Deuteronomo 4 - Mawu a Mulluku

Mose anaaveka Aisraele wi yiiwellelleke

¹ “Vano nyu Aisraele mwiiwellelleke malamulo ni malangizo mattheene kinuuhuddiheemini wi mukhalle ni okumi. Nave muneerovollowa ni waakha ellapo eyo Apwiya Mulluku a makhollwaahu enuuvaheewani.

² Muhoonjererevo erive ello va nnddo kinuulamulelleemini nave ovukullavo erive ello. Mwiiwellelleke malamulo a Apwiya Mullukwaahu ayo kinuulleelleemini.

³ Mwahoona ni miitthwaanyu nnddo Apwiya yeerelliiwa o Baala Peori wulle Apwiya Mullukwaanyu yaatthollosilliiwa attheene ayo yamullapella Baala.

⁴ Koma nyu attheene mwaakhulupililalle Apwiya Mullukwaahu mookhalla ni okumi ophiyera ollello.

⁵ “Kahuuhuddihani malamulo ni malangizo mattheene moollikana ni mmo Apwiya Mullukwaaka yaakilamulelliiwa. Mwiillaponi eyo munaavolloweenyumo ni waakha, mwiiwellelleke malamulo yaalla.

⁶ Mwaasungeke ni waathwara nave ella eneerowooniha athu a mitundu ddimodda wi nyuwaano tti athu eezeru ni owiiwesesa phaama ddeko.

⁷ “Ethiyo tti mutundu muullupalli oovi oyo ori ni milluku ddookhalla vakhuviru ni alliwa wonanko mmo Mullukwaahu anakhallelleeye ni hiyaano? Vawi erive enthawi namwiithana olliye annanaakhulla.

⁸ Nave ethiyo tti mutundu muullupalli oovi oyo ori ni malamulo ni malangizo oolungama wonanko alla kuuhuddihalleemini ollello?

⁹ Sika muchenjere! Mooneseseke wi muhitiwalleke ddenndda mu okumaanyu muttheene nave mwaahuddihe ddenndda aniinyu ni edduullu ddanyu.

¹⁰ Mwaatthopoollelleke dda nllapo nne mwiimenlleenyu vamiitthoni va Apwiya Mullukwaanyu o mwaango wa Horebu. Wenko Apwiya yaakilleella wi ‘Waatthukumanihe athu. Kinapaalla wi yiiwe nnddo kinaalloteemi wi ehuddere okoova enthawi ddittheddene dda okumiiwa va ellapo yavatthi. Vatulli viwa yaahuddihekettho aniiwa emoddamoddave yeeyo.’

¹¹ “Nave nyuwaano mwahiimella museresere mwa mwaango oyo wakhuneelliwe ni murapo wa mwiisi wooripa ni mallumi amunllo.

¹² Apwiya yaallota ni nyuwaano eri m'munllonimmo nave mwahiiwa mawiiwa koma khemoonille mooneyellwiiwa.

¹³ Yahuulleellani ddoopaalleya weera wi musunge echipangano eyo yakeraatthihalliiwa ni nyuwaano, sika malamulo khumi ayo yalembilliiwa va malluku meelli.

¹⁴ Enthawi yeeyo Apwiya yaakilamula wi kuuhuddiheni malamulo ni malangizo awi mwiiwellelleke mwiillaponi munaavolloweenyumo ni waakha.”

Ohillapella mafano

¹⁵ “Muchenjere! Apwiya yallotilliiwa ni nyuwaano eri m'munlloni va mwaango wa Horebu nyuwaano khemoonille mooneyellwiiwa.

¹⁶ Sika onesesani wi muhichimwe vawiipangellani nifano na orive mutundu naari nifano na mullopwana apaalle na mutthiyana,

¹⁷ nifano na erive enama ya va ellapo yavatthi, na erive epallame ddamuddullu,

¹⁸ erive ello yawaapadda ni erive ello ya m'maaddini a vatthi va ellapo.

