Deuteronomo 32 - Mawu a Mulluku

¹ “We oddullu, apella maaru o nnddo kineereemi killote. We ellapo yavatthi, ngiiwa ddoollota ddaka.

² Ddoohuddiha ddaka ddimore wonanko murimu, mawaaka yimme wonanko nikame, wonanko murimu oorupella vamunyepuni, wonanko enyeenye va ddoophuwa.

³ Kineerollalleya nnddina na Apwiya. Llotani wi Mullukwaahu tti muullupalli!”

⁴ “Olliye tti nlluku nahu, mitteko ddaye tti ddaphaama, ettilla ddaye ddittheddene tti ddoolungama, Mulluku oororomelleya ni awoona, olliye tti oolungama ni oohilakwiha.

⁵ Koma nyu tti oohiroromelleya wa olliye, oohiphwanella okhalla athwaaye, muri mutundu woochimwa ni woolleka.

⁶ Ethiyo ttuuwaahokollosella ddawi ddiidda Apwiya, nyu athu ookarangeya ni ohikhalla ni ezeru? Ethiyo alliwa khe attiitthaanyu ayo yuuphatusalleni, ayo yuupangilleni ni wuukeraatthihani?”

⁷ “Upuwellani mallapo akhalle, ganizerani dda miyakha ddivirallennddo, akoheni attiitthaanyu, eneerewuulleellani, attekweenaanyu eneerewuutthopoollellani.

⁸ Mvo Amasiva Mattheene akawenlleeye ezigawo mitundu ddimodda, mvo aamwallanihalleeye athu, ahaahiyera malire moollikana ni waata wa athu a Mulluku.

⁹ Koma yoohallaniiwa ya Apwiya tti athwiiwa, edduullu dda Yakobo sika yoohallaniiwa yoopatuleya.”

¹⁰ “Aaphwanyille muchipululuni, ohakani woohikhalla ello. Ahaateteza nave ahaapwatha, wonanko mmo aneerelleeye ni niittho naye,

¹¹ wonanko mmo mpungu onaahuddihelliiwa anaaye ovava, oyo onaapheella vaddullu va anaayaayo, onattaphurusa muuphellwiiwa voovavani waakusa ni waatukhullella va muuphellwiiwa.

¹² Apwiya weekhiiwa yahaahoollella athwiiwa moohikaviheriwa ni milluku ddimodda.”

¹³ “Yahaalamulelliha ellapo ddamiyaango, yaacha ddoomella ddamuhakani. Yahaachiha enwi yam'mallukuni, ni makhura oovenyera m'miteekhoni ddoomella m'mallukuni.

¹⁴ Yahaawiryiha mukaka woonyuunya wa eng'ombe, navettho mukaka wa enkhosa ni epuri. Yahaachiha enkhosa ni epuri ddooneneva, navettho anankhoro a enkhosa ddaphaama dda o Bashani. Yahaachiha tirigu aphaama wunchichi, yahaawiryiha vinyo ooddiva.”

¹⁵ “Yeshuruni, athu a Apwiya yaaneneva, koma alliwa yahaawukila, yahiidditivallella ni wunnuwa mwiilli, nave yaavona. Vatulli viwa yaamuhiya Mulluku Owaaphatusa, Yaavevulla nlluku na ovullusa wiwa.

¹⁶ Yaamweeriha ehache ni milluku ddeelleto, ni ddaweera ddoonanara yaattatthamulla owallaaye.

¹⁷ Yaaheraatthella mikutho o minepa ddoonanara, nnddo ddihiri Mulluku, milluku nnddo Aisraele yahiddidduwenlliiwa ovenyera khalle, milluku ddoowa osillesille, nnddo makhollwiiwa yahiddillapenlliiwa naari vang'ono.

¹⁸ Yaatiwalla nlluku niwa oyo aaphatusalle, Mulluku oyo aavahille okumi.”

¹⁹ “Apwiya yoonilliiwa ddenndda, yahaakhoota athwaayo, kaambiiwa aniiwa aallopwana ni aatthiyana yaattatthamulla owalliiwa.

²⁰ Nave yaallota wi, ‘Kineerewaareya etulli, kineerewoona eyo enaamorelle vawi alliwa tti mbado wawoottha, tti anamwani oohiroromelleya.

²¹ Aakeeriha ehache ni milluku shisha, aattatthamulla owallaaka ni mafanwiiwa. Sika, kineeroweeriha ehache ni athu shisha, kineerewaattatthamulla ni mutundu wookarangeya.

²² Owallaaka oneerokhara wonanko munllo, oneerophiya o ellapo ya ookhwa, oneerewoosa ddittheddene ddaveellaponi, oneeroshellelliha matthipello a miyaango.

²³ Kineerowuukellella otulli woohiyanahiyana, kinaamallelle va alliwa mipaamba ddaka ddittheddene.

²⁴ Eneerewoonongeya ni ettalla ni oviha mwiilli, eneerewoonongeya ni ereta ddawoopiha ddoohiyanahiyana. Kineerewaarumihella enama ddawoopiha ddamuhakani, eneerollumiwa ni ddawaapadda ddanttipwi.

²⁵ Otte wa enyumba eneerokhwa ni nsupada, muwari mwa enyumba eneerokhwa ni woova. Asombwe ni anamwalli eenerewoonongeya, Akantchewa ni awuulluvalleene khevulluwa.

