumullani ni oweesani wi edduwelle nnddo ddaari m'murimani mwanyu nave wi yoone khaya muneerewiiwellella malamulwiiwa apaalle iyaayi.

³ Yahuukhumullani vawuuvollihani ettalla komattho yahuuvahani mana wi muche yoocha eyo nyuwaano ni makhollwaanyu mwahiyidduwenlleenyu waambeella khalle. Yaheera ddenndda wi yuuhuddiheni wi muthu khanakhalla ni okumi ni yoochave koma ni mawu mattheene ookhuma muwano mwa Apwiya.

⁴ Ddoowara ddanyu khaddaahuwalle nave manyallwaanyu kheyiipalle naari vang'ono muchipululuni mulle va miyakha 40 ddittheddenenndda.

⁵ Dduwellani wi Apwiya Mullukwaanyu ennuullakani wonanko attiitthi enaallakelliiwa aniiwa.

⁶ Sika nyuwaano mweereke moollikana ni mmo Apwiya yuulamulalleewani vaweetani mu ettilla ddiwa nave muwooveke.

⁷ Vawi Apwiya Mullukwaanyu eneerewuuvollochihani mu ellapo yaphaama, ya mihinje, mathiya ni aneetuutu oovenyera m'mataponi ni m'miyaangoni.

⁸ Nave yookhallattho ni tirigu, barele, mpesa, namukuyu, makangaza, olivi ni enwi.

⁹ Wenko khamuwa muvolliwa ettalla nave khamuwa murama ello. Mikoko ddinnaphwanyeya m'mallukuni a wenko nave muneerekowora okata mukuwa m'miyaangoni mwiwa.

¹⁰ Muneerokhalla ni yoocha yookwakhwana nave muneerovona, sika vano muneerewaatitimiha Apwiya ekaamba yawi ahuuvahani ellapo yaphaama.”

Ochenjeziwa wi ehaatiwalleke Apwiya

¹¹ “Upuwellani nave muhaatiwalleke Apwiya Mullukwaanyu nave muhilepheleke owiiwellella malamulo ni malangizwiiwa mattheene ayo kinawinnyeemini ollello.

¹² Mwacha ni ovona, mwamaka enyumba ddaphaama wi mukhallekemo,

¹³ mwakhalla ni eng'ombe, enkhosa, epuri, siliva ni golide nave eyuumaanyu yavirellella woonjerereya,

¹⁴ muhiitukhulleke ni waatiwalla Apwiya Mullukwaanyu ayo yuukhumihalleni wuukaporoni o Iguputo.

¹⁵ Alliwa yahuuhoollellani ophiyera mwaakhwaranya echipululu yuullupalli ni yawoopiheelle, mulle mwaari enowa dda nttipwi ni analikalizi. Nave yahuuvahani maaddi ookhuma munllukuni mu ellapo yawumma yoohikhalla ni maaddi.

¹⁶ Yahuuvahani mana muchipululuni wi muche, yoocha eyo makhollwaanyu yahiyidduwenlliiwa wi yuuyeviheni ni oweesani wi vatulli viwa yuudaliseni.

¹⁷ Vano muhiganizeke wi masivavaanyu ni ekophollo ddanyu sika dduuvahilleni eyuuma.

¹⁸ Muupuwelleke nave muhaatiwalle Apwiya Mullukwaanyu wi sika enuuvahani masiva ookhallella ni eyuuma wi yoonihe ororomelleya wiwa ophiyera ollello va echipanganwiiwa eyo yallupenlliiwa ni makhollwaanyu.

¹⁹ Muhaatiwalleke Apwiya Mullukwaanyu ni orukunuwella wa milluku ddimodda wi muddillapelleke vawi kinuuchenjezani moollupella ollello wi mweera ddiiddo muneerotthollowa.

²⁰ Mwaahiwiiwellellaka Apwiya Mullukwaanyu, muneerewoonongeya wonanko mmo Apwiya enoonongelliiwa mitundu ddimodda vamiitthoni vanyu.”