Biblia Todo Logo
Bìoball air-loidhne

- Sanasan -

Deuteronomo 28 - Mawu a Mulluku


Madaliso ekaamba yawiiwellella
( Lev 26.3-13 ; Deu 7.12-24 )

1 “Mwiiwellella mawu a Apwiya Mullukwaanyu ni othwara moororomelleya malamulo mattheene ayo kinawinnyeemini ollellova, Apwiya Mullukwaanyu eneerewuuwellihani okhwaranya mitundu ddimodda ddittheddene dda va ellapo yavatthi.

2 Mwawiiwellella Apwiya Mullukwaanyu, madaliso mattheene enaakhalle aanyu.

3 “Apwiya eneerodalisa mizinda ddanyu ni emata ddanyu.

4 “Apwiya eneerodalisa ezipaso dda m'mwiillini mwanyu, ezipaso dda m'matani mwanyu ni asaana a eziweto ddanyu.

5 “Apwiya eneerodalisa ddoohata ddanyu ni ddoocha ddoovenyera o ddoohatannddo wi ddaate.

6 “Apwiya eneerodalisa ddaweera ddanyu ddittheddene.

7 “Apwiya eneerewuugonjihellani adanaanyu yuuwukilani. Vawuuwukilani enaaweelle ettilla emodda koma voothawani enaapallalleyelle ettilla dditthanu ni piilli.

8 “Apwiya eneerodalisa mitteko ddanyu ni oddalliha ekhokwe ddanyu nave eneerewuudalisani mwiillaponi enuuvahiiwaneeyo.

9 “Mwaawiiwellellaka malamulo mattheene ni weeta mu ettilla ddiwa, Apwiya eneerewuutthattusani weekhiiwa mutundu woopatuleya moollikana ni mmo yallupellelliiwa.

10 Sika athu attheene a va ellapo yavatthi ettheene eneerewoona wi Apwiya Mullukwaanyu ahuutthoollani wi mukhalle yoohallaniiwa nave eneerekowoovani.

11 Apwiya eneerewuudalisani ni ezipaso dda m'mwiillini mwanyu ddinchichi, eziweto ddinchichi navettho ddoohata ddinchichi. Eneerewuuvahani ddittheddenenndda mu ellapo eyo yallupenlliiwa wa makhollwaanyu wi eneerewuuvahani.

12 Va enthawiine, eneerewuurumihellani murimu ovenyera oddullu nko enamusungiiwa nave eneerodalisa mitteko ddanyu ddittheddene. Muneerokongoliha mitundu ddimodda ddinchichi koma nyuwaano khamuwa mukongola o orive mutundu.

13 Apwiya Mullukwaanyu eneerewuutthattusani muru ohiri mwiilla variyari va mitundu dda athu. Munaakhalleke avaddullu ohiri avatthi mwiiwellella ni othwara moororomelleya malamulwiiwa kinawinnyeemini ollellwaalla.

14 Sika va mawu kinuulleelleemini ollellwaalla, muhirukunuwelle onnattanatta apaalle wuunyotthoni voothwarani milluku ddimodda ni oddirumeyella.”


Ddoothwarellella dda ohiiwellella
( Lev 26.14-46 )

15 Koma mwaahiwiiwellella Apwiya Mullukwaanyu nave mwaahithwara malamulo ni malangizwiiwa mattheene kinawinnyeemini ollellova muneerotembeleliwa.

16 “Apwiya eneerotembelela mizinda ddanyu ni emata ddanyu.

17 “Apwiya eneerotembelela ddoohata ddanyu navettho ddoocha ddoovenyera mu ddoohatannddo ddineeroyeva.

18 “Apwiya eneerotembelela ezipaso dda m'mwiillini mwanyu, ezipaso dda m'matani mwanyu ni asaana a eziweto ddanyu.

19 “Apwiya eneerotembelela ddaweera ddanyu ddittheddene.

20 “Mwaaweeraka ddoonanara ni waakhoota Apwiya eneerewuurumihellani matembelelo, nampallalla navettho ddookatamiha va mitteko ddanyu ddittheddene ophiyera moonongeyille ni otthollowa attheenenyu mwawaakuva.

21 Eneerewuumorihellani ereta ddoothwaranathwarana ophiyera mutthollowille attheene mwiillaponi munaawaakheenyu.

22 Apwiya eneerewuullakani ni ereta ddoovahana, ddawiipawiipa ni ddooviha mwiilli. Aneerewuurumihellanittho nndduwa nawoopiha, ettalla, ephevo ni nkhuwawe ddawoononga mmiddo ddanyu. Ddineerewuuthwarani ophiyera moonongeyille ni okhwa attheenenyu va enthawi yooyeva.

23 Murimu kharupa nave ethayaanyu eneerewumma wonanko nlluku.

24 Munipuroni mwa murimu, Apwiya eneerewuumorihellani nthupi ni mihava ophiyera mutthollowille attheene.

25 “Apwiya eneerewaakhullella wi adanaanyu yuugonjiheni. Vowaawukilani munaayeelle ettilla emodda koma voothawani munaapallalleyelle ettilla dditthanu ni piilli. Nave mamwene mattheene a ellapo yavatthi eneerotthukumella vawoonani ddawuumorellaninnddo.