²⁶ Kineerewaatthollosa attheenaayo, wi ehuupuwelliwe ni arive muthu.

²⁷ Koma nginapaalla wi adaniiwa yiitukhulleke, eganizeke moolakwa ni okittheya. Ehooneke wonanko yaagonjihalle ni masiviiwa, wi Apwiya kheyeerille ddenndda.’ ”

²⁸ “Aisraele tti mutundu wooheeruzeya, khenadduwella ello.

²⁹ Yaariki ni ezeru yeerewiiwesesa, yeerodduwella nnddo ddinaamorelle.

³⁰ Ethiyo muthu mmodda aagonjihalle mwawiidde athu 1,000, athu eelli yaagonjihalle mwawiidde athu 10,000? Ethiyo khehiyo ekaamba yawi Nlluku niwa ohaareya etulli, ekaamba yawi Apwiya ahaatathilla?

³¹ Vawi naari adaniiwa ennadduwellattho wi milluku ddiwa kheddinallikana ni Mulluku a Israele.

³² Adaniiwa tti oonanara wonanko Sodomu ni Gomora. Tti wonanko mpesa ddawimma ezipaso ddoowaawa ni ddanttipwi,

³³ wonanko vinyo oopangiwa ni nttipwi na enowa, wonanko nttipwi noovoreyesesa na namarawe.”

³⁴ “Ethiyo kheddinasungeya mwa miyaano, ni wiipittheya vatthivatthi va murimaaka?

³⁵ Ollaka ni ohokollosella ddoonanara tti ddaaka, enthawi ya oserenguwa wiwa eneerophiya, vawi enthawi ya otulliiwa yohaatamella, woonongiwa wiwa onnaakuva.

³⁶ Apwiya eneerewaavullusa athwiiwa, eneeroweerella echifundo oorumeyelliiwa, vawoonani omalla wa masiviiwa wi khevihanlle muthu, kaporo apaalle oohikhalla kaporo.

³⁷ Vano Apwiya eneerewaakoha athwiiwa, ‘Ddiri wuuwi milluku ddamasiva mwaroromelleenyunndde?

³⁸ Mwaaddichiha makhura a mikutho ddanyu, mwaaddiwiryiha vinyo. Vano ddiwettho wi dduukavihereni, ddaakuvettho wi dduutetezeni.’ ”

³⁹ “Onani wi miyaano sika Mulluku mwaneena, nave khaavo mulluku mmodda. Kinniipha nave kinnavahattho okumi, kinnaphoriiha nave kinnachirihattho, khaavo oomuvullusa muthu m'mattani mwaka.

⁴⁰ Kinniimesa muwonwaaka muddullu, wi killupelle mu nnddina naka

⁴¹ wi kineerewaandusa nsupada naka noosherima, nave kineerewoonesesa wi echilungamo yoheereya. Adanaaka kineerewaahokollosella ddoonanara, awiitana ni miyaano kineerewaallaka.

⁴² Kineerolezeliha mipaamba ni nikhame na adani, nsupada naka nineerohoma muhehiiwa. Oohomiwa ni akaporo nikhame niwa nineereweetellella, miru ddiwa dda meehi oorekama ddineerophaddiwa.”

⁴³ “Ariiheni athu a Apwiya, nyu mitundu dda athu. Apwiya ennaallaka attheene oowiipha athwiiwa, ennaahokollosella adaniiwa, ennavenyiha nichimo mwiillaponi mwa athwiiwa.”

⁴⁴ Mose ni Yoswa mwaana a Nuni yaahuddiha mawu mattheene a nchiponna vamiitthoni va Aisraele.

Malangizo oomalliha a Mose

⁴⁵ Mose amallihalle waahuddiha athu mawu mattheenaalla,

⁴⁶ aallota wi, “Mwaasungeke m'murimani mwanyu malamulo mattheene kiwinnyalleemini ollellwaalla. Nave mwaahuddiheke aniinyu wi yiiwellelleke moororomelleya mawu mattheene a malamulwaalla.

⁴⁷ Mawaalla khe ashisha koma tti okumaanyu. Sika muwiiwellelleke wi mukhalle ni okumi woorekama mwiillaponi munaawaakheenyu okhopella wa Yordani.”

⁴⁸ Nllapo nenno Apwiya yaallota ni Mose wi,

⁴⁹ “Wella mwaango wa Nebo, o miyaango dda Abarimu nnddo ddiri mwiillaponi ya Mowabu moowehana ni muzinda wa Yeriko nave oyoone ellapo ya Kanani eyo kinaavaheemi a Israele.

⁵⁰ Weyaano onaakhwelle vamwaangonimvo wonanko mmo mwanamunno Aroni akhwenlleeye va mwaango wa Hori.

⁵¹ Ekaambiiwa tti yawi eelliinenyu khamwaaroromenlle wa miyaano vamiitthoni va Aisraele. Mwaariinyu o maaddi a Meriba, vakhuviru ni Kadeshi, mu echipululu ya Zini, khamoonihalle vamiitthoni va Aisraele wi miyaano tti aweella.

⁵² Ekaamba ya yeella onaayoonelle voorekama ellapo eyo kinaavaheemi Aisraele koma khovollowamo.”