Deuteronomo 33 - Mawu a Mulluku

Mose anadalisa malloko a Israele

¹ Alla sika madaliso ayo Mose muthu a Mulluku avelleelleeye wa Aisraele ahinakhwe.

² Apwiya yaawa ovenyera o Sinai, yaakhumellella wa athwiiwa ovenyera o Seiri, yahooneya ovenyera o mwaango wa Parani. Angelo ooheerengeya yaathaananana, mallumi amunllo yaari m'mattani mwa Apwiya.

³ Apwiya ennaakonda athwiiwa oopatuleyiiwa attheene eri m'mattani mwiwa. Athwaayo ekeraatthille vatthi, enahuddera mawiiwa,

⁴ Malamulo ayo Mose avelleelleeye, yoohallana ya mutundu wa Yakobo.

⁵ Apwiya yaakhalla mwene mu Yeshuruni, mvo malloko ni oohoollelliiwa yatthukumanihiwiiwa vamodda.

⁶ Mose aallota dda nlloko na Rubeni wi, “Rubeni ahithiimihiwe, akhallevove naari athwaaye eri ooyeva.”

⁷ Aallota dda nlloko na Yuda wi, Apwiya, mwaapelle maaru winlla wiwa, mwaakavihere, mwaallundellelle ni malloko mamodda. Apwiya, mwaallipihe wi yiiteteze, mwakavihere wa adaniiwa.

⁸ Aallota dda nlloko na Levi wi, “Apwiya, Urimu ni Tumimu* oonihe yoopaallaanyu oyeella mwa Alevi, oorumeyellaanyu oororomelleya. Mwaaweesa o Masa, mwaallipanana o maaddi a Meriba.

⁹ Alliwa yaanuuroromellani nyuwaano okhwaranya makhollwiiwa, abaliiwa apaalle aniiwa. Alliwa yahiiwellella malamulwaanyu nave yaaroromella echipanganwaanyu.

¹⁰ Alliwa sika enaamuhuddihe Yakobo malangizwaanyu, sika enaahuddihe Aisraele malamulwaanyu. Eneerewoosa lubani* vamiitthoni vanyu, eneerovelleella mikutho ddooshellelliha ddamututha va nikuwa nanyu.

¹¹ Apwiya, kaviherani nlloko niwa wi nikhalle namasiva, nave muhakallallena mitteko ddiwa. Oovaanyihananiiwa ni oollipananiiwa attheene muwoononge wi ehiwe evenyattho.”

¹² Aallota dda nlloko na Benjamini wi, “Ookondiwa a Apwiya anaakhalle ni alliwa mootetezeya, alliwa aneeromukhupaarella enthawi ddittheddene, alliwa enaakhalleke variyari va ellapwaaye.”

¹³ Aallota dda nlloko na Yosefe wi, “Apwiya edalise ellapwaaye, ekhalle ya murimu munchichi nave ya ehime ddinchichi.

¹⁴ Ellapwiiwa edalisiwe ekhalle ni ezipaso ddawiithwa phaama, ekhallettho ni ddoohata ddinchichi enthawi ddittheddene.

¹⁵ Miyaango ni asimiyaango ddiwa ddakhalle ddimme ezipaso nave ddiddalle ni ddoohata ddinchichi.

¹⁶ Ellapwiiwa ekhalle ni ddoohata ddoopambana, edalisiwe ni Apwiya ookhalla mu makukhu ookhara. Madaliso mattheenaalla emorelle nlloko na Yosefe vawi tti oohoollella variyari va asinne.

¹⁷ Yosefe ookhalla ni masiva wonanko nankhoro a eng'ombe, manyakaaye tti wonanko a enari, manyaka awiikarihella mitundu ddimodda, oddiikarihella woomallihella wa ellapo. Manyakaaye tti akhoto ooheerengeya a Efuremu, navettho akhoto anchichi a Manase.”

¹⁸ Aallota dda nlloko na Zebuloni wi, “Zebuloni ahakallalle ni malondaaye a va enyanja, Isakara eyuumaaye yaate owaani.

¹⁹ Eneerewiithanella mitundu dda athu o miyaango ddiwa, ennavelleellawo wenko mikutho ddoophwanellella vawi eyuumiiwa enavenyera mu malonda a vanyanja ni m'mihavani dda mukhwipi mwa enyanja.” Aallota dda nlloko na Gadi wi,

²⁰ “Oodalisiwa ekhalle oyo anunnuwiha ellapwaaye, Gadi ari wonanko mukango, annanyenya muwono ni ekharakadda.

²¹ Ahiitthoollella yeekha ellapo yaphaama, echigawo ya oohoollella yaavelleelliwa wa olliye. Oohoollella a Israele yatthukumanilliiwa vamodda, aaweeriha wi esunge echiweruzo ni malamulo a Apwiya.”

²² Aallota dda nlloko na Dani wi, “Dani ari wonanko mwanamukango, oyo anallupha ovenyera o Bashani.”

²³ Aallota dda nlloko na Nafutali wi, “Nafutali oovona ddaphaama, nave ooddalla ni madaliso a Apwiya, ohaakhella ellapo yoonyanja ni yoomwera.”

²⁴ Aallota dda nlloko na Ashere wi, “Ashere adalisiwe okhwaranya malloko mattheene, akondiweke ni asinne, ellapwaaye ekhalle yeeyuuma, ekhalle ya miteekho dda olivi.

²⁵ Ateteziwe ni millako ddamukoko, akhalle amasiva mallapwaaye mattheene.”

²⁶ We Yeshuruni, khaavo oollikana ni Mulluku, oyo aneeta ni ntitimiho muddullu, oyo anawella vamiraponi wi uukavihere.

²⁷ Apwiya sika woothawellawo, annuusunga ni muwonwaaye woohimalla. Aawiikariha adani vamiitthoni vawo, ahuulleella wi owoononge attheene.

²⁸ Sika Aisraele eri vamurendelleni, edduullu dda Yakobo ddookeraattheya mwiillaponi, mmo muhinamalla tirigu ni vinyo, mmo muhinamwara nikame nooddullu.

²⁹ We Israele, ori oodala! Oophwanaphwana ni we ttaani? Mutundu woovullusiwa ni Apwiya, yawuutetezaawo ni nsupada nawo, ayo enuuvullusa ni wuupambaniha! Adanaawo eneerewuukokhorella, koma we oneerewaanyingallella vatthi.