Deuteronomo 5 - Mawu a Mulluku

Malamulo khumi

¹ Mose ahaatthukumaniha Aisraele attheene aalleella wi, “Nyu Aisraele, iwellellani malamulo ni malangizo mattheene kinuulleelleemini ollello. Mwaahuddere nave moonesese wi munnaasunga.

² Apwiya Mullukwaahu yaakeraatthiha ni hiyaano echipangano va mwaango wa Horebu.

³ Echipanganweella kheyaakeraatthihalle ni makhollwaahuve iyaayi komattho ni hiyaano attheene niri ni okumi ophiyera ollello.

⁴ Apwiya yaallota ni nyuwaano vamiitthoni ni vamiitthoni eri m'munlloni vamwaangoni valle.

⁵ Enthawi yeelle miyaano kahiimella variyari va nyuwaano ni Apwiya kinuulleellani mawu a Apwiya kaambiiwa nyuwaano moova munllo nave khemwaawenlle vamwaangoni.” “Apwiya yaallota wi,

⁶ Mi tti Apwiya Mullukwaawo oyo kuukhumihalle mu okaporo o Iguputo.

⁷ “Ohikhalleke ni milluku ddimodda koma meeneve.

⁸ “Ohiipangelleke nifano noophwanaphwana ni erive ello yooddullu apaalle erive ello ya va ellapo yavatthi apaalle erive ello ya m'maaddini a vatthi va ellapo.

⁹ Ohinikokhorelleke nirive nifano apaalle onillapella kaambiiwa mi Apwiya Mullukwaawo kiri Mulluku eehache. Kinnaallaka anamwani ni edduullu ekaamba ya machimo a makhollwiiwa ophiyera mbado waneeraru ni waneesese wa ayo eniitana ni miyaano.

¹⁰ Koma mibado ddooheerengeya nnddo ddinakikonda miyaano ni wiiwellella malamulwaaka kinnaddikonda ni echikondi yoohisintheya.

¹¹ “Ohiromolleke shisha nnddina na Apwiya Mullukwaawo kaambiiwa Apwiya eneeromullaka arive muthu ooromolla shisha nnddina niwa.

¹² “Osungeke nllapo na Sabata wi nikhalle noopatuleya moollikana ni mmo Apwiya Mullukwaawo yuulamulelliiwa.

¹³ Va mallapo matthanu ni nimodda ophareke mitteko ddawo.

¹⁴ Koma nllapo naneetthanu ni piilli tti na Apwiya Mullukwaawo, sika wi va nllapo nenna ohiphareke orive mutteko, weyaano, mwanawo aamullopwana, mwanawo aamutthiyana, mullupa muttekwaawo aamullopwana, mullupa muttekwaawo aamutthiyana, erive echiwetwaawo apaalle mulleto ookhalla ni weyaano. Sika allupa muttekwaawo aallopwana ni aatthiyaneene yiithuuweke wonanko weyaano.

¹⁵ Nave wuupuwelleke wi waari kaporo o Iguputo ni wi Apwiya Mullukwaawo yahuukhumihawo ni muwono wa masiva muullupalli. Ella sika ekaambiiwa Apwiya Mullukwaawo yuulamulelliiwa wi osungeke nllapo na Sabata.

¹⁶ “Waavaheke olemu attiittho ni amaayo moollikana ni mmo Apwiya Mullukwaawo yuulamulelliiwa wi enthawi ya okumaawo erekame ni wi ddiweetelleke phaama mu ellapo eyo kinuuvaheemi.

¹⁷ “Ohiiphe.

¹⁸ “Ohiraruwe.

¹⁹ “Ohiiye.

²⁰ “Ohivelleelle omboni woomootthera mukhwaawo.

²¹ “Ohimusilile mwaara a mukhwaawo. Ohisilile enyumbaaye, emataaye, mullupa muttekwaaye aamullopwana, mullupa muttekwaaye aamutthiyana, eng'ombaaye, bulwaaye apaalle erive ello ya mukhwaawo.

²² “Apwiya yaallota mawu yaalla wa nyu attheene mwatthukumanille omwaangoni wulle moohoonjereravo ello. Alliwa yaallota ni mawu amasiva eri m'munlloni, m'muraponi owaaka mwiipiphini yawoopiha. Nave yaalemba malamulo khumaayo va malluku meelli ekinnya miyaano.”

Athu enimoova

²³ “Nave mwiiwalleenyu mawu oovenyera mwiipiphini mwaango muttheene okharaka munllo, oohoollellaanyu ni attekweene a mallokwiiwa yaawa wa miyaano

²⁴ ellota wi, ‘Apwiya Mullukwaahu yaanooniha ottekweeniiwa ni ntitimiho niwa nave naawiiwa ellotaka eri m'munlloni. Sika ollello nohoona wi muthu ttuukhallave ni okumi naari Mulluku allotille ni olliye.

²⁵ Koma ethiyo nikhwelle tini wuno? Munllo wawoopihoolla oneeronoononga! Nineerokhwa nawiiwa Apwiya Mullukwaahu evirellellaka ollota ni hiyaano.

²⁶ Ethiyo ookhallavo muthu oyo akhanlleve ni okumi vatulli vawiiwani mawu a Mulluku Ookumi ari m'munlloni wonanko namwiiwelleehu hiyaano?

²⁷ Nyuwaano Mose sika munaatamellewo wi mwiiwe ddittheddene nnddo Apwiya Mullukwaahu enaallotiiwa. Vatulli viwa muwe wi munilleelle attheenehi nnddo enaawuulleelleniiwa nave hiyaano nineerewiiwa ni weera.’

²⁸ “Nave Apwiya yahiiwa mawaanyu mvo mwalloteenyu ni miyaano. Sika yaakilleella wi, ‘Kohiiwa ddinallota athwaalla nave tti ddawoona.

²⁹ Kinapaalla wi eganizeke ddennddo mallapo mattheene wi ekooveke enthawi ddittheddene nave wi yiiwellelleke malamulwaaka wi ddeko ddiweetelleke phaama alliwa ni edduullu ddiwa wa enthawi yoohimalla!

³⁰ Khawe waalleelle wi ehokollweelle omisasani ddiwa.

³¹ Koma weyaano Mose okhalle wuno ni miyaano nave kineerowinnya malamulo ni malangizo mattheene. Ddittheddenenndda waahuddihe athu wi ewiiwellelleke malamulwaayo mwiillaponi eyo kinaavaheemi.’

³² “Nyu Aisraele muchenjere wi mweereke nnddo Apwiya Mullukwaanyu yuulamulalliiwani, oohirukunuwella onnattanatta apaalle wuunyotthoni.

³³ Mweeteke mu ettilla eyo Apwiya Mullukwaanyu yuulamulalliiwani wi ddeko ddiweetellekeni phaama nave wi enthawi ya okumaanyu erekame mu ellapo eyo munaawaakheenyu.”