Deuteronomo 3 - Mawu a Mulluku

Israele anamugonjiha mwene Ogi

¹ “Vano naavirellella ni olendwaahu wooyeella ettilla ya o Bashani. Ogi mwene a o Bashaninko ni athwaaye attheene yaakhuma niwanana ekhoto vakhuviru ni Ederei.

² Koma Apwiya yaakilleella wi, ‘Ohinoova. Koomuvelleella m'mattani mwawo vamodda ni athwaaye navettho ellapwaaye. Nave omweerelle nnddo wamweerelleewe Sihoni mwene a Aamori oyo akhalla o Heshiboni.’

³ “Sika Apwiya yaamuvelleella mwene Ogi vamodda ni athwaaye m'mattani mwahu nave naawiipha attheene oohimuhiyavo naari mmodda.

⁴ Nahaakhattho mizinda ddaye ddittheddene enthawi yeeyo oohihiyavo naari mmodda. Mizinda ddittheddene naakhilleehu ddaari 60 o echigawo ettheene ya Arigobu nko mwene Ogi alamulelleeye.

⁵ Ddittheddenenndda ddaari mizinda ddoollipihiwa ni mipanda ddoorekama navettho dda machiwi oowalliwa ni mikoko ddoollipa. Nave vaakhallattho mizi ddinchichi ddoohikhalla ni mipanda.

⁶ Nahoononga mizinnddo ni mizinda ddittheddene nave naawiipha allopwana, atthiyana ni anamwani attheene wonanko mmo neerelleehu ni mizinda dda mwene Sihoni a o Heshiboni.

⁷ Nahaakha eziweto ni eyuuma dda m'mizindaninnddo wi ddikhalle ddaahu.

⁸ “Sika va enthawi yeeyo mamwene meelli Aamoraayo naawaakha ellapo wookhuma nndduwa wa Yordani ovenyera o ntapo na Arinoni ophiya o mwaango wa Heremoni.

⁹ (Asidoni yawuromolla mwaango wa Heremoni wi Sirioni koma Aamori yawuromolla wi Seniri).

¹⁰ Sika nahaakha mizinda dda omiyaangoni, ellapo ettheene ya Giliyadi ni Bashani ophiya o Saleka ni Ederei, mizinda ddittheddene dda Ogi a o Bashani.

¹¹ (Ogi sika aari mwene ookomihera a Arefaimu. Nibokosi naye naari namukoko noorekama mamita masese nave nooramballalla mamita meelli voophwanaphwanihella ni muyeso wa mallapo yaayo. Nave nibokosinno ttuunoona o Raba, muzinda wa Aamoni.)”

Malloko a wookhuma nndduwa wa Yordani

¹² “Naakhilleehu ellapweeyo kaayikawella malloko a Rubeni ni Gadi echigawo yoovenyera o Aroere vakhuviru ni muhinje wa Arinoni navettho hafu a echigawo yamiyaango ya Giliyadi ni mizinda ddene.

¹³ Hafu a nlloko na Manase kahaakawella echigawo ettheene ya Giliyadi eyo yahanlle navettho Bashani ellapo ya mwene Ogi, sika wi echigawo ettheene ya Arigobu. (Bashani aadduwelliwa ni nnddina nawi ellapo ya Arefaimu.

¹⁴ Yairi a nlloko na Manase aakusa echigawo ettheene ya Arigobu apaalle wi Bashani ophiya o malire a Geshuri ni Maaka. Mizindannddo aaddivaha nnddina naye nave ophiyera ollello ddinadduwelliwa wi mizi dda Yairi.)

¹⁵ “Echigawo ya Giliyadi kaamukawella Makiri a nlloko na Manase.

¹⁶ Echigawo ettheene ovenyera o Giliyadi ophiya o ntapo na Arinoni kaayikawella wa malloko a Rubeni ni Gadi. Variyari va ntapo na Arinoni sika vaari malire oomwera nave malire a ompoto yaari muhinje wa Yaboki oyo embali emodda yaari malire a ellapo ya Aamoni.

¹⁷ Woovollowa nndduwa ellapwiiwa yaanaphiya o muhinje wa Yordani ovenyera o enyanja ya Kinereti ompoto ophiya o enyanja ya Araba apaalle Enyanja Yookhwa omwera. Nave wookhuma nndduwa yaanaphiya va mamellello a mwaango wa Pisiga.

¹⁸ “Nave va enthawi yeeyo kahuulamulani wi Apwiya Mullukwaahu sika uuvahilleni ellapweella wi ekhalle yaanyu. Koma allopwana attheene oollipa murima ekuse ezida nave yaahoollelle aballiinyu, malloko mamodda a Israele.

¹⁹ Koma awarinyu vamodda ni aniinyu sika enaahalle mu mizinda nnddo kuuvahilleemini vamoddattho ni eziweto ddanyu ddene vawi kinnadduwella wi mookhallana ddinchichi.

²⁰ Mwaakavihere Aisraele akhwiinyu ophiyera awiithuuwihalle mwiillaponi eyo Apwiya enaawaavahiiwa o ekhopella emodda ya Yordani. Vatulli viwa arive muthu aneerohokollweella o echigawo eyo kuukawenlleemini.

²¹ “Vaavo kaallota ni Yoswa wi, ‘Mohoona ddittheddene Apwiya Mullukwaahu aweerenlleeye mamwene meellaalla Sihoni ni Ogi. Vano amodda attheene munaawaneenyuna ekhoto mwiillaponi mwiwa Apwiya eneeroweerella emoddamoddave yeeyo.

²² Muhoove kaambiiwa Apwiya Mullukwaahu sika enaaniwanelle ekhoto.

²³ “Va enthawi yeeyo kaaveka mwawiikhupanyiha wa Apwiya wi,

²⁴ ‘Nyu Apwiya Mulluku, mohaamba omoonihella oorumeyellaanyu mitteko dda ottekweenaanyu ni masivaanyu. Oddullu ni vatthi khaavo mulluku mmodda oyo anaawore weera ddeko dda masiva wonanko nnddo muneereenyu.

²⁵ Mukaakhullelle wi killapuwe muhinje wa Yordani yoollave nave wi koone ellapo yaaphaameeyo vakhopellamvo, ellapo yooreera yamiyaango navettho miyaango dda Lebanoni.’

²⁶ Koma Apwiya yaakinanariwella miyaano ekaamba ya nyuwaano nave kheyaakiiwellelle. Munipuroni mwene yallotille wi, ‘Vookwakhwana! Ohillotettho ddenndda!

²⁷ Wella va etthoka ya mwaango wa Pisiga nave otukhullelle miitthwaawo ompoto ni omwera, wookhuma nndduwa ni woovollowa nndduwa. Owehesese phaama kaambiiwa weyaano khomullapuwa Yordani.

²⁸ Koma omulangize phaama ni omullipiha murima Yoswa kaambiiwa olliye sika anaahoollelle athwaalla ollapuwa ophiyera ekhopella emoddeeyo ni waakha ellapo eyo onaayooneeweeyo.’

²⁹ Sika naahalla o ntapo moowehana ni muzinda wa Betepeori.”