Deuteronomo 24 - Mawu a Mulluku

Dda omwallana ni ohokollweellana

¹ Ttuuweereya wi muthu ttuumutthella mutthiyana nave aahimweerella echifundo ekaamba yawi oomuphwanya ni yoolakwa. Vano amulembe kalata oomwallanella nave amwinnye mutthiyanooyo vamattani ni omuvenyihevo vaatte vaye.

² Mutthiyanooyo atthelliwa ni mullopwana aneepiilli,

³ nave aneepiillooyo allotattho wi khanamupaalla ttuumulembellattho kalata oosuzula ni omwinnya vamattani nave mutthiyanooyo avenyavo vaattemvo. Apaalle mullopwana aneepiillooyo akhwa,

⁴ mamune awaamboolle khanaphwanella omuhokollweella ekaamba yawi ari wonanko ooripihiwa. Omuhokollweella tti nichimo nuullupalli vamiitthoni va Apwiya. Sika muhivollowemo ni yoolakwa mwiillaponi mmo Apwiya Mullukwaanyu enuuvahiiwani wi ekhalle wonanko yoohallanaanyu.

Malamulo oohiyanahiyana

⁵ “Muthu akhalla otthella wene ahirumihiweke okhotoni apaalle ahivahiweke orive mutteko. Vivireke muyakha mmodda ari vaatte wi amuhakallallihe phaama mwaariyooyo.

⁶ “Mwamukongoliha muthu ello muhimukuselle nsillo naye noomusillella tirigu wi ekhalle echikole vawi anaroromella nenno va okumaaye.

⁷ “Arive muthu anamwiiya Muisraele mukhwaaye ni omusunga apaalle omukulliha wonanko kaporo, iiphiweke. Sika mwawi ddiidda muneerovenyihavo yoonanara variyari vanyu.

⁸ “Yuumorellani ereta ya makate, mooneseseke wi munnathwara malangizo mattheene ayo kiwinnyalleemi allupa mukutho Aalevi ayo enuulleelleewani.

⁹ Muupuwelle nnddo Apwiya Mullukwaanyu yamweerelliiwa Miriyamu mwavenyereenyu o Iguputo.

¹⁰ “Mwamukongoliha muthu ello muhivolloweke mpa mwaye wi mwakusemo yawiikhuneellana anapaalleeye owinnyani wonanko echikole.

¹¹ Nyuwaano mwiimelle vaatte nave mwaneenooyo awinnyeni yeekha.

¹² Muthooyo akhalla oohoowa, yawiikhuneellana ya echikoleeyo ehikone owaninyu.

¹³ Muyihokollose nndduwa nihinavollowe wi olliye iikhunellena mahiiyu. Mwawi ddiidda muthooyo aneerewuuthokozani nave Apwiya Mullukwaanyu eneerohakallalla ni nyuwaano.

¹⁴ “Muhimunyingallelleke mullupa mutteko oohoowa ni oorama naari ari Muisraele mukhwiinyu apaalle mulleto ookhalla m'muzindani mwanyu.

¹⁵ Mumullivelleke nirive nllapo, nndduwa nihinavollowe mallivello a nllapo nenno. Makobiraayo annaapaalla wunchichi nave anaroromella vaavo sika wi mwaahimullivella aneerowinllellani wa Apwiya nave muneerohumullulliwa wi muri oochimwa.

¹⁶ “Makhollo ehiiphiweke ekaamba ya aniiwa, emoddamoddave anamwani ehiiphiweke ekaamba ya makhollwiiwa koma arive muthu iiphiweke ekaamba ya nichimo naaye.

¹⁷ “Mulleto apaalle mukhwaadduni muhimweeruzeke moohilungama. Nave naamukhwelle muhikuseke yawiikhuneellanaaye wi ekhalle echikole ya ekongoli.

¹⁸ Muupuwelleke wi mwaari akaporo mu Iguputo nave wi Apwiya Mullukwaanyu yaawoopollani wenko sika kinnuulamulani wi mweereke ddenndda.

¹⁹ “Mwahata ddeko m'matani mwanyu, ddimodda vang'ono ddatiwalleya, muhuurullekemo. Ddennddo mwaahiyere alleto, akhwaadduni ni anaamukhwelle wi Apwiya Mullukwaanyu yuudaliseni va mitteko ddanyu ddittheddene.

²⁰ Mwamalliha omuhata olivi vawaamba, muhuurulleke m'miteekhonimmo. Ddennddo mwaahiyere alleto, akhwaadduni ni anaamukhwelle.

²¹ Mwahata mpesa ddanyu vawaamba, muhuurullekemo. Ddennddo mwaahiyere alleto, akhwaadduni ni anaamukhwelle.

²² Muupuwelleke wi mwaari akaporo mu Iguputo nave wi Apwiya Mullukwaanyu yaawoopollani wenko sika kinnuulamulani wi mweereke ddenndda.”