Deuteronomo 31 - Mawu a Mulluku

Yoswa anavollowa munipuroni na Mose

¹ “Mose aavirellella waalleella Aisraele wi,

² Vano kiri ni miyakha 120 nave ngiworattho okhalla oohoollellaanyu. Emodda tti yawi Apwiya yaakilleella wi ngimullapuwa Yordani.

³ Apwiya Mullukwaanyu aneeniiwa sika enaahoolle ollapuwa muhinje ni woononga mitundu ddimodda ddittheddene wi nyuwaano mwaakhe ellapwiiwa. Yoswa sika anaakhalle oohoollellaanyu moollikana ni mmo Apwiya ellotilliiwa.

⁴ Apwiya eneerowoononga athu yaalla wonanko mmo yawoonongelliiwa Sihoni ni Ogi, mamwene Aamori ni ellapwiiwa.

⁵ Apwiya eneerewaavelleella m'mattani mwanyu nave mwaweerelle moollikana ni mmo kuulamulalleemini.

⁶ Khallani amasiva ni oollipa murima. Muhiwoove athu yaalla apaalle otathilla murima kaambiiwa Apwiya Mullukwaanyu eneerewuuhoollellani nave kheyuuhiyani nyookha apaalle wuutathillani.”

⁷ Vano Mose aamwiithana Yoswa nave aamulleella vamiitthoni va Aisraele wi, “Khalla amasiva ni oollipa murima vawi weyaano sika onaahoollelle athwaalla o ellapo eyo Apwiya yallupenlliiwa wa makhollwiiwa. Weyaano sika onaakeraattheyihe athu mwiillaponimmo.

⁸ Apwiya aneeniiwa eneerewuuhoollella nave eneerokhalla ni weyaano. Kheyuuhiya weekha apaalle wuutathilla, sika ohoove apaalle otathilla murima.”

Weerengiwa wa lamulo va orive muyakha waneetthanu ni piilli

⁹ Vano Mose aalemba lamulonno nave aawinnya allupa mukutho, anamwani a Levi, ayo yapwatha nibokosi na echipangano na Apwiya. Nave aawinnyattho oohoollella a Israele.

¹⁰ Mose ahaalamula attheenaayo wi, “Omodda va orive muyakha waneetthanu ni piilli, va muyakha wa ottaphulliwa, Mweerengeke lamulonna va Ehakallallo ya Misasa.

¹¹ Mweerengeke lamulonna wa Aisraele attheene yaawa wi ellapelle va nipuro nno Apwiya enaatthoolliiwa weekhiiwa.

¹² Mwaatthukumanihe attheene allopwana, atthiyana, anamwani ni alleto ookhalla variyari vanyu wi arive muthu addiiwelle yeekha nave ahuddere owoova Apwiya Mullukwaanyu ni wiiwellella mawiiwa moororomelleya.

¹³ Sika vano edduullu ddanyu ddahidduwenlle lamulonna, ttuuwiiwa nave ddineerohuddera owoova Apwiya Mullukwaanyu enthawi ettheene ddaakhallaka mu ellapo eyo munayillapuwelleenyu Yordani wi mwaakhe.”

Apwiya enamulangiza Mose

¹⁴ Apwiya yaallota ni Mose wi, “Enthawi ya okumaawo ehanlle yooyeva. Mwiithane Yoswa nave muwe o musasa wamutthukumano wi kimuvollochihe munipuroni mwawo.” Sika Mose ni Yoswa yaaphiya o musasa wamutthukumano.

¹⁵ Nave Apwiya yahooneyella m'muraponi wonanko opoto oyo wiimellille va mullako wa musasa.

¹⁶ Apwiya yaallota ni Mose wi, “Enthawi ya okumaawo ehanlle vang'ono. Sika vatulli viwa athwaalla eneerotathilla echipangano kikeraatthihalleemi ni alliwa vookihiyani miyaano ni waamba ollapella milluku dda ellapo enaayaakhiiwa.

¹⁷ Ddeereya ddennddo, kineerewaashella murima wunchichi, kineerewaahiya nave eneerewoonongeya. Ddoohoosa ddawoopiha ddinchichi ddineerewaamorella. Nave nllapo nenno eneerodduwella wi ddenndda ddohaamorella ekaamba yawi miyaano, Mullukwiiwa, ngirittho ni alliwa.

¹⁸ Ddawoona, enthawi yeeyo kineerewaareya etulli ekaamba ya machimwiiwa mattheene yeerilliiwa voollapellani milluku ddimodda.

¹⁹ “Vano lemba nchipo, waahuddihe Aisraele nave nihivenyekevo vayanoni viwa wi nikhalle wonanko ombonaaka wowaavaanyiha.

²⁰ Vawi kaavollochiha mu ellapo ya mukaka ni enwi eyo kallupenlleemi wa makhollwiiwa nave yavona mmo enaapaallelliiwa ni oneneva, eneerorukunuwella o milluku ddimodda ni waamba oddillapella. Eneerokikhoota ni otathilla echipanganwaaka.

²¹ Sika ddoohoosa ddawoopiha ddaamorella, nchipo nenna ninaakhalle wonanko omboni wowaavaanyiha ekaamba yawi edduullu ddiwa ddineerekewiipave. Vawi kinnadduwella nnddo enaganiziiwa naari kihinaavollochihe mu ellapo eyo kallupenlleemi wi kineerewaavaha.”

²² Nllapo nenno Mose aalemba nchiponna nave ahaahuddiha Aisraele.

²³ Vano Apwiya yaamulleella Yoswa, mwaana a Nuni wi, “Khalla amasiva ni oollipa murima. Oneerewaahoollella Aisraele ovollowa mwiillaponi eyo kallupenlleemi nave kineerokhalla ni weyaano.”

²⁴ Vano Mose aamalliha olemba malamulo a Mulluku oohihiyavo ello.

²⁵ Vatulli viwa ahaalleella Alevi ayo yapwatha nibokosi na echipangano wi,

²⁶ “Kusani nibukhunna na malamulo a Mulluku nave munihiye vakhwipi va nibokosi na echipangano ya Apwiya Mullukwaanyu wi nikhalle wenko wonanko omboni wowuuvaanyihani.

²⁷ Vawi kinnadduwella phaama dda owukila ni wumma murima wanyu. Mwaambille khalle waawukila Apwiya, munaawukille okavi miyaano kakhwa!

²⁸ Mukitthukumanihelle oohoollella attheene a malloko ni attekweene attheene wi kaalleelle ddenndda. Oddullu ni ellapo yavatthi sika ddinaakhalle amboni awaavaanyiha.

²⁹ Kinnadduwella wi miyaano kakhwa, attheenenyu muneeronanara murima nave muneerohiya ettilla kinuulamuleemininndda. Koma vatulli viwa, muneerokumana ni ddoohoosa ddawoopiha ddinchichi ekaamba yaweera ddoonanara vamiitthoni va Apwiya ni ottatthamulla owalliiwa ni mafano munaapangeenyu.”

Nchipo na Mose

³⁰ Vano Mose aahuddiha nchipo nittheenenna vamiitthoni va Aisraele attheene ovenyera vawaamba ophiyera omamallihello.