26 Mwakhwa, epallame ni enama ddamuhakani ddineerocha mitembo ddanyu nave khaavo naari mmodda anaaddiikare.

27 Apwiya eneerewuullakani ni etthuku wonanko dda o Iguputo. Muneerokhalla ni makhwata, ovelle ni oneena, ddittheddenenndda ddoohiiwa murete.

28 Apwiya eneerewuullakani ni ereta ya anepa, ohoona ni waapheella muru.

29 Nave muneerekewaashaasha ettilla nndduwa noopaka wonanko muthu oohoona. Erive ello munaapharekeenyu khamuphurakana ello. Munaakhallelleke ohoosiwa ni wiiyeriwa nave khaavo naari mmodda anuukavihereni.

30 “Muneeromutomela mutthiyana koma anaamutthelle tti muthu mmodda. Muneeromaka enyumba koma oohikonamo. Muneerewaalla mpesa koma ezipaso ddampesannddo oohichana.

31 Eneerekewiipha eng'ombe ddanyu moonaka ni miitthwaanyu koma enameene oohichana. Eneerekowaakhani abulwaanyu mwamakani ni oyaana waamodda, nyuwaano moonaka ni miitthwaanyu nave kheyuuhokollosellakani. Enkhosa ddanyu ddineerovelleelliwa wa adanaanyu nave khaavo naari mmodda anuukavihereni.

32 Aniinyu aallopwana ni aatthiyana eneerophariwa okaporo ni alleto, nyuwaano moonaka ni miitthwaanyu. Nave nllapo ni nllapo munaakhallelleke oweha ottilla wi apaalle aniinywaayo ttuuhokollowa koma khamuphuravo ello.

33 Mutundu weelleto eneerowaakhani ddoohata ddanyu ddittheddene nnddo mwahoowilleenyuna ollima nave muneerovirellella opaniwa ni ohoosiwa.

34 Sika muneerewaapheella muru vawoonani ni miitthwaanyu ddenndda.

35 Apwiya eneerewuullakani ni ddawiipa ddoovoreya ni ddoohichiriheya m'metoni mutthemwene nave etthuku ddineerewuukhumani mwiilli muttheene ovenyera ometoni ophiyera omuruni.

36 “Apwiya eneeromwiikarihella o ellapo yeelleto mwenaanyu ni nyuwaano attheene nko muhinakhallekeenyuwo ovenyera khalle, nyuwaano ni makhollwaanyu. Wenko muneerekorumeyella milluku ddimodda, ddamiteekho ni ddamalluku.

37 Orive weko nko Apwiya enuupallalleselleniwawo, athu eneerekewuuttikhinani, eneerekewuuttheyani, eneerekewoopa mwaha mwawuunyemullani.

38 Muneerewaalla ddinchichi koma munaahateke vang'ono kaambiiwa middope sika ddinaacheke.

39 Muneerekollima emata ddampesa, oddipwatha phaama ddene koma mpesannddo khamuddirukullaka apaalle omuwirya vang'ono vinywiiwa kaambiiwa miingu sika ddinaacheke.

40 Miteekho dda olivi ddineerekomella virive veko mu echigawaanyu koma makhuriiwa khemukhallakana kaambiiwa olivooyo aneerekovakareya.

41 Muneerekewaayara anamwani aallopwana ni aatthiyana koma khekhalla aanyu kaambiiwa eneerekophariwa okaporo.

42 Miteekho ddanyu ddittheddene ni ddeko ddanyu ddam'matani ddineerekomalla ni aneello.

43 “Alleto ookhalla mwiillaponi mwanyu sika enaavirellelleke owella koma nyuwaano munaakhallelleke okittha.

44 Alliwaayo eneerekewuukongolihani koma nyuwaano khamukhallaka ni erive ello yawi mwaakongolihe nave vatulli viwa munaakhalle mwiilla nave alliwa enaakhalle muru.

45 “Otulli ottheenoolla oneerewuumorellani nave oneerokhalla va nyuwaano ophiyera moonongeye kaambiiwa khemwaawiiwellelle Apwiya Mullukwaanyu nave khemwaathwarille malangizo mattheene yuulamulalliiwani.

46 Otulli ottheenoolla onaakhalle wonanko echizindikiro ya ollaka wa Apwiya va nyuwaano ni va edduullu ddanyu wa enthawi yoohimalla.

47 Vawi naari Apwiya yuudalisalleni, nyuwaano khemwaarumeyelle moohakallalla ni murima muttheene.

48 Sika vano muneerewaarumeyella adani ayo Apwiya enaarumihiiwa wi ellipane ni nyuwaano. Muneerovolliwa ettalla ni nthona nave muneerokhalla ni osiwa navettho ddeko ddittheddene ddineerewuuramani. Apwiya eneerewuuhoosani mweekuku ophiyera moonongeyille.

49 Apwiya eneerewiithaniha mutundu wa athu ovenyera woorekama, wookomella ellapo yavatthi wi ollipane ni nyuwaano. Athu a mutundu oyo ellotellwiiwa muhinayidduwelleenyu eneerewuumorellani wonanko mpungu.

50 Athwaayo enaakhalle oowalli nave khemumorella ethakaraka arive muthu naari mwaana apaalle awuulluvalla.

51 Eneerewuuchellani eziweto ddanyu ni ddeko ddam'matani ddene ophiyera mukhwille ni ettalla. Kheyuuhiyerani naari vang'ono tirigu, vinyo, makhura a olivi apaalle eziweto, ophiyera yuutthollosilleni.

52 Eneerohella ekhoto orive muzinda, mwiillaponi eyo Apwiya Mullukwaanyu enuuvahiiwani. Nave mipanda ddoorekama munaroromelleenyu ddineerokumuwa virive veko. Eneerowaapheellani m'mizindani ddittheddene dda ellapo eyo Apwiya Mullukwaanyu enuuvahiiwani.

53 “Adanaanyu yawaapheellani ni wuuhoosani wunchichi, muneerophiya voowaattakhunani aniinyu aallopwana ni aatthiyana ayo Apwiya yuuvahilleewani.

54-55 Naari muthu oollelliwa phaama ni oomaalleyesesa mwa nyuwaano, aneeromwimmana yoocha mwanamunne, mwaariye a vamurimani ni anaaye oohalla. Khamukawella naari mmodda enama ya anaaye anaattakhuneeye kaambiiwa khakhalla ni yoocha adanaanyu yawaapheellani ni wuuhoosani wunchichi.

56 Naari mutthiyana oollelliwa phaama, ooriiheya nave oohinyingalliha vatthi manyallwaaye aneeromwimmana mamune a vamurimani ni anaaye

57 enama ya anaaye ooyariwa wene ni dda ddoohalla vooyarani ddoovenyera m'mirimani mwaye. Anaacheke ddenndda yeekha mwawiipittha ekaamba ya oramesesa wa yoocha, adanaanyu yawaapheellani ni wuuhoosani wunchichi m'mizindani ddanyu.

58 “Mwiiwellelleke moororomelleya malamulo mattheene ayo elembiwe mu nibukhunna wi mooveke nnddina noottikhiniha ni nawoopiha na Apwiya Mullukwaanyu.

59 Mwaaheera ddiiddo Apwiya eneerewuumorihellani nyuwaano ni edduullu ddanyu ddoohoosa ddawoopiha ni ddoohimalla navettho ereta ddoohichiriheya.

60 Eneerewuumorihellani ereta ddittheddene dda o Iguputo nndde mwaddooveenyu nave ddineerowummellellani.

61 Eneerewuumorihellanittho ereta ddoohiyanahiyana ni millilli nnddo ddihiromolliwe munibukhuni na malamulo a Mulluku ophiyera moonongeyille.

62 Naari mwaatille wonanko etheneeri ddooddullu, oovulluwa munaakhalle ooyeva kaambiiwa khemwaawiiwellelle Apwiya Mullukwaanyu.

63 Wonanko mmo Apwiya ddaaddivellelliiwa wuudalisani ni owaatihani, emoddamoddave yeeyo oneerewaaddivellattho wi ewoonongeni, yuuttholloseni ni wuutullani mu ellapo eyo munaawaakheenyu.

64 Nave Apwiya eneerewuupallallesani variyari va mitundu ddittheddene ovenyera woomallihella omodda wa ellapo yavatthi ophiyera woomallihella omoddattho. Wenko munaarumeyelleke milluku ddimodda, ddamiteekho ni ddamalluku, nnddo nyuwaano ni makhollwaanyu mwahiddidduwenlleenyu waambeella khalle.

65 Khemuwa muphwanya murendelle apaalle nipuro naanyunaanyu orive weko. Munaakhalle ookhumuwa, oorama nikavihero ni ootathilla murima nave Apwiya sika enaamorihe ddenndda va nyuwaano.

66 Okumaanyu muttheene onaakhalleke wookaikakaika, otthaana ni mahiiyu munaakhallelleke woova okhwa.

67 Mirima ddanyu ddineeroddalla ni woova erive ello munaayooneenyu. Ohinase munaapaalleke ori mahiiyu nave mahiiyu munaapaalleke ori ohinase.

68 Nave Apwiya eneerewuurumihanittho o Iguputo mukallawani dda vanyanjani naari yalonjezille wi khamuwa muhokollweellawottho. Wenko muneereweeseesa wiikulliha wonanko akaporo wa adanaanyu koma khaavo naari mmodda anaapaalle wuukullani.”

The Bible in Elhomwe © The Bible Society of Malawi, 2019.

Bible Society of Malawi
Lean sinn:



Sanasan