Deuteronomo 22 - Mawu a Mulluku

¹ “Moona eng'ombe apaalle enkhosa ya Muisraele mukhwiinyu ehollowaka muhiyihiyerere koma muyikuse ni ohokollosella wa mwaneena.

² Koma mwaneena akhalla awoorekama apaalle khemunamudduwella muyikuselle owaninyu wi mwayisunge ophiyera mwaneenooyo awiille vooyaashaashani nave mumuhokolloselle.

³ Mweerekettho emoddamoddave mwamuphwanya bulu, yoowara apaalle erive ello yoorimiihiwa ni Muisraele mukhwiinyu.

⁴ “Bulu apaalle eng'ombe ya Muisraele mukhwiinyu yiikuhella m'musewuni, mumukavihere ovenyiha wi yiimellettho ni manyallwiiwa.

⁵ “Atthiyana ehiwareke ddoowara dda allopwana, emoddamoddavettho allopwana ddoowara dda atthiyana vawi Apwiya Mullukwaanyu ennananariwa ni athu aweera ddenndda.

⁶ “Mwaphwanya emphuru ya epallame m'muteekhoni apaalle vatthi mennya ari vamoocheni apaalle ari ni asaanaaye, muhimukuse meewooyo vamodda ni asaanaaye.

⁷ Asaanaaye ttuuwaakusa koma meewooyo mumuhiye arowe wi enthawi ya okumaanyu erekame.

⁸ “Mwaamakaka enyumba yanaanweene, moonesese wi moomaka mwanampanda vaddullu waapheella embali ddittheddene dda epattho. Sika vaavo khemwiipiwa mullatu woomwiipha moohidduwella mmodda amora vaddullumvo, akhwa.

⁹ “Muhaalleke mu emata yampesa mitundu miilli dda mmiddo. Mweera ddiiddo, ddittheddenennddo ddinaakhalle ddoohaakhullelliwa mpesannddo ni mmiddo mmoddooyo.

¹⁰ “Muhimakellelleke vamodda eng'ombe ni bulu wi ddillimeke.

¹¹ “Muhiwareke yoowara yawoopiwa moottakanyihera obweya ni nthoche.

¹² “Musoweke manyenje va makona masese a mikanjo nnddo munawareenyu.”

Dda malamulo a okwati

¹³ “Ttuuweereya wi muthu oomutthella mutthiyana, anakonana koma vatulli viwa ahinamupaallattho.

¹⁴ Vano ttuuwaamba omuwulliha muru ni omunyaambusa mutthiyanooyo voomwiipani mullatu wi khoonihalle ezizindikiro dda namwalli enthawi yatthellaniiwa.

¹⁵ “Ddeereya ddenndda, makhollo a mutthiyanooyo ekuse ezizindikiro ddawaasimikizella attekweene a nthato na m'muzindanimmo wi mutthiyanooyo aari namwalli.

¹⁶ Nave attiitthinnya a mutthiyanooyo yaalleelle attekweene a nthatwaayo wi, ‘Kahaakhullella wi mwanaka aamutthiyana atthelliwe ni muthu olla koma vano eniwa khanampaalla.

¹⁷ Oomootthera moomuwulliha muru wi khaari namwalli enthawi amutthelleeye. Koma vano hiyaano nookhalla ni omboni woosimikiza wi mwanakoolla aari namwalli ddawoona. Ngoonani, ezizindikiro dda madontho a nikhame va ekuwaaye yookwati!’ Vano eneerewooniha yoowareeyo vamiitthoni va attekweene a muzindooyo.

¹⁸ Sika attekweene a m'muzindanimmo emuphare mullopwanooyo nave emuwashulle.

¹⁹ Vatulli viwa emullivihettho makobiri a siliva makhumi khumi nave avelleelle wa attiitthinnya a mutthiyanooyo. Ddawoona allive, ekaamba yawi aamuwulliha muru namwalli a mu Israele. Komattho avirellelle okhalla mwaariye nave mullopwanooyo ahiwe amusuzula mu okumaaye muttheene.

²⁰ “Koma mwahooyo wakhalla wawoona nave omboni wawi mutthiyanooyo aari namwalli waahikhallavo,

²¹ vano emuyeena va mullako wa attiitthinnya. Nave allopwana a m'muzindammo emwiiphe voomuvokhani malluku ekaamba yawi aheera ello yoowulliha muru mu Israele vooraruwani ari mpa mwa attiitthinnya. Sika mwawi ddiidda muneerovenyihavo yoonanara variyari vanyu.

²² “Mullopwana aphariwa araruwaka ni mwaara a mwaneena, attheenaayo yiiphiwe, mullopwana ni mutthiyaneene. Sika mwawi ddiidda muneerovenyihavo yoonanara variyari vanyu.

²³ “Apaalle mullopwana ttuuphariwa m'muzindani araruwaka ni namwalli ootomeliwa.

²⁴ Sika mwaaphare attheenaayo mwaayeena otte wa muzi nave muwiiphe vawaavokhani malluku. Namwallooyo iiphiwe ekaamba yawi naari aari m'muzindani khaakhuwalle wi athu emwaakihe. Nave mullopwanooyo iiphiwe ekaamba yawi aararuwa ni namwalli ootomeliwa. Sika mwawi ddiidda muneerovenyihavo yoonanara variyari vanyu.

²⁵ “Koma mullopwana amupharella namwalli ootomeliwa ohakani, iiphiweke mullopwanave yooyo.

²⁶ Namwallooyo muhimweerena ello ekaamba yawi kheerille nichimo noollakiwana mwawi miiphiwa. Mullatu yoolla onaphwanaphwana ni wawi muthu amullika ni omwiipha mukhwaaye.

²⁷ Mullopwanooyo amupharelle namwallooyo ohakani nave naari akhuwalle khevaari oomwaakihera.

²⁸ “Ttuuweereya wi mullopwana anamupharella namwalli oohitomeliwa.

²⁹ Mullopwanooyo aallive attiitthinnya a namwallooyo mutengo wootomelella, makobiri a siliva makhumi matthanu nave amukuse wi akhalle mwaariye ekaamba yawi aakonana moomuwatihera nave ahiwe amusuzula mu okumaaye muttheene.

³⁰ “Muthu ahaawullihe muru attiitthinnya voomutthellani mwaariwa attiitthinnya.”