Deuteronomo 21 - Mawu a Mulluku

Wiiphiwa woohidduwelleya

¹ “Mwiillaponi eyo Apwiya Mullukwaanyu enuuvahiiwani wi ekhalle yaanyuyaanyu apaalle ttuumuphwanya muthu akhwenlle vahakani, nyuwaano oohimudduwella oyo amwiiphalle.

² Attekweenaanyu ni aweeruzaanyu eyeewo nave yalinge orekama wene ovenyera va nipuro mvo viri mutembooyo ophiya o mizinda ddawaatamellana ni nipuronno.

³ Vano attekweene a muzinda wawaatamellesesa ni mvo viri mutembooyo etthoolle musote wa eng'ombe ohinapharihiweke mutteko nave khonakokeke nigareta.

⁴ Nave attekweene a nthato eyeena eng'ombeeyo o ntapo na maaddi aweeta. Nipuronno nikhalle nawi waambeella khalle khavinallimiweke apaalle waalliwa ello. Nave wenko yanyokotholle nikohi na eng'ombooyo.

⁵ Allupa mukutho Aalevi eyeewottho wenko ekaamba yawi alliwa sika enaphwanella weeruza millatu ddittheddene dda ohiiwanana ni wiiphanana. Apwiya Mullukwaanyu yohaatthoolla alliwa wi ekhalle oorumeyella navettho wi yaadaliseke athu mu nnddina niwa.

⁶ Nave attekweene attheene oovenyera o muzinda wawaatamellesesa ni mvo viri mutembooyo, enawe vaddullu va eng'ombe eyo yanyokotholliwe nikohi muntaponi mulle.

⁷ Nave ellote wi, ‘Khe hiyaano namwiiphalle muthoolla nave amwiiphalle khenimudduwenlle.

⁸ Nyu Apwiya, akhululukelleni athwaanyu Aisraele ayo mwawooponlleenyu. Nikhululukelleni nave muhihiye va hiyaano nichimo na omwiipha muthu oohilakwa.’

⁹ Mweera eyo eri yaphaama vamiitthoni va Apwiya muneerovenyihavo nichimo noomwiipha muthu oohilakwa variyari vanyu.”

Atthiyana oophariwa okhotoni

¹⁰ “Apaalle voowanani ekhoto ni adanaanyu nave Apwiya Mullukwaanyu yaavelleella m'mattani mwanyu ni waaphara amodda okaporo

¹¹ variyari va akaporwaayo ttuumoonavo mutthiyana ooreera oyo uuddivenlleni ni opaalla wi mumutthelle.

¹² Vano mumuyeena owaninyu nave mutthiyanooyo acheme murwaaye, attheke ekarukha ddaye,

¹³ nave asinthe ddoowara awarilleeye voophariwani. Akhalle mpa mwanyu mweeri muttheene wi awinllelle attiitthinnya ni amennya. Ddamalla ddenndda, vano ttuumutthella wi akhalle mwaarinyu.

¹⁴ Vatulli viwa mwaahihakallallaka ni olliye, mumuhiye mwamurendelle. Khemunaphwanella omukulliha apaalle omweesattho wonanko kaporo ekaamba yawi mwaakonana.”

Yoohallana ya mwaana awaamba

¹⁵ Ttuuweereya wi muthu ookhalla ni atthiyana eelli, mmodda ookondiwa mmodda awiitiwa, attheenaayo yaayara anamwani aallopwana koma mwaana awaamba okhalla a mutthiyana awiitiwoolle.

¹⁶ Muthooyo asimikiza wi akawe eyuumaaye, eere moohiweha ekhove mwaana a mutthiyana ookondiwoolle voomuvahani echigawo ya mwaana awaamba.

¹⁷ Mwanaye awaamba amukawelle ezigawo piilli vawi olliye tti mwaana awaamba, awiimellella masiva a ellopwana ya attiitthinnya vawi tti lamulo na mwaana awaamba.

Dda mwaana oohiiwellella

¹⁸ “Ttuuweereya wi muthu mmodda okhalla ni mwaana oohiiwellella ni oowukila makhollwaaye naari emullakeve mwawiidde.

¹⁹ Makhollo a mwaanooyo emuphare nave emukuselle wa attekweene a nthato na muzinda.

²⁰ Makhollwaaye yaalleelle attekweenaayo wi, ‘Mwanihu tti oohiiwellella ni oowukila nave khaniiwellelle ddoollota ddahu navettho tti amillilli ni oolezela.’

²¹ Vano athu a m'muzindanimmo emwiiphe voomuvokhani malluku nave mwawi ddiidda muneerovenyihavo yoonanara variyari vanyu. Aisraele attheene eneerewiiwa ddenndda nave eneerewoova.”

Malamulo oohiyanahiyana

²² Muthu iiphiwa ekaamba ya mullatu nave mutembwaaye watthomeyiwa vamuteekhoni,

²³ mutembooyo ohikoneke vamuteekhonimvo. Muwuvitthe nllapo nenno kaambiiwa wi mutembo wootthomeyiwa vamuteekhoni onnawiiha matembelelo a Mulluku. Sika muvuhellelle mutembooyo wi muhiripihe ellapo eyo Apwiya Mullukwaanyu enuuvahiiwani wi ekhalle wonanko yoohallanaanyu.