Deuteronomo 30 - Mawu a Mulluku

¹ “Yuuphiyerani madaliso ni matembelelo kaaromollilleemaalla, muneerewuupuwella muri variyari va mitundu ddimodda nko Apwiya Mullukwaanyu yuupallalleselleewani.

² Vano nyuwaano ni edduullu ddanyu muhokollweelle wa Apwiya nave mawiiwa alla kinawinnyeemini ollello muwiiwellelle ni murimaanyu muttheene.

³ Sika Apwiya Mullukwaanyu eneerewuuhokollosellani ddaphaama ni oweerellani echifundo. Eneerewuutthukumanihani ovenyera wa mitundu ddimodda dda athu nko yuupallalleselliiwani.

⁴ Naari mupallalleyelle woomallihella wa ellapo yavatthi, Apwiya Mullukwaanyu eneerewuutthukumanihani ni wuuvenyihaniwoni.

⁵ Eneerewuuvelleellani o ellapo eyo makhollwaanyu yaakhilliiwa khalle wi nyuwaano muyaakhettho. Nave eneerewuuvahani eyuuma yawaata ni wuuruuwihani wunchichi okhwaranya mmo yakhallelle makhollwaanyu.

⁶ Apwiya Mullukwaanyu eneerophadda m'murimani mwa nyuwaano ni edduullu ddanyu wawi muneerekewaakonda Apwiya Mullukwaanyu ni murimaanyu muttheene ni okumaanyu muttheene. Sika muneerovirellella okhalla ni okumi mwiillaponimmo.

⁷ Koma Apwiya Mullukwaanyu eneeromorihella matembelelo mattheene va adanaanyu ayo yuuhoosani.

⁸ Vano muneerewiiwellellattho ni othwara malamulo kinawinnyeemini ollello.

⁹ Apwiya eneerewuupambanihani wunchichi mu ddaweera ddanyu ddittheddene. Nave eneerodalisa ezipaso dda m'mwiillini mwanyu, ezipaso dda eziweto ddanyu ni ezipaso dda emata ddanyu. Apwiya ddineerewaaddivella wuupambanihani wonanko mmo ddaaddivellelliiwa waapambaniha makhollwaanyu.

¹⁰ Muwiiwellelleke Apwiya Mullukwaanyu ni osunga malamulo ni malangiziiwa mattheene ayo eri mu nibukhu na malamulo. Murukunuwelle wa alliwa ni murimaanyu muttheene ni okumaanyu muttheene.

¹¹ “Lamulo kinawinnyeemini ollellonna khe nookatamiha oniiwesesa nave khe nawoorekama.

¹² Kheniri oddullu wi ttuukoha wi, ‘Ethiyo ttaani anaawelle oddullu wi anikitthihelle lamulo wi niniiwellelle ni onithwara?’

¹³ Apaallettho kheniri okhopella wa enyanja wi ttuukoha wi, ‘Ethiyo ttaani anaallapuwe wi anikuselle lamulo wi niniiwellelle ni onithwara?’

¹⁴ Koma Othenga wa Mulluku murina vaava vawi ori muwano mwanyu ni m'murimani mwanyu wi ttuuwora owuthwara.

¹⁵ “Ollello kohuuvahani mpata wi mutthoolle okumi ni ddaphaama apaalle okhwa ni ddoonanara.

¹⁶ Mwiiwellellaka malamulo a Apwiya Mullukwaanyu kinawinnyeemini ollello, mwaawaakondaka Apwiya Mullukwaanyu ni weeta mu ettilla ddiwa nave mwasunga malangizwiiwa ni mawiiwa mattheene, ddeko ddineerekoweetellani phaama nave muneerokhalla mutundu wa athu awaata nave Apwiya Mullukwaanyu eneerewuudalisani mwiillaponi munaawaakheenyweeyo.

¹⁷ Koma mwaahiiwellellaka, mwaakhootaka wiiwa nave mwaakuseyaka murima wi mullapelleke milluku ddimodda,

¹⁸ kinimuuchenjezani veneva wi muneerewoonongeya. Nave ellapo ya vakhopella va Yordani eyo munayeenyu wi mwaakhe, khemukhallamo enthawi yoorekama.

¹⁹ Ollello kinuuvahani mpata wi mutthoolle okumi apaalle okhwa, madaliso apaalle matembelelo. Oddullu ni ellapo yavatthi sika ddinaakhalle amboni awuuvaanyihani. Sika tthoollani okumi,

²⁰ mwaakonde Apwiya Mullukwaanyu mwiiwellelleke mawiiwa ni waawanddeellella alliwa wi nyuwaano ni edduullu ddanyu mukeraattheye mwiillaponi eyo yallupenlliiwa wa makhollwaanyu, Abrahamu, Isake ni Yakobo.”