Deuteronomo 34 - Mawu a Mulluku

Okhwa wa Mose

¹ Mose aawella mwaango wa Nebo ovenyera o ntapo na Mowabu. Aaphiya otthoka wa mwaango wa Pisiga wookhumella nndduwa wa Yeriko. Nave wenko Apwiya yaamooniha ellapo ettheene ovenyera o Giliyadi ophiya o Dani,

² echigawo ettheene ya Nafutali, Efuremu, Manase ni Yuda ophiya o Enyanja Yuullupalli.

³ Yaamoonihattho echigawo yoomwera ni ntapo na Yeriko, muzinda wa miteekho ddamikwarangwa, ophiya o Zowari.

⁴ Vano Apwiya yaamulleella Mose wi, “Ella sika ellapo elle kallupenlleemi wa Abrahamu, Isaki ni Yakobo wi kineerovaha edduullu ddiwa. Koowaakhullella wi woone koma ngiwaakhullella ovollowamo.”

⁵ Sika Mose, oorumeyella a Apwiya, aakhwa wenko mu ellapo ya Mowabu moollikana ni mmo Apwiya yallotelliiwa.

⁶ Apwiya yaamuvittha o Mowabu wenko muntaponi moowehana ni Betepeori. Koma ophiyera ollello khaavo naari mmodda anadduwella nipuro na mahamaaye.

⁷ Mose akhwille ari ni miyakha 120 koma aakhalla ni masiva nave miitthwaaye yaari yoonaka.

⁸ Aisraele yahinlla okhwa waye mallapo 30 mu ntapo na Mowabu moollikana ni mutethwiiwa.

⁹ Vano Yoswa, mwaana a Nuni, aaddalliwa ni ezeru ekaamba yawi Mose aamwiiyaatthi matta wi avollowe muniporoni mwaye. Aisraele yaamwiiwellella Yoswa ni othwara malamulo mattheene ayo Apwiya yaalamulalliiwa oweella mwa Mose.

¹⁰ Ovenyera vaavo khanaphwanyeyekettho mu Israele namallotella wonanko Mose oyo Apwiya yallotiiwana vamiitthoni ni vamiitthoni.

¹¹ Khaavo namallotella mmodda eerille ddoottikhiniha ni ezizindikiro wonanko nnddo Apwiya yamulleelliiwa Mose wi eere vamiitthoni va mwene a o Iguputo ni va enduna ddaye ni mu ellapwaaye ettheene.

¹² Khaavo namallotella mmodda oyo eerille ddeko dduullupalli ni ddawoopiha wonanko nnddo eerille Mose vamiitthoni va Aisraele attheene.