Deuteronomo 23 - Mawu a Mulluku

Oohaakhullelliwa o mutthukumano wa Apwiya

¹ “Mullopwana oofuliwa apaalle oophaddeya mukhoveni ahivollowe mu mutthukumano wa Apwiya.

² “Muthu ooyariwa mooraruwa naari edduullwaaye ophiyera mbado waneekhumi ahivollowe mu mutthukumano wa Apwiya.

³ “Mwaamoni apaalle Mmowabu naari edduullu ddaye ophiyera mbado waneekhumi ahivollowe mu mutthukumano wa Apwiya.

⁴ Alliwaalla kheyuuvahilleni yoocha apaalle maaddi va olendwaanyu woovenyera o Iguputo. Nave yaamwiithaniha Balamu, mwaana a Beori, a o Petori o Mesopotamiya wi uutembeleleni.

⁵ Koma Apwiya Mullukwaanyu kheyaamwiiwellelle Balamu nave matembelelwaayo yahaatthattusa madaliso ekaamba ya wuukondani.

⁶ Muheere erive ello yowaavaha murendelle apaalle eyuuma wa enthawi yoohimalla.

⁷ “Muhaavevulleke Aedomu vawi alliwa tti abalaanyu. Muhaavevullekettho Aiguputo vawi khalle mwaakhalla mu ellapwiiwa.

⁸ Waambeella va mbado waneeraru ophiyera muhoollo edduullu ddiwa ttuuvollowana mu mutthukumano wa Apwiya.”

Opwatha wa misasa ddakhoto

⁹ “Mwakhalla m'misasani enthawi ya ekhoto murapelleke erive yooweerihani okhalla ooripihiwa.

¹⁰ Mullopwana mmodda variyari vanyu aaheellihiwa ekaamba yawi oolloha akhumaka ellopwana, akhume m'misasanimmo nave akhalle otte.

¹¹ Misikuwa ahape nave voovollowa nndduwa, ahokollweelle omisasaninko.

¹² “Mupotokose nipuro otte wa misasa wi mwiikavihereke wenko.

¹³ Nave va ezida ddanyu mukhalleke ni yookatella nlliti mwaawiikaviheraka nave mwamalliha muvuhellelle.

¹⁴ Misasa ddanyu ddikhalleke ddaweella ekaamba yawi Apwiya Mullukwaanyu eneeta variyari va misasannddo wi yuutetezeni ni wuupambanihani wa adanaanyu. Sika m'misasani mwanyu mukhalleke mwaweella wi Apwiya ehoone erive ello yoonanara ni wuunyanyallani.”

Malamulo oohiyanahiyana

¹⁵ “Muhimuhokolloselleke wa apwinnya kaporo athawella wa nyuwaano.

¹⁶ Akhalleke variyari vanyu mu orive muzi oyo anaatthoolleeye apaalle onaamuddivelle nave muhimukatamiheke.

¹⁷ “Variyari va Aisraele vihikhalle mullopwana apaalle mutthiyana oyo ari hule o nipuro naweella.

¹⁸ Makobiri mattheene oophwanyeya mu ettilla ya ohule waweereya ni mullopwana apaalle mutthiyana, muhiweekena o enyumba ya Apwiya Mullukwaanyu wi mukwakhwanihe malonjezwaanyu. Apwiya Mullukwaanyu enniitanana ddenndda.

¹⁹ “Mwamukongoliha mbalaanyu makobiri apaalle yoocha apaalle erive ello muhimullivellihe naviikho voohokollosani.

²⁰ Mulleto ttuumuvelleelliha naviikho koma ohiri mbalaanyu. Mwiiwellelle ddawoona, lamulo nenna wi Apwiya Mullukwaanyu yuudalisekeni va mitteko ddanyu ddittheddene mwiillaponi eyo munaawaakheenyu.

²¹ “Wallupella vamiitthoni va Apwiya Mullukwaawo ohillekelleke okwakhwaniha vawi Apwiya eneerewuuwatihera wi weere nave ozengeleza tti nichimo.

²² Koma mwaahillupella, khamweesiwa oochimwa.

²³ Sika mooneseseke wi munnakwakhwaniha weera nnddo mullupenlleenyu ni vayanoni vanyu ekaamba yawi mwallupenlle moohiwatiheriwa vamiitthoni va Apwiya Mullukwaanyu.

²⁴ “Mwavollowa m'matani mwa mukhwiinyu ttuucha mpesa munchichi wonanko mmo mupaallelleenyu koma muhihiye ddimodda mootukhullellamo mwanyu.

²⁵ Mwaaviraka mukhwipi mwa emata ya tirigu ya mukhwiinyu ttuucha makalla moovullulla ni matta koma muhimurete tirigu ni echikwakwa.”