Biblia Todo Logo
Bìoball air-loidhne

- Sanasan -

Deuteronomo 27 - Mawu a Mulluku


Malamulo a Mulluku oolembiwa vamallukuni

1 Vatulli viwa Mose, vamodda ni attekweene a Aisraele, ahaalamula athu wi, “Mwiiwellelleke malamulo mattheene kinawinnyeemini ollellwaalla.

2 Va nllapo nno munaamullapuweenyu Yordani ni ovollowa mwiillaponi eyo Apwiya Mullukwaanyu enuuvahiiwani, mwiimese malluku oorekama nave muyipulasite.

3 Vatulli viwa, mulembevo malamulo mattheenaalla mwavollowa mu ellapo yamukaka ni enwi eyo Apwiya Mulluku a makhollwaanyu yuulonjezilleewani.

4 Sika mwamullapuwa Yordani mwiimese malluku oopulasitiwaalla va mwaango wa Ebala moollikana ni mmo kuulamulalleemini ollello.

5 Nave wenko mwamakewo nikuwa na Apwiya Mullukwaanyu, nikuwa namalluku oohisemiwa ni orive mukoko.

6 Nikuwanno nikhalle namalluku oohisema nave mwavelleelleke vaavo mikutho ddooshellelliha wa Apwiya Mullukwaanyu.

7 Mwavelleelleke ni ochella mikutho ddeeyaattano wenko nave mwahakallalleke vamiitthoni Apwiya Mullukwaanyu.

8 Vamallukunimvo mulembevo mwawooneya phaama malamulo yaalla.”

9 Vano Mose ni allupa mukutho Aalevi yahaalleella Aisraele wi, “Nyu Aisraele, mweere ellapo tuu nave mwaapelle maaru! Ollello mootthattuwa athu a Apwiya Mullukwaanyu.

10 Sika muwiiwellelleke Apwiya Mullukwaanyu nave musungeke malamulo ni malangizwiiwa mattheene ayo kinawinnyeemini ollello.”


Matembelelo ekaamba ya ohiiwellella

11 Nllapo nenno Mose ahaalleella Aisraele wi,

12 “Mwamullapuwa Yordani, malloko ayo eniimelle va mwaango wa Gerizimu madaliso yaallotiwaka va Aisraele tti Simeoni, Levi, Yuda, Isakara, Yosefe ni Benjamini.

13 Nave malloko mamodda ayo eniimelle va mwaango wa Ebala matembelelo yaallotiwaka va Aisraele tti Rubeni, Gadi, Asheri, Zebuloni, Dani ni Nafutali.

14 Vano Alevi ellote mookhuwa wa Aisraele attheene.

15 “ ‘Atembeleliwe arive muthu oopanga nifano noosema apaalle nawoopa, ello yoopangiwa ni muthu eeruso, ello yawaananara Apwiya ni yoollapella mwawiipittheya.’ “Nave athu attheene yaakhulle wi, ‘Amen!’

16 “ ‘Atembeleliwe arive muthu oohaavaha olemu attiitthinnya apaalle amennya.’ “Nave athu attheene yaakhulle wi, ‘Amen!’

17 “ ‘Atembeleliwe arive muthu oosusa malire a mukhwaaye.’ “Nave athu attheene yaakhulle wi, ‘Amen!’

18 “ ‘Atembeleliwe arive muthu oomuhollosa vamusewuni muthu oohoona.’ “Nave athu attheene yaakhulle wi, ‘Amen!’

19 “ ‘Atembeleliwe arive muthu aweeruza moohilungama alleto, akhwaadduni ni anaamukhwelle.’ “Nave athu attheene yaakhulle wi, ‘Amen!’

20 “ ‘Atembeleliwe arive muthu awaawulliha muru a attiitthinnya vookonani ni mwaariwa.’ “Nave athu attheene yaakhulle wi, ‘Amen!’

21 “Atembeleliwe arive muthu ookona ni enama. “Nave athu attheene yaakhulle wi, ‘Amen!’

22 “Ohikone ni murokoriyo, mwaana aamutthiyana aattiittho apaalle aamaayo naari ari ni attiitthinnya aayeene apaalle amennya aayeene. “Nave athu attheene yaakhulle wi, ‘Amen!’

23 “Atembeleliwe arive muthu ookona ni amoottonaaye. “Nave athu attheene yaakhulle wi, ‘Amen!’

24 “Atembeleliwe arive muthu oomwiipha mwawiipittha mukhwaaye. “Nave athu attheene yaakhulle wi, ‘Amen!’

25 “Atembeleliwe arive muthu awaakhella ddamukaphwani wi amwiiphe muthu oohilakwa. “Nave athu attheene yaakhulle wi, ‘Amen!’

26 “Atembeleliwe arive muthu oohaakhullella ni oohiiwellella malamulo mattheenaalla. “Nave athu attheene yaakhulle wi, ‘Amen!’ ”

The Bible in Elhomwe © The Bible Society of Malawi, 2019.

Bible Society of Malawi
Lean sinn:



Sanasan