¹⁹ Muchenjere wi mwaweha oddullu ni woona nndduwa, mweeri, etheneeri ni ddittheddene ddooddullunko, murimaanyu ohikuseye ni waamba ollapella ni orumeyella ddeko nnddo Mullukwaanyu aavahilleeye athu amodda attheene a va ellapo yavatthi.

²⁰ Koma nyuwaano tti athu ayo Mulluku aakhumihalleeye mu ellapo ya Iguputo, mu eng'anjo yooviheelle wi mukhalle yoohallanaaye wonanko mukhallelleenyu ollellova.

²¹ Apwiya yaakishella murima ekaamba ya nyuwaano. Nave yaallupella wi ngillapuwa muhinje wa Yordani wi kavollowe mu ellapo yaphaama eyo enuuvahiiwani wonanko yoohallanaanyu.

²² Kinaakhwelle mwiillaponi yeella kihinallapuwe muhinjooyo koma nyuwaano muri vakhuviru ollapuwa ni waakha ellapo yaphaameeyo.

²³ Sika muchenjere! Mooneseseke wi muhitiwalle echipangano eyo Apwiya Mullukwaanyu yakeraatthihalliiwa ni nyuwaano nave muhipange nifano noophwanaphwanihella erive ello eyo Apwiya Mullukwaanyu enuulamuleewani.

²⁴ Vawi Apwiya Mullukwaanyu tti munllo wooshellelliha nave tti Mulluku eehache.

²⁵ “Naari mwakhalla mwiillaponimmo enthawi yoorekama ni waayara anamwani ni edduullu muhiwe muhollowa voopangani nifano na erive mooneyello ni weera ddoonanara vamiitthoni va Apwiya Mullukwaanyu nave sika ddineerewaashiha murima.

²⁶ Mwaahiiwellella kinalloteeminndda, eddullu ni ellapo yavatthi sika ddinaakhalle amboni awaavaanyiha wi khemukhalla ni enthawi yoorekama mwiillaponimmo. Muneerewoonongeya attheenenyu mwiillaponi eyo eri vakhopella na Yordani eyo munaakhalleenyumo, ddawoona, muneerotthollowa.

²⁷ Apwiya eneerewuumwarani variyari va mitundu ddimodda nave aweerengeyave mwa nyuwaano sika enaahalle variyari va mitundu ddimodda nko Apwiya enaawiikarelleniiwawo.

²⁸ Wenko muneerekoddirumeyella milluku ddoohikhalla ni ddoopangiwa ni matta wonanko ddamiteekho ni ddamalluku nnddo ddihinoona apaalle ocha apaalle wiimurya.

²⁹ Wenko nyuwaano muneerowaashaasha Apwiya Mullukwaanyu nave mwawaashaasha ni murimaanyu muttheene ni okumaanyu muttheene muneerewaaphwanya.

³⁰ Mwakhalla mu ddoohoosa nave ddeko ddittheddenenndda ddaweereyellani vatulli viwa muneerohokollweella wa Apwiya Mullukwaanyu nave muneerewiiwellella mawiiwa.

³¹ Vallethi Apwiya Mullukwaanyu tti Mulluku eechifundo sika wi kheyuutathillani apaalle owoonongani apaallettho otiwalla echipangano ya makhollwaanyu eyo allupenlleeye ni alliwa.

³² “Ngakohani dda mallapo akhalle nyuwaano muhinayariwe waambeella nllapo nne Mulluku amuphatusalleeye muthu va ellapo yavatthi. Nave ngaashaashani va ellapo yavatthi ettheene vaarimi viri ello yuullupalli wonanko yeella yeereyillekevo va ellapo yavatthi apaalle aarimi arivo muthu oyo aambilleke wiiwa ddenndda.

³³ Ethiyo ookhallavo muthu oyo akhanlleve ni okumi iiwalle mawu a Mulluku ari m'munlloni wonanko mwiiwelleenyu?

³⁴ Ethiyo tti mulluku oovi oyo iikusenlle yeekha athu waatthaamiha variyari va mutundu mmodda ni waatthattusa aayeaaye wonanko mmo Apwiya Mullukwaanyu eweerelliiwani o Iguputo wulle? Alliwa yaheera ddennddo ni masiviiwa muullupalli nyuwaano moonaka ni miitthwaanyu. Alliwa yaamoriha ddoohoosa, millilli, ddoottikhiniha, ekhoto ni ddawoopiha.

³⁵ Apwiya yaawoonihani ddenndda wi nyuwaano mudduwelle wi Apwiyave sika Mulluku nave wi khaavottho mmodda.

³⁶ Apwiya yahaakhullella wi mwiiwe mawiiwa ovenyera oddullu wi yuuhuddiheni. Va ellapo yavattheella Apwiya yaawoonihani munllo muullupalli nave mwahiiwa ellotaka ni nyuwaano eri m'munllonimmo.

³⁷ Ekaamba yawi Apwiya yahaakonda makhollwaanyu yahuutthoollani nyuwaano, edduullu ddiwa, yuukhumihani weekhiiwa o Iguputo ni masiviiwa muullupalli.

³⁸ Mweeteenyu, alliwa yahiikariha mitundu dduullupalli ni ddamasiva okhwaranya nyuwaano wi yuuvollochiheni ni waakha ellapo wi ekhalle wonanko yoohallanaanyu monga ddikhallelliiwa.

³⁹ Sika vano dduwellani ollello nave muhitiwalleke wi Apwiya sika Mulluku a oddullu ni ellapo yavatthi nave khaavottho mmodda.

⁴⁰ Mwiiwellelleke malamulwiiwa ni malangizwiiwa mattheene ayo kuuhuddihalleemini ollello. Sika ddeko ddineerekoweetellani phaama nyuwaano ni edduullu ddanyu nave enthawi ya okumaanyu eneerorekama mu ellapo eyo Apwiya Mullukwaanyu yuuvahilliiwani wi ekhalle yaanyu wa enthawi yoohimalla.”

Mizinda ddoothawellamo dda wookhuma nndduwa wa Yordani

⁴¹ “Vano Mose aatthoolla mizinda miraru wookhuma nndduwa wa Yordani

⁴² nko muthu oomwiipha mukhwaaye moohidduwella ohiri iitanilleeyena khalle athawelleeyewo ni ovullusa okumaaye.

⁴³ Athu a nlloko na Rubeni muzindiiwa waari Bezeri oyo waari mu echipululu mu echigawo yamiyaango. Athu a nlloko na Gadi muzindiiwa waari Ramoti oyo waari mu echigawo ya Giliyadi. Nave athu a nlloko na Manase muzindiiwa waari Golani oyo waari mu echigawo ya Bashani.”

Mose anaalleella malamulo a Mulluku

⁴⁴ “Vano Mose aavelleelleeye malamulo wa Aisraele.

⁴⁵ Alla sika malamulo, mawu ni malangizo ayo Mose aalleelleeye Aisraele ekhumalle mu Iguputo.

⁴⁶ Aisraelaayo yaari mu ntapo na wookhuma nndduwa wa muhinje wa Yordani owehana ni Betepeori. Wenko sika ellapo ya Sihoni mwene a Aamori oyo alamulella muzinda wa Heshiboni oyo agonjihiwe ni Mose ni Aisraelaayo ekhumalle mu ellapo ya Iguputo.

⁴⁷ Sika Aisraelaalle yahaakha ellapwaaye vamodda ni ellapo ya mwene Ogi a o Bashani. Alla yaari mamwene meelli a Aamori ayo yakhalla wookhuma nndduwa wa Yordani.

⁴⁸ Ellapo yaakhilleeweeyo yaambeelle muzinda wa Aroere oyo ori mukhwipi mwa ntapo na Arinoni ophiya o mwaango wa Sirioni (sika wi mwaango wa Heremoni).

⁴⁹ Yaaphiyattho o echigawo ettheene ya Araba wookhuma nndduwa wa muhinje wa Yordani ni o enyanja ya Araba, museresere mwa mwaango wa Pisiga.”