Deuteronomo 26 - Mawu a Mulluku

Ddoovelleella ddoohata ni ddaneekhumi

¹ “Mwavollowa ni waakha nave mwakeraattheya mu ellapo eyo Apwiya Mullukwaanyu enuuvahiiwani wi ekhalle wonanko yoohallanaanyu,

² arive muthu mwa nyuwaano ddoohata nnddo aneereeye addiphwanyeke akusekewo ddawaamba ni oddihiya munidenguni. Nave ayeekena o nipuro noollapellavo nno Apwiya Mullukwaanyu yatthoollilliiwa.

³ Aye wa mullupa mukutho oyo anaphara mutteko enthawi yeeyo nave amulleelle wi, ‘Vano koodduwella ddawoona wi Apwiya Mullukwaaka aakivollochiha mwiillaponi eyo yallupenlliiwa makhollwaahu wi eneeronivaha hiyaano.’

⁴ “Vano mullupa mukuthooyo aakhelle ndengunno ni onihiya vahoollo wa nikuwa na Apwiya Mullukwaanyu.

⁵ Nave vamiitthoni va Apwiya Mullukwaawo, ollote wi, ‘Nikhollo naka naari Muaramu, muthu aweeteeta oyo ayiille akhalla o Iguputo ni nibanja naye. Vooyaani wenko athu yaari ooyeva koma vatulli viwa yahaata etthattuwa mutundu muullupalli ni wamasiva.

⁶ Aiguputo yaaneerella ekuku ni onihoosa voonipharihani mutteko mookaporo.

⁷ Vaavo hiyaano nahinllella wa Apwiya Mulluku a makhollwaahu wi enikavihere. Alliwa yaaniiwa nave yahoona ohoowa wahu, mutteko wootopiha oyo Aiguputwaalle yanipharihiiwa navettho okumaahu woopaneyooyo.

⁸ Mwa masiviiwa muullupalli navettho mwa ekophollo ddiwa, Apwiya yaanikhumiha. Yaheera ddoottikhiniha, millilli ni ezizindikiro ddawoopiha.

⁹ Vatulli viwa yaaniphiyiha wuno enivaha ellapo ella yamukaka ni enwi.

¹⁰ Sika vano kinawa wa Apwiya ni echigawo ya ddoohata ddawaamba dda mwiillaponi eyo ekivahilliiwa miyaano.’ “Vano orulle vatthi nidengunno vamiitthoni va Apwiya Mullukwaawo ni waakokhorella vaavo.

¹¹ Hakallallani vawi Apwiya Mullukwaanyu ahuuvahani ddaphaama, nyuwaano ni a munibanjani nanyu. Alevi ni alleto ehakallalle vamodda ni nyuwaano.

¹² “Orive muyakha waneeraru muvelleelleke yoovelleella yaneekhumi ya ddoohata ddanyu wa Alevi, alleto, akhwaadduni ni anamukhwelle wi ekhalleke ni yoocha yookwakhwanella o muzinda nko enakhalliiwa. Mweera ddenndda,

¹³ mullote wa Apwiya wi, ‘Kheyiiwo naari emodda yoovelleella yaneekhumi eyo ehanlle mpa mwaka. Ddittheddene koovelleella wa Alevi, alleto, akhwaadduni ni anamukhwelle moollikana ni mmo mwakilamulelleenyu. Ngaavevullalle apaalle otiwallavo malamulwaanyu naari nimodda.

¹⁴ Ngichillevo naari emodda va yaneekhumi kinlleemi maliro. Ngaapharillevo naari emodda kaariimi ooripihiwa va mallapello. Nave nginavelleellekevo naari emodda wa ookhwa. Nyu Apwiya Mullukwaaka, kaawiiwellellani va ddittheddene mwalamulalleenyu dda yoovelleella yaneekhumi.

¹⁵ Ovenyera oddullunko onipuruni nanyu naweella, muwehe vatthi waweella nave mwaadalise athwaanyu Aisraele. Mudalisettho ellapo ella yooddalla ni mukaka ni enwi munivahilleenyu moollikana ni mmo mwallupenlleenyu makhollwaahu.’ ”

Wiiwellella malamulo a Apwiya

¹⁶ “Ollello Apwiya Mullukwaanyu enuulamulani wi mwiiwellelle malangizo ni malamulwiiwa mattheene. Sika vano moonesese wi munniiwellella ni murimaanyu muttheene ni okumaanyu muttheene.

¹⁷ Ollello mohaadduwella Apwiya wi tti Mullukwaanyu nave moolonjeza weeta mu ettilla ddiwa, osunga malangizwiiwa ni wiiwellella malamulwiiwa mattheene ni weera ddittheddene enuulamuliiwani.

¹⁸ Ollello Apwiya aawaakhellani monga athwiiwa moollikana ni mmo yuulonjezelliiwani vaavove mwasunga malamulwiiwa mattheene.

¹⁹ Mwawi ddiiddo mu othokoza, oriiheya ni ovuwa eneerewuuwellihani okhwaranya mitundu ddimodda ddittheddene dda va ellapo yavatthi nnddo yaddiphatusalliiwa nave muneerokhalla athwiiwa aweella moollikana ni mmo yalonjezelliiwa.”