Deuteronomo 6 - Mawu a Mulluku

Lamulo nuullupalli

¹ “Vano alla tti malamulo ni malangizo mattheene ayo Apwiya Mullukwaanyu yakilamulalliiwa wi kuuhuddiheni. Nyuwaano ni edduullu ddanyu muthwareke ddenndda mu ellapo eyo munaavolloweenyumo ni waakha.

² Enthawi ettheene ya okumaanyu, nyu ni edduullu ddanyu, muwooveke Apwiya Mullukwaanyu nave mwiiwellelleke malamulo ni malangizwiiwa mattheene alla kinuulamuleemini wi enthawi ya okumaanyu erekame.

³ Vano nyu Aisraele, apellani maaru nave muchenjere ni wiiwellella ddawoona, malamulwaalla. Sika ddeko ddineeroweetellani phaama nave muneerokhalla mutundu muullupalli ni okhalla mu ellapo ya mukaka ni enwi moollikana ni mmo Apwiya Mulluku a makhollwaanyu yuulonjezelleewani.

⁴ “Nyu Aisraele, apellani maaru! Apwiya Mullukwaahu tti amoddave.

⁵ Nave mwaakondeke Apwiya Mullukwaanyu ni murimaanyu muttheene ni okumaanyu muttheene navettho ni masivaanyu mattheene.

⁶ Mwaasungeke phaama m'murimani mwanyu malamulo kinawinnyeemini ollellwaalla.

⁷ Mwaahuddiheke aniinyu ni ollota wiilliwiilli dda malamulwaalla mwakhalla owaninyu, mwakhalla voolendoni, vookonaatthini apaalle voovenyani.

⁸ Nave mwaamakellelleke wonanko echizindikiro va miwono ddanyu nave mwaahiyeke variyari va eyuuchi.

⁹ Nave mwaalembe va eferemu dda enyumba ddanyu ni va millako dda mipanda ddanyu.”

Ochenjeza dda ohiiwellella

¹⁰ “Apwiya Mullukwaanyu yallupenlliiwa wa makhollwaanyu, Abrahamu, Isaki ni Yakobo wi eneerewuuvahani nyuwaano ellapo ya mizinda dduullupalli ni ddeeyuuma nnddo nyuwaano mwahimakilleenyu.

¹¹ Vineerokhalla enyumba ddooddalla ni ddeko ddaphaama nnddo mwahihiyalleenyumo, ehime ddookatakata nave emata ddampesa ni dda olivi nnddo mwahaallilleenyu Apwiya yuuvollochihani mu ellapo yeella nave mwakhalla ni yoocha yinchichi

¹² muhiwe mwaatiwalla Apwiya ayo yuukhumihalleni o Iguputo, o okaporo.

¹³ Muwooveke Apwiya Mullukwaanyu ni waallapella yaayove nave mullupelleke mu nnddina niwave.

¹⁴ Muhillapelleke milluku ddimodda nnddo ddinallapelliwa ni athu ayo ewaapheelleni.

¹⁵ Vawi mweera ddennddo owalli wa Apwiya oneerewuukharellani wonanko munllo nave eneerewuutthollosani va ellapo yavatthi kaambiiwa Apwiya Mullukwaanyu ayo enakhalla variyari vanyu tti Mulluku eehache.

¹⁶ “Muhiweeseke Apwiya Mullukwaanyu wonanko mweerelleenyu o Masa.

¹⁷ Musungeke phaama malamulo ni malangizo mattheene yuulamulalleewanini.

¹⁸ Nave mweereke ddennddove ddiri ddoolungama ni ddaphaama wi ddeko ddiweetelleni phaama nave muneerewaakha ellapo yaphaama eyo Apwiya yallupenlliiwa wi eneerewaavaha makhollwaanyu.

¹⁹ Nave muneerowiikariha adanaanyu moollikana ni mmo Apwiya yalonjezelliiwa.

²⁰ “Muhoollommo aniinyu yaawuukohakani wi, ‘Ethiyo kaambiiwa tini Apwiya Mullukwaahu yanilamulalliiwa wi niiwellelleke malamulo ni malangizo mattheene?’

²¹ Vano nyuwaano mwaalleelleke wi, ‘Hiyaano naari akaporo a Farao o Iguputo koma Apwiya yaanivullusa ni muwonwiiwa wamasiviiwa muullupalli.

²² Hiyaano nahoona ni miitthwaahu Apwiya yeeraka ddoottikhiniha ni millilli vawaallakani Aiguputo, mweniiwa vamodda ni a owaniwa.

²³ Mulluku aanikhumiha hiyaano o Iguputo nave aaniphiyiha wuno ni onivaha ellapweella moollikana ni mmo allupenlleeye wa makhollwaahu.

²⁴ Nave Apwiya Mullukwaahu yaanilamula wi niiwellelleke malamulo mattheenaalla nave wi niwooveke alliwaayo wi alliwa eteteze ni odalisa mutundwaahu moollikana ni mmo eneerelliiwammu ollello.

²⁵ Apwiya Mullukwaahu eneerohakallalla ni hiyaano naasungaka moororomelleya ddittheddene nnddo enilamulalliiwa.’ ”