Deuteronomo 7 - Mawu a Mulluku

Yoohallana ya a Apwiya

¹ “Apwiya Mullukwaanyu eneerewuuphiyihani mu ellapo eyo munaawaakheenyu nave mitundu ddimodda ddittheddene eneeroddiikarihamo. Alliwa eneerewiikarihamo mitundu mitthanu ni miilli ddookhalla ni athu anchichi ni amasiva wuukhwaranyani nyuwaano monga Ahiti, Agirigashi, Aamori, Akanani, Aperezi, Ahivi ni Ayebusi.

² Apwiya Mullukwaanyu yaavelleellaka athu yaalla m'mattani mwanyu nave mwaagonjiha, mwaatthollose attheenaayo navettho muhaattanena apaalle oweerella echifundo.

³ Nave muhitthellaneke ni alliwaayo nave muhaatthellaniheke aniinyu aatthiyana ni aniiwa aallopwana apaalle waatthellaniha aniinyu aallopwana ni aniiwa aatthiyana.

⁴ Vawi ttuwaahollosa aniinyu wi yaahiye Apwiya ni waamba ollapella milluku ddimodda. Sika mweera ddennddo owalli wa Apwiya oneerewuukharellani wonanko munllo nave eneerewuutthollosani.

⁵ Koma munipuroni mwene mwakumulle makuwiiwa, moononge mallukwiiwa oopatuleya, mwapwaramwase mafanwiiwa a Asherimu nave mwawoose mafanwiiwa oosema.

⁶ Nyuwaano tti mutundu woopatuleya wa Apwiya Mullukwaanyu vawi yahuutthoollani wi mukhalle athwiiwa variyari va athu attheene a va ellapo yavatthi.

⁷ Kheyaawuutthoonlleni ni wuukondani ekaamba yawi mwaari anchichi waakhwaranya athu amodda attheene vawi mwaari ooyevesesa variyari va mitundu ddittheddene.

⁸ Koma tti ekaamba yawi Apwiya yahuukondani nave ennasunga lonjezo yallupenlliiwa ni makhollwaanyu. Sika yaawoopollani ni masiviiwa muullupalli vawuukhumihani mu okaporo wa Farao, mwene a o Iguputo.

⁹ Ekaamba ya yeella upuwellani wi Apwiya Mullukwaanyu tti Mulluku mmoddave nave tti oororomelleya. Olliye aneerosunga echipanganwaaye nave aneerewooniha echikondi yoohisintheya wa athu a mibado ddooheerengeya dda ayo enamukonda olliye ni wiiwellella malamulwaaye.

¹⁰ Koma Mulluku aneerewaahokollosella ddoonanara voowoonongani attheene ayo eniitana ni olliye moohikayika.

¹¹ Sika muchenjere wi mwiiwellelleke malamulo ni malangizo mattheene ayo kinuulamuleemini ollello.”

Madaliso ekaamba yawiiwellella

¹² “Nave mwiiwellella ni othwara moororomelleya malamulo mattheene muwiiwalleenywaalla, Apwiya Mullukwaanyu eneerekosunga echipanganwiiwa eyo yakeraatthihalliiwa ni nyuwaano nave eneerovirellella ni echikondiiwa yoohisintheya moollikana ni mmo yallupenlliiwa wa makhollwaanyu.

¹³ Eneerewuukondani ni wuudalisani ophiyera mwaatille ni waayara anamwani anchichi. Eneeroddidalisa emata ddanyu vawuuvahani tirigu, vinyo ni makhura. Eneerewuudalisanittho vawuuvahani eziweto ddinchichi. Eneerewuuvahani ddittheddenenndda mu ellapo eyo yallupenlliiwa waavaha makhollwaanyu.

¹⁴ Va ellapo yavatthi khavikhalla mutundu woodalisiwa wonanko nyuwaano nave khaviwa viphwanyeya mullopwana apaalle mutthiyana oohiyara variyari vanyu navettho variyari va eziweto ddanyu.

¹⁵ Nave Apwiya eneerewuutetezani o erive ereta. Alliwa kheyaakhullella wi ereta ddawoopiha dda o Iguputo munaddidduwelleenyunndde dduumorelleni koma anaaddimorihelle va adanaanyu attheene.

¹⁶ Nave muddoononge moohimoriwa ethakaraka mitundu ddittheddene nnddo Apwiya Mullukwaanyu enaaddivelleelliiwa m'mattani mwanyu. Muhillapelleke milluku ddiwa vawi muneerophariwa m'musamphani.

¹⁷ “Muhillote m'murimani mwanyu wi athu yaalla ahaata wuukhwaranyani nyuwaano nave wi khemuwora owiikariha.

¹⁸ Muhiwoove alliwa koma muupuwelle nnddo Apwiya Mullukwaanyu yamweerenlliiwa Farao ni athwaaye.

¹⁹ Nave muupuwelle millilli ddawoopiha, ddoohoosa, ddoottikhiniha ni masiva muullupalli nndde moonilleenyu ni miitthwaanyu nnddo Apwiya yuukhumihalleniiwani. Athu attheene munawooveenywaalla Apwiya Mullukwaanyu eneerowoononga moollikana ni mmo yawoonongelliiwa Aiguputo.

²⁰ Navettho eneerewaarumihella enwi variyari viwa nave eneerowoononga athu attheene oohalla ni awiipittha.

²¹ Muhiwoove athu yaalla. Apwiya Mullukwaanyu eri variyari vanyu nave alliwa tti Mulluku muullupalli oophwanella omoova.

²² Apwiya Mullukwaanyu eneerowiikariha adanaanyu vang'ono vang'ono mwaawaatamellaka. Koma khamuwora waamalliha attheene enthawi emodda vawoovani wi enama ddamuhakani ddineerewaata ni waamba owoopopihani.

²³ Apwiya eneerewaavelleella adanaanyu m'mattani mwanyu nave eneerewaapallallesa ophiyera yoonongeyille attheene.

²⁴ Eneerewaavelleella mamwene mattheene m'mattani mwanyu nave muneerowiipha nave khewa yuupuwelleya. Khaavo anaawore wuuhiihani nave muneerowoononga attheene.

²⁵ Mwaashellellihe mafanwiiwa mattheene nave muhimusilile siliva apaalle golide oyo yamupangenlliiwa mafanwaayo. Muhiwe muddikusa ddenndda wi muhiphariwe m'musamphani vawi ddinnaananara Apwiya Mullukwaanyu.

²⁶ Muhiwe muvollowana mpa mwanyu ddenndda wi otulli oyo ori va alliwaayo ohuumorelleni. Mwiitane nave mwaavevulle mafanwaayo kaambiiwa Apwiya yahaatembelela